དཔལ་འབྱོར་གོང་འཕེལ་བཀོད་ཚོགས་ཀྱི་ ཞལ་འཛོམས་ཐེངས་ ༩ པ་ ཚོགས་གནང་ཡོདཔ།
སྤྱི་ཟླ་ ༡༢ པའི་ཚེས་ ༢༤ ལུ་ དཔལ་འབྱོར་གོང་འཕེལ་བཀོད་ཚོགས་ཀྱི་ ཞལ་འཛོམས་ཐེངས་ ༩ པ་ ཚོགས་གནང་ཡོདཔ་ད་ དེ་བསྒང་ མི་རྗེ་བློན་ཆེན་མཆོག་གིས་ འབྲུག་ལུ་ ཕྱི་རྒྱལ་ལས་ ཐད་ཀར་དུ་ མ་རྩ་གཞི་བཙུགས་འབད་མི་ འོང་བཅུག་དགོཔ་ གལ་གནད་ཆེ་བའི་སྐོར་ལས་ གསལ་བཤད་མཛད་ནུག།དེ་ཡང་ བློན་ཆེན་གྱི་ ཡིག་ཚང་ལས་ མི་སྡེ་བརྡ་བརྒྱུད་ ཕེཛ་བུག་ནང་ བཀོད་དོ་བཟུམ་འབད་བ་ཅིན་ ཕྱི་རྒྱལ་ལས་ མ་རྩ་གཞི་བཙུགས་འབད་མི་ཚུ་གི་དོན་ལུ་ དེང་དུས་དང་མཐུན་པའི་ གནས་སྟངས་བཟོ་ཐབས་ལུ་ ཚོང་འབྲེལ་གྱི་ ལམ་ལུགས་ཚུ་ ལེགས་ཤོམ་སྦེ་ བསྐྱར་ཞིབ་འབད་དགོཔ་ཡོད་ལུགས་ཚུ་ཡང་ གསུངས་ཡི་ཟེར་ཨིན་པས།དེ་མ་ཚད་ ཞལ་འཛོམས་དེ་ནང་ འབྲུག་གི་དཔལ་འབྱོར་ལྕོགས་གྲུབ་ གསལ་སྟོན་དང་ ཡར་དྲགས་གཏང་ཐབས་ལུ་ སྤྱི་ལོ་ ༢༠༢༥ སྤྱི་ཟླ་ ༡ པའི་ནང་ རྒྱ་གར་ལུ་ ལམ་འགྲུལ་འགྲེམ་སྟོན་ཅིག་ཡང་ འགོ་འདྲེན་འཐབ་ནི་ཨིན་པའི་སྐོར་ལས་ གསུང་གྲོས་གནང་ཡོདཔ་སྦེ་ གསུངས་ཡོད་པའི་གནས་ཚུལ།
