སྤ་རོ་རྫོང་ཁག་གི་ ལོ་བསྟར་སྨོན་ལམ་ཆེན་མོ་ འགོ་བཙུགས་གནང་ཡོདཔ།

མེ་རྟ་ཟླཝ་ ༨ པའི་ཚེས་ ༣༠ སྤྱི་ཟླ་ ༡༠ པའི་ཚེས་ ༡༠ ལས་ ཉིན་གྲངས་ ༣ གྱི་རིང་ལུ་ སྐྱབས་རྗེ་རྗེ་མཁན་རིན་པོ་ཆེ་མཆོག་ དབུ་བཞུགས་ཐོག་ལས་ སྤ་རོ་རྫོང་ཁག་གི་ འཛམ་གླིང་ཞི་བདེའི་ ལོ་བསྟར་སྨོན་ལམ་ཆེན་མོ་ འགོ་བཙུགས་གནང་ནུག།
དེ་ཡང་ རང་ཟླ་ ༨ པའི་ཚེས་ ༡༥ སྤྱི་ཟླ་ ༩ པའི་ཚེས་ ༢༦ ལས་ བདུན་ཕྲག་ ༢ ཀྱི་རིང་ལུ་ དཔལ་ལྡན་འབྲུག་པའི་ བཀའ་ཁྲིད་གནང་མི་དེ་ རང་ཟླ་ ༨ པའི་ཚེས་ ༢༩ སྤྱི་ཟླ་ ༡༠ པའི་ཚེས་ ༩ ལུ་ བླ་མ་དགོངས་པ་འདུས་པའི་ བཀའ་དབང་ཡོངས་རྫོགས་གནང་སྟེ་ གྲོལ་གནང་མི་དང་ འཕྲོ་མཐུད་དེ་ར་ སྨོན་ལམ་ཆེན་མོ་ ཐེངས་ ༡༢ པ་དེ་ གནང་དོ་ཡོདཔ་ཨིན་པས།
དེ་བསྒང་ སྤ་རོ་ལུ་ སྐྱབས་རྗེ་རིན་པོ་ཆེའི་ཞབས་ལས་ བཀའ་ཁྲིད་ཟབ་མོ་དང་ སྨིན་བྱེད་བཀའ་དབང་ཚུ་ ཞུ་ནིའི་དོན་ལས་ བླ་སློབ་དང་ དགེ་འདུན་འདུས་པའི་རྒྱ་མཚོ་གིས་ དབུ་གཙོས་པའི་ དད་ལྡན་སེར་སྐྱ་ཕོ་མོ་ཁྲི་ཕྲག་སྦེ་ སྤུངས་འཛོམས་འབད་ནུག།
དེ་བཟུམ་མའི་ བཀའ་ཁྲིད་དང་ སྨོན་ལམ་ཆེན་མོ་དེ་ཡང་ སྤ་རོ་རྫོང་ཁག་བདག་སྐྱོང་དང་ རིན་སྤུང་གྲྭ་ཚང་ རྒེད་འོག་ཁག་དང་ སྤ་རོ་བར་བསྐོར་མཚོ་དྲུག་གི་ མི་སེར་ཡོངས་ཀྱིས་ སྦྱིན་བདག་གི་ འགན་ཁུར་དང་ ཞབས་ཏོག་ཚུ་ གང་དྲག་ཞུ་ཐོག་ལས་ གནངམ་ཨིན་པའི་གནས་ཚུལ།