འབྲུག་དང་ རྒྱ་ནག་གི་བར་ན་ ས་མཚམས་མཁས་མཆོག་གི་ ཞལ་འཛོམས་ཐེངས་ ༡༦ པ་ ཚོགས་གནང་ཡོདཔ།

པདྨ་དབང་འདུས།
འབྲུག་དང་ རྒྱ་ནག་གི་ ས་མཚམས་སྐོར་ལས་ མཁས་མཆོག་སྡེ་ཚན་གྱི་ ཞལ་འཛོམས་ཐེངས་ ༡༦ པ་དེ་ སྤྱི་ཟླ་ ༡༠ པའི་ཚེས་ ༡༣ ལས་ ༡༥ ཚུན་ ཉིན་གྲངས་ ༣ གྱི་རིང་ལུ་ ཐིམ་ཕུ་ལུ་སྦེ་ གནང་ཡོདཔ་ཨིན་པས།
ཞལ་འཛོམས་སྐབས་ལུ་ འབྲུག་གི་སྡེ་ཚན་འགོ་ཁྲིདཔ་ རྒྱལ་སྤྱི་ས་མཚམས་དྲུང་ཆེན་ ལས་འཕྲོ་སྟང་སྦིས་དང་ རྒྱ་ནག་སྡེ་ཚན་འགོ་ཁྲིདཔ་ རྒྱ་ནག་གི་ ཕྱི་འབྲེལ་ལྷན་ཁག་འོག་གི་ ས་མཚམས་དང་ རྒྱ་མཚོའི་ལས་དོན་ལས་ཁུངས་ཀྱི་ ཡོངས་ཁྱབ་མདོ་ཆེན་ ཧའོ་ཡང་ཀི་ ༢ ཀྱིས་ མཉམ་འབྲེལ་ཁྲི་འཛིན་མཛད་ནུག།
སྡེ་ཚན་གཉིས་ཀྱིས་ འཕྲལ་ཁམས་ཀྱི་ལོ་ཚུ་ནང་ ས་མཚམས་དང་འབྲེལ་བའི་ འགྲིག་ཆ་ནང་ ཡར་འཕེལ་བྱུང་ཡོད་མི་ཚུ་ བསྐྱར་ཞིབ་འབད་ཡོདཔ་ད་ འབྲུག་དང་རྒྱ་ནག་གི་ ས་མཚམས་སྐོར་ལས་ གོ་དོན་ཆིངས་ཡིག་ནང་ གོ་རིམ་གསུམ་འབད་མི་ མདུན་ལམ་དེ་ ལག་ལེན་གང་མགྱོགས་ འཐབ་ནིའི་དོན་ལུ་ གསུང་གྲོས་ཚུ་ཡང་ གནང་ཡོདཔ་ཨིན་པས།
དེ་བསྒང་ འབྲུག་དང་ རྒྱ་ནག་གི་བར་ན་ཡོད་པའི་ མཐུན་ལམ་དང་ མཉམ་འབྲེལ་གྱི་ གནས་སྟངས་ནང་ གསུང་གྲོས་ཚུ་ གནང་ཡོདཔ་ད་ མཁས་མཆོག་སྡེ་ཚན་གྱི་ ཤུལ་མའི་ཞལ་འཛོམས་དེ་ མོས་མཐུན་ཐོག་ལས་ བྱ་སྟབས་བདེ་བའི་ དུས་ཚོད་ཁར་ གནང་ནི་སྦེ་ ཞལ་འཆམ་བྱུང་ནུག།
འབྲུག་དང་ རྒྱ་ནག་གི་ ས་མཚམས་བཅད་མཚམས་ བཀལ་ནི་དང་འབྲེལ་བའི་ མཉམ་འབྲེལ་ཁྱད་རིག་སྡེ་ཚན་གྱིས་ ཞལ་འཛོམས་ཐེངས་ ༤ པ་དེ་ཡང་ ས་མཚམས་མཁས་མཆོག་སྡེ་ཚན་གྱི་ ཞལ་འཛོམས་ཀྱི་ཕྱི་ཁར་ གནང་ཡོདཔ་བཞིན་དུ་ སྡེ་ཚན་གཉིས་ཆ་རའི་ ཁ་ཐུག་ལས་ ཤུལ་མའི་གོ་རིམ་གྱི་ མདུན་ལམ་དང་འབྲེལ་ཏེ་ དོན་ཡོད་གོ་དོན་ཚུ་ བྱུང་ཡི་ཟེར་ གནས་ཚུལ་གསར་བཏོན་ནང་ བཀོད་འདུག་པའི་གནས་ཚུལ།