འབྲུག་དང་ བང་ལ་དེཤ་གི་བར་ན་ ཅ་དམ་མཉམ་འབྲེལ་དང་ ཚོང་འབྲེལ་གྱི་ མཐུན་རྐྱེན་བཙན་ཐབས་ལུ་ ཁས་ལེན་བསྐྱར་གསོ།

སྤྱི་ཟླ་ ༡༠ པའི་ཚེས་ ༡༤ དང་ ༡༥ ལུ་ བང་ལ་དེཤ་གི་རྒྱལ་ས་ དྷ་ཀ་ལུ་སྦེ་ འབྲུག་དང་ བང་ལ་དེཤ་ ཅ་དམ་མཉམ་འབྲེལ་སྡེ་ཚན་གྱི་ ཞལ་འཛོམས་ཐེངས་ ༨ པའི་ནང་ འབྲུག་གི་འོང་འབབ་དང་ ཅ་དམ་ལས་ཁུངས་ཀྱིས་ གྲལ་གཏོགས་འབད་ཡོདཔ་ཨིན་པས།
འབྲུག་གི་སྡེ་ཚན་དེ་ འོང་འབབ་དང་ ཅ་དམ་ལས་ཁུངས་ཀྱི་ ཡོངས་ཁྱབ་མདོ་ཆེན་ བསོད་ནམས་རྒྱ་མཚོ་གིས་ འགོ་ཁྲིད་འབད་ཡོདཔ་ད་ བང་ལ་དེཤ་གི་སྡེ་ཚན་དེ་ རྒྱལ་ཡོངས་འོང་འབབ་ བཀོད་ཚོགས་ཀྱི་འཐུས་མི་ ཌོག་ཊར་མོ་ཧ་མཱད་ཨཱལ་ ཨ་མིན་་པར་མ་ནིག་གིས་ འགོ་ཁྲིད་འབད་ནུག།
འབྲུག་གི་སྡེ་ཚན་ནང་ འོང་འབབ་དང་ ཅ་དམ་ལས་ཁུངས་དང་ ཚོང་འབྲེལ་ལས་ཁུངས་ དེ་ལས་ ཕྱི་འབྲེལ་ལྷན་ཁག་ཚུ་ལས་ ཆེ་མཐོའི་འགོ་དཔོན་ཚུ་ཡང་ཡོདཔ་ཨིན་པས།
ཞལ་འཛོམས་སྐབས་ལུ་ སྤྱི་ལོ་ ༢༠༢༤ སྤྱི་ཟླ་ ༥ པའི་ནང་ སྤ་རོ་ལུ་ཚོགས་མི་ ཅ་དམ་མཉམ་འབྲེལ་སྡེ་ཚན་གྱི་ ཞལ་འཛོམས་ཐེངས་ ༧ པའི་ གྲོས་ཆོད་ཚུ་གི་ ཡར་འཕེལ་ཚུ་ བསྐྱར་ཞིབ་འབད་ཡོདཔ་ད་ གཞན་ཡང་ རྒྱལ་ཁབ་ ༢ ཀྱི་བར་ན་ གདམ་ཁ་ཅན་གྱི་ ཚོང་འབྲེལ་ཆིངས་ཡིག་དང་ བརྒྱུད་སྤེལ་འགྲིག་ཆ་ ཅ་དམ་བྱ་སྒོ་ ས་མཚམས་ལག་ལེན་དང་ བརྡ་དོན་བརྗེ་སོར་ཚུ་རྩིས་ཏེ་ མཐའ་དོན་གཅིག་པའི་ གནད་དོན་ཚུ་གི་སྐོར་ལས་ གྲོས་གླེང་ཚུ་འབད་ནུག།
རྒྱལ་ཁབ་གཉིས་ཆ་རའི་ ཁ་ཐུག་ལས་ ཅ་དམ་མཉམ་འབྲེལ་ བཙན་ཐབས་འབད་ནི་དང་ ཁྲིམས་མཐུན་ཚོང་འབྲེལ་ལུ་ ལྷན་ཐབས་འབད་ནི་ དེ་ལས་ ཉོག་སེལ་གྱི་བྱ་སྒོ་ཚུ་ བྱ་སྟབས་བདེ་ཏོག་ཏོ་ བཟོ་ནི་དང་ ས་མཚམས་ཁའི་ སྤྲོད་ལེན་དུས་ཡུན་ ཐུང་སུ་བཟོ་ནི་ཚུ་ལུ་ ཁས་ལེན་བསྐྱར་གསོ་དང་ འབྲེལ་ཡོད་དབང་འཛིན་ཚུ་གི་བར་ན་ མཉམ་འབྲེལ་ཡར་དྲག་ གཏང་ནི་དང་ ཅ་དམ་གྱི་བྱ་སྒོ་ཚུ་ དེང་དུས་དང་ མཐུན་ཏོག་ཏོ་བཟོ་ནི་ ཚོང་འབྲེལ་ཚུ་ འཇོན་སྟབས་ཅན་དང་ སྔོན་དཔག་འབད་ཚུགསཔ་ བཟོ་ནི་ཚུ་ གལ་ཆེ་བའི་སྐོར་ལས་ཡང་ གསུང་གྲོས་བྱུང་ཡོདཔ་ཨིན་པས།
ཅ་དམ་མཉམ་འབྲེལ་སྡེ་ཚན་གྱི་ ཞལ་འཛོམས་ཐེངས་ ༩ པ་དེ་ སྤྱི་ལོ་ ༢༠༢༧ ལུ་ འབྲུག་ལུ་གནང་ནི་སྦེ་ ཞལ་འཆམ་བྱུང་ཡོད་པའི་གནས་ཚུལ།