རྒྱ་གར་གྱི་ ཕྱི་འབྲེལ་བློན་པོ་གིས་ འབྲུག་ལུ་ གཟིགས་སྐོར་གནང་ཡོདཔ།
པདྨ་དབང་འདུས། འབྲུག་གི་ཕྱི་འབྲེལ་དང་ ཕྱིར་ཚོང་ལྷན་ཁག་གི་བློན་པོ་ ཌི་ཨེན་དུང་གེལ་གྱིས་ མགྲོན་བརྡ་གནངམ་བཞིན་དུ་ རྒྱ་གར་གྱི་ ཕྱི་འབྲེལ་བློན་པོ་ ཌོག་ཊར་ཨེཛ་ཇའི་ཤང་ཀར་གྱིས་ སྤྱི་ཟླ་ ༩ པའི་ཚེས་ ༡༦ ལས་ ༡༨ ཚུན་ གཞུང་དོན་གཟིགས་སྐོར་ལུ་ བྱོན་ཡོདཔ་ཨིན་པས། གཟིགས་སྐོར་སྐབས་ལུ་ རྒྱ་གར་གྱི་ ཕྱི་འབྲེལ་བློན་པོ་གིས་ མི་དབང་མངའ་བདག་རིན་པོ་ཆེ་མཆོག་དང་ མི་རྗེ་བློན་ཆེན་གྱི་ སྐུ་མདུན་ལུ་ བཅར་ཡོདཔ་མ་ཚད་ རྒྱ་འབྲུག་གི་ ཕྱི་འབྲེལ་བློན་པོ་ ༢ ཀྱི་བར་ན་ རྒྱལ་རབས་ཅན་གྱི་ལུང་གཤོང་ བུམ་ཐང་ལུ་སྦེ་ གསུང་གྲོས་ཚུ་ཡང་གནང་ནུག། དེ་མ་ཚད་ ཕྱི་འབྲེལ་བློན་པོ་ ༢ ཀྱིས་ ཟུང་ཕྱོགས་མཉམ་འབྲེལ་དང་ མཐའ་དོན་གཅིག་པའི་ ལུང་ཕྱོགས་དང་ རྒྱལ་སྤྱིའི་གནད་དོན་ཚུ་གི་སྐོར་ལས་ཡང་ གསུང་གྲོས་ཚུ་ གནང་ཡོདཔ་ད་ མི་དབང་མངའ་ཞབས་མཆོག་དང་ རྒྱ་གར་གྱི་བློན་ཆེན་ ཤྲཱི་ན་རེན་ད་ར་ མོ་དི་མཆོག་གི་ ལམ་སྟོན་བཟང་པོའི་འོག་ལུ་ དམིགས་བསལ་གྱི་ རྒྱ་འབྲུག་མཉམ་འབྲེལ་སྣ་ཚོགས་ཀྱི་ ཡར་འཕེལ་དང་ བཙན་ཐབས་ལུ་ ངལ་རངས་ཡོད་ལུགས་ཚུ་ཡང་ བཤད་ཡོདཔ་ཨིན་པས།
