མི་དབང་མངའ་བདག་རིན་པོ་ཆེ་མཆོག་ དགུང་ལོ་ ༤༢ བཞེས་པའི་ འཁྲུངས་སྐར་དུས་སྟོན།
སྤྱི་ལོ་ ༢༠༢༢ སྤྱི་ཟླ་ ༢ པའི་ཚེས་ ༢༡ ལུ་ མི་དབང་མངའ་བདག་རིན་པོ་ཆེ་མཆོག་ དགུང་ལོ་ ༤༢ བཞེས་པའི་ འཁྲུངས་སྐར་དུས་སྟོན་འདི་ཁར་ ང་བཅས་རའི་ འབྲུག་མི་ཡོངས་ཀྱིས་ མི་དབང་ཞབས་ལུ་ བཀྲིན་རྗེས་དྲན་དང་ གུས་བཏུད་ཞུ་ནིའི་དོན་ལས་ མཛད་རྣམ་རྒྱ་མཚོ་ལྟ་ལུ་ལས་ བཅུད་བསྡུས་ཅིག་ ཞུ་ནི་ཨིན། དེ་ཡང་ མི་དབང་མངའ་བདག་རིན་པོ་ཆེ་མཆོག་ འབྲུག་མི་ཡོངས་ཀྱི་ བསོད་ནམས་ཀྱི་ བགོ་སྐལ་ལུ་ འབྲུག་བརྒྱུད་འཛིན་གྱི་ མི་དབང་རྒྱལ་རབས་བཞི་པ་མཆོག་དང་ ལྷ་སྲས་གཙང་མ་ལས་བརྒྱུད་པའི་ ཞབས་དྲུང་འཇིགས་མེད་རྡོ་རྗེ་དང་ ཞབས་དྲུང་གསུང་སྤྲུལ་ ཕྱོགས་ལས་ཡེ་ཤེས་དངོས་གྲུབ་མཆོག་གི་ གདུང་བརྒྱུད་ལས་ མི་དབང་རྒྱལ་ཡུམ་ ཚེ་རིང་གཡང་སྒྲོན་དབང་ཕྱུག་མཆོག་གི་སྲས་ལུ་ སྤྱི་ལོ་ ༡༩༨༠ སྤྱི་ཟླ་ ༢ པའི་ཚེས་ ༢༡ ལུ་ མཚན་རྟས་བཟང་པོ་དང་བཅས་པའི་སྒོ་ལས་ སྐུ་འཁྲུངས་ནུག། སྐུ་ཡོན་གསན་སྦྱངས།མི་དབང་མཆོག་ སྐུ་ན་ཆུང་ཀུའི་བསྒང་ལས་ར་ མི་སེར་སྤྱིར་བཏང་གི་ ཨ་ལོ་ཚུ་དང་ ཁྱད་པར་མེད་པའི་ དཀའ་སྤྱད་མཛད་དེ་ ལུང་བསྟན་ཟམ་པ་ འབྲིང་རིམ་སློབ་གྲྭ་བར་མ་དང་ དབྱངས་ཅན་ཕུག་ འབྲིང་རིམ་སློབ་གྲྭ་ཆེ་བའི་ནང་ སློབ་རིམ་ ༡༢ […]