དངུལ་ཕོགས་ལྷན་ཚོགས་བདུན་པ་ གཞི་བཙུགས་གནང་ཡོདཔ།

པདྨ་དབང་འདུས།
སྤྱི་ཟླ་ ༡༠ པའི་ཚེས་ ༩ ལུ་ ཟླ་རིམ་གནས་ཚུལ་ཞལ་འཛོམས་ ཐེངས་ ༣༢ པའི་ནང་ མི་རྗེ་བློན་ཆེན་ དྲག་ཤོས་ཚེ་རིང་སྟོབས་རྒྱས་ཀྱིས་ མི་དབང་མངའ་བདག་རིན་པོ་ཆེའི་ཞབས་ལས་ བཀའ་རྒྱ་སྤྱི་བོར་ཕེབས་དོན་ལྟར་དུ་ སྤྱི་ལོ་ ༢༠༢༦ སྤྱི་ཟླ་ ༡༠ པའི་ཚེས་ ༡ ལས་ ཆ་གནས་ཡོད་པའི་ དངུལ་ཕོགས་ལྷན་ཚོགས་ ༧ པ་དེ་ གཞི་བཙུགས་གནང་ཡོདཔ་སྦེ་གསུངས་ཡི།
ལྷན་ཚོགས་དེ་གི་ ཁྲི་འཛིན་ཡང་ འབྲུག་སླར་བྱུང་གློག་མེ་ལས་འཛིན་གྱི་ འཛིན་སྐྱོང་མདོ་ཆེན་ དྲག་ཤོས་ཚེ་དབང་རིག་འཛིན་ བསྐོ་བཞག་གནང་ཡོདཔ་ད་ དངུལ་ཕོགས་ལྷན་ཚོགས་ ༦ པ་དེ་ སྤྱི་ལོ་ ༢༠༢༣ ལུ་ གཞི་བཙུགས་གནང་ཡོདཔ་ཨིན་པས།
དེ་ཡང་ འབྲུག་གི་རྩ་ཁྲིམས་ཆེན་མོའི་ རྩ་ཚན་ ༣༠ པའི་ནང་ དུས་དང་དུས་ལུ་ བློན་ཆེན་གྱི་ རྒྱབ་སྣོན་ཐོག་ལས་ རང་དབང་ཅན་གྱི་ དངུལ་ཕོགས་ལྷན་ཚོགས་རེ་ གཞི་བཙུགས་འབད་དགོ་ཟེར་བའི་ དགོངས་དོན་དང་འཁྲིལ་ཏེ་ གཞི་བཙུགས་གནང་ནུག།
འབྲུག་གི་རྩ་ཁྲིམས་ཆེན་མོའི་ རྩ་ཚན་ ༣༠ པའི་ དོན་ཚན་ ༡ པའི་ནང་ དངུལ་ཕོགས་ལྷན་ཚོགས་ཀྱི་ ཁྲི་འཛིན་དེ་ རང་དབང་ཅན་སྦེ་ གནས་དགོཔ་ད་ དོན་ཚན་ ༢ པའི་ནང་ ལྷན་ཚོགས་དེ་གིས་ རྒྱལ་གཞུང་ཞི་གཡོག་ལྷན་ཚོགས་དང་ དྲང་ཁྲིམས་ལྷན་སྡེ་ སྤྱི་ཚོགས་ཀྱི་འཐུས་མི་ ས་གནས་གཞུང་ དེ་ལས་ རྩ་ཁྲིམས་ཅན་གྱི་ ཡིག་ཚང་ཚུ་གི་ ལས་བྱེདཔ་དང་ འཐུས་མི་ཚུ་དང་ མི་མང་ལས་གཡོགཔ་ཚུ་གི་ དངུལ་ཕོགས་སྒྲིག་བཀོད་དང་ འཐུས་ ཁེ་ཕན་ དེ་ལས་ གླ་འཐུས་གཞན་གྱི་རིགས་ཚུ་ བསྐྱར་ཞིབ་འབད་ནི་ལུ་ གྲོས་འཆར་བཀོད་དགོཔ་སྦེ་ཡོདཔ་ཨིན་པས།
དེ་བཟུམ་སྦེ་ དོན་ཚན་ ༣ པའི་ནང་འབད་བ་ཅིན་ ལྷན་ཚོགས་དེ་གི་ རྒྱབ་སྣོན་གྲོས་འཆར་ཚུ་ སྤྱི་ཚོགས་ནང་ལས་བཀོད་མི་ གནས་ཚིག་དང་ སྒྱུར་བཅོས་ཚུ་དང་བསྟུན་ཏེ་ ལྷན་རྒྱས་གཞུང་ཚོགས་ཀྱིས་ གནང་བ་གྲོལ་བའི་ཤུལ་ལུ་ ལག་ལེན་འཐབ་ཆོག་ནི་ཨིན་པའི་ དགོངས་དོན་བཀོད་དེ་འདུག།
དངུལ་ཕོགས་ལྷན་ཚོགས་ ༧ པ་གིས་ རྒྱལ་ཁབ་ནང་འཁོད་ཀྱི་ མི་མང་ལས་གཡོགཔ་ཚུ་གི་ དངུལ་ཕོགས་དང་ འཐུས་ ཁེ་ཕན་ དེ་ལས་ གླ་འཐུས་གཞན་གྱི་རིགས་ཚུ་ བསྐྱར་ཞིབ་འབད་དེ་ གནམ་དགུན་གྱི་ སྤྱི་ཚོགས་ནང་ ཕུལ་ཚུགས་པའི་ རེ་འདུན་ཡོདཔ་ད་ འཚོ་བའི་གནས་གོང་གི་ འགྱུར་བ་ཚུ་དང་བསྟུན་ཏེ་ ཞི་གཡོགཔ་ཚུ་གིས་ཡང་ ཁོང་གི་དངུལ་ཕོགས་དང་ འཐུས་ཚུ་ ལྡང་ཚད་དང་ལྡན་མ་སྦེ་ རྒྱུན་སྐྱོང་འཐབ་ནིའི་དོན་ལས་ བསྐྱར་ཞིབ་མཛད་འོང་མནོ་བའི་ རེ་བ་བསྐྱེད་དོ་ཡོདཔ་སྦེ་བཀོད་ནུག།
དཔེར་ན་ གསོ་བའི་ལས་སྡེའི་ནང་ ལས་གཡོགཔ་མང་ཤོས་ཅིག་ར་ དགོས་མཁོ་ཆེ་བའི་ འགན་ཁུར་དང་བསྟུན་ཏེ་ དངུལ་ཕོགས་ཀྱི་ ལྡང་ཚད་མེད་པའི་ བསམ་དཔྱད་ཐོག་ལུ་ ལཱ་གཡོག་ནང་ལས་ དགོངསམ་ཞུ་སྟེ་ ཕྱི་རྒྱལ་ལས་ཕར་ ལཱ་གཡོག་འཚོལ་བར་ སོང་ཡོདཔ་ལས་ ད་རེས་ཀྱི་ དངུལ་ཕོགས་བསྐྱར་བཟོ་དེ་ རང་སོའི་ལཱ་འགན་དང་ ལཱ་གཡོག་གི་ གནས་སྟངས་ཚུ་དང་ ཚུལ་མཐུན་འོང་པའི་ རེ་བ་བསྐྱེད་དོ་ཡོདཔ་ཨིན་པས།
དེ་འབདཝ་ལས་ དངུལ་ཕོགས་ལྷན་ཚོགས་ཀྱིས་ རྒྱལ་ཁབ་ནང་གི་ དཔལ་འབྱོར་གནས་སྟངས་དང་ མི་མང་ཟད་འགྲོའི་ ་ཡུན་བརྟན་ཚུ་གུ་ གཞི་བརྟེན་ཐོག་ལས་ མི་མང་ལས་གཡོགཔ་ཚུ་གི་ ཕན་བདེ་དང་ སེམས་སྐུལ་ཚུ་ དོ་མཉམ་བཟོ་དགོ་པའི་ འགན་ཁུར་འཁྲི་ཡོདཔ་ཨིན་པའི་གནས་ཚུལ།