ཡུ་ཀེ་རེན་གྱི་ ཕྱད་མདའི་སྐོར་ལས་ སྲིད་འཛིན་ཊཱམ་དང་ སྲིད་འཛིན་པུ་ཊིན་གྱི་བར་ན་གསུང་གྲོས།

བི་བི་སི།
སྤྱི་ཟླ་ ༢ པའི་ཚེས་ ༡༣ ལུ་ ཡུ་ཨེས་གི་སྲིད་འཛིན་ ཌོ་ནཱལ་ཊཱམ་གྱིས་འབད་བ་ཅིན་ ར་ཤི་ཡའི་སྲིད་འཛིན་དང་གཅིག་ཁར་ ཡུ་ཀེ་རེན་གྱི་ ཕྱད་མདའི་སྐོར་ལས་ བརྒྱུད་འཕྲིན་ཐོག་ལུ་ གསུང་གྲོས་གནངམ་ད་ ཕྱད་མདའ་མཚམས་འཇོག་གི་དོན་ལུ་ འགྲིག་ཆ་བཟོ་ནི་སྦེ་ ཞལ་འཆམ་བྱུང་ཡི་ཟེར་ཨིན་པས།
དེ་བཟུམ་སྦེ་ ཡུ་ཀེ་རེན་གྱི་སྲིད་འཛིན་ ཝོ་ལོ་ཌི་མིར་ ཟི་ལེནཛ་ཀི་གིས་ཡང་ སྲིད་འཛིན་ཊཱམ་དང་གཅིག་ཁར་ ཡུན་ཐུབ་ཅན་དང་ ཡིག་ཆེས་འདྲོངས་པའི་ ཞི་བདེའི་སྐོར་ལས་ གསུང་གྲོས་གནང་ཡོདཔ་སྦེ་ཨིན་པས།
སྲིད་འཛིན་ཊཱམ་གྱིས་ སྲིད་འཛིན་པུ་ཊིན་དང་གཅིག་ཁར་ སའུ་དི་ཨ་རབ་བི་ཡ་ལུ་སྦེ་ མཇལ་ཕྲད་མཛད་ནི་གི་ ལས་རིམ་ཡོདཔ་ད་ ར་ཤི་ཡ་ལས་ མགྲིན་ཚབ་ཌི་མི་ཏིར་ པེཛ་ཀོབ་ཀྱིས་ བཤད་དོ་བཟུམ་འབད་བ་ཅིན་ སྲིད་འཛིན་པུ་ཊིན་གྱིས་ སྲིད་འཛིན་ཊཱམ་གྱི་ ཐུགས་འཆར་ཚུ་ལུ་ ངོས་ལེན་ཡོད་ཟེར་ཨིན་པས།
གནད་དོན་དེ་ལུ་ ཡུ་ཀེ་གཞུང་གི་ ཁ་ཐུག་ལས་ཡང་ འཕྲོ་མཐུད་དེ་ར་ ཡུ་ཀེ་རེན་གྱི་ སྲུང་སྐྱོབ་ལུ་ རྒྱབ་སྐྱོར་འབད་ནི་ཨིནམ་ད་ ད་རེས་ཀྱི་ ཡུ་ཨེཛ་གཞུང་གིས་ འདས་པའི་གཞུང་དང་ཕྱདཔ་ད་ ཡུ་ཀེ་རེན་ལུ་ སྙིང་རྗེ་ཉུང་སུ་ཅིག་ བསྐྱེད་དོ་ཡོདཔ་ལས་ ར་ཤི་ཡའི་ སེམས་ཁར་འཐད་འོང་ཟེར་ཨིན་པས།
ཡུ་ཀེ་རེན་གྱི་སྲིད་འཛིན་ ཟེ་ལེནཛ་ཀི་གིས་ དུས་གཏན་འཇགས་ར་ ཁོ་ར་དང་ ཡང་ཅིན་ ཡུ་ཀེ་རེན་གྱི་ ངོ་ཚབ་མེད་པར་ ཡུ་ཀེ་རེན་གྱི་སྐོར་ལས་ གསུང་གྲོས་གནང་མི་ཚུ་ལུ་ ཆ་གནས་མེད་ལུགས་ བཤདཔ་བཤད་ས་ར་ཨིན་རུང་ སྲིད་འཛིན་ཊཱམ་དང་ པུ་ཊིན་གྱི་བར་ན་ ཟེ་ལེནཛ་ཀི་མེད་པའི་ གནས་སྐབས་ནང་ གསུང་གྲོས་གནང་མིའི་ཐེད་ཁར་ ཟེ་ལེནཛ་ཀི་གིས་ སྲིད་འཛིན་ཊཱམ་དང་གཅིག་ཁར་་ བརྒྱུད་འཕྲིན་ཐོག་ལུ་ གནད་དོན་མ་འདྲཝ་ཚུ་གི་སྐོར་ལས་ ཡུན་རིང་གི་བར་ན་ གསུང་གྲོས་གནང་ཡོདཔ་སྦེ་ གསུངསམ་ཨིན་པས་ཟེར་ བཀོད་འདུག་པའི་གནས་ཚུལ།