བསམ་གྲུབ་ལྗོངས་མཁར་ ཁྲོམ་སྡེའི་ནང་ གློག་བརྙན་ཁང་ བཟོ་བསྐྲུན་གྱི་དོན་ལས་ ས་བསླངས་རྟེན་འབྲེལ།
སྤྱི་ཟླ་ ༢ པའི་ཚེས་ ༡༣ ལུ་ བསམ་གྲུབ་ལྗོངས་མཁར་ ཁྲོམ་སྡེའི་ནང་ གློག་བརྙན་ཁང་ བཟོ་བསྐྲུན་གྱི་དོན་ལས་ ས་བསླངས་རྟེན་འབྲེལ་བརྩི་སར་ སྐུ་མགྲོན་གཙོ་བོ་སྦེ་ བཟོ་གྲྭ་ཚོང་འབྲེལ་དང་ ལཱ་གཡོག་ལྷན་ཁག་གི་ བློན་པོ་རྣམ་རྒྱལ་རྡོ་རྗེ་གིས་ གྲལ་གཏོགས་མཛད་ཡོདཔ་ཨིན་པས།དེ་བསྒང་ བསམ་གྲུབ་ལྗོངས་མཁར་གྱི་ ཁྲོམ་དཔོན་དང་ ཁྲོམ་སྡེའི་བཀོད་ཁྱབ་དྲུང་ཆེན་ བསམ་གྲུབ་ལྗོངས་མཁར་ རྫོང་ཁག་ཁརིམས་འདུན་གྱི་དྲང་དཔོན་ འབྲུག་བརྡ་དོན་བརྒྱུད་འབྲེལ་དང་ བརྡ་བརྒྱུད་དབང་འཛིན་གྱི་མདོ་ཆེན་ བསམ་གྲུབ་ལྗོངས་མཁར་ རྫོང་ཁག་གི་ ལས་སྡེ་ཚུ་དང་ ཁྲོམ་སྡེའི་འགོ་དཔོན་ཚུ་ དེ་ལས་ ལུང་ཕྱོགས་བཟོ་གྲྭ་ཚོང་འབྲེལ་དང་ ལཱ་གཡོག་ཡིག་ཚང་གི་ འགོ་དཔོན་ཚུ་གིས་ཡང་ གྲལ་གཏོགས་འབད་ནུག།ས་བསླངས་རྟེན་འབྲེལ་གྱི་ གསུང་ཆོག་དེ་ བསམ་གྲུབ་ལྗོངས་མཁར་རབ་སྡེའི་ བླམ་གནས་བརྟན་མཆོག་ དབུ་བཞུགས་ཐོག་ལུ་ དགེ་སློང་ཚུ་གིས་ གནང་ཡོདཔ་ཨིན་པས།གློག་བརྙན་ཁང་དེ་ དཔལ་འབྱོར་ལྷན་ཐབས་ལས་རིམ་ཐོག་ལས་ འབྲུག་བརྡ་དོན་བརྒྱུད་འབྲེལ་དང་ བརྡ་བརྒྱུད་དབང་འཛིན་གྱིས་ ལག་ལེན་འཐབ་ནི་ཨིནམ་ད་ གློག་བརྙན་ཁང་དེ་གིས་ རྫོང་ཁག་ནང་ གློག་བརྙན་སྟོན་ནི་རྐྱངམ་ཅིག་མིན་པར་ སྙན་ཆའི་སྤྲོ་སྟོན་དང་ འཁྲབ་སྟོན་ གསལ་བཤད་ལ་སོགས་པ་ཚུ་གི་དོན་ལུ་ཡང་ སྤྱི་དོན་ཁང་སྦེ་ ལག་ལེན་འཐབ་ནི་ལུ་ ཕན་ཐོགས་འབྱུང་ནི་ཨིན་པའི་གནས་ཚུལ།
