འབྲུག་དང་ ཀམ་བོ་ཌི་ཡ་ ༢ ཀྱི་བར་ན་ དོན་གཅོད་མཐུན་ལམ་གཞི་བཙུགས།

པདྨ་དབང་འདུས།
སྤྱི་ལོ་ ༢༠༢༦ སྤྱི་ཟླ་ ༡༠ པའི་ཚེས་ ༡༤ ལུ་ ནིའུ་ཡོག་ལུ་སྦེ་ འབྲུག་དང་ ཀམ་བོ་ཌི་ཡའི་བར་ན་ དོན་གཅོད་མཐུན་ལམ་ གཞི་བཙུགས་འབད་ཡོདཔ་ད་ དེ་ཡང་ རྒྱལ་བརྒྱུད་རྒྱལ་ཁབ་ ༢ ཀྱི་བར་ན་ མཐུན་ལམ་གོང་འཕེལ་གྱི་ མཛད་སྒོ་གལ་ཅན་ཅིག་ཨིན་པས།
དེ་ཡང་ དོན་གཅོད་མཐུན་ལམ་ གཞི་བཙུགས་ཀྱི་ མཉམ་འབྲེལ་གསལ་བསྒྲགས་གུ་ འཛམ་གླིང་སྤྱི་ཚོགས་ནང་ འབྲུག་གི་གཏན་འཇགས་སྐུ་ཚབ་ བསྟན་འཛིན་རང་གྲོལ་དབང་ཕྱུག་དང་ ཀམ་བོ་ཌི་ཡའི་ གཏན་འཇགས་སྐུ་ཚབ་ ཀི་ཡོ་ཆི་ཡ་ ༢ ཀྱིས་ མཚན་རྟགས་ཚུ་བཀོད་ནུག།
དེ་སྦེ་ གསལ་བསྒྲགས་གུ་ མཚན་རྟགས་བཀོད་པའི་སྐབས་ལུ་ གཏན་འཇགས་སྐུ་ཚབ་ ༢ ཀྱིས་ ད་རེས་ཀྱི་ དོན་གཅོད་མཐུན་ལམ་གཞི་བཙུགས་དེ་ འབྱུང་རབས་ཅན་ཅིག་ཨིན་པའི་ཁར་ རྒྱལ་ཁབ་ ༢ དང་ མི་སེར་ཚུ་གི་བར་ན་ སྔར་བ་ལྷག་པའི་ མཐུན་ལམ་དམ་གཟབ་དང་ གོ་རྟོགས་དང་ མཉམ་འབྲེལ་གོང་འཕེལ་གྱི་དོན་ལུ་ གལ་གནད་ཆེ་བའི་ གོམ་པ་མདུན་སྤོའི་ རྟགས་མཚན་ཅིག་ཨིནམ་སྦེ་ བཤད་པའི་ཁར་ དོན་གཅོད་མཐུན་ལམ་དེ་ལུ་བརྟེན་ཏེ་ ཕན་ཚུན་མཐའ་དོན་གཅིག་པའི་ གནད་དོན་ཚུ་ནང་ ཡུན་བརྟན་གསུང་གྲོས་དང་ གྲལ་གཏོགས་ཀྱི་སྒོ་ལས་ མཉམ་འབྲེལ་གྱི་ གོ་སྐབས་གསརཔ་ བཏོན་ཚུགས་པའི་ ཡིད་ཆེས་ཡོད་ལུགས་ཡང་ བཤད་ཡོདཔ་ཨིན་པས།
དོན་གཅོད་མཐུན་ལམ་ གཞི་བཙུགས་འདི་གིས་ རྒྱལ་བརྒྱུད་རྒྱལ་ཁབ ༢ ཀྱིས་ རྒྱལ་སྤྱིའི་མཉམ་འབྲེལ་རྒྱ་སྐྱེད་དང་ མཐུན་ལམ་དང་ མཉམ་འབྲེལ་བཙན་ཐབས་འབད་ནི་ལུ་ ཁས་ལེན་གྲུབ་པའི་ བརྡ་མཚོན་སྟོན་དོ་ཡོདཔ་ད་ དེ་ཡང་ ཕན་ཚུན་བརྩི་བཀུར་དང་ གོ་རྟོགས་ དེ་ལས་ ལུང་ཕྱོགས་དང་ རྒྱལ་སྤྱིའི་མཉམ་འབྲེལ་ཁས་ལེན་ལུ་ གཞི་བརྟེན་ཏེ་ འབྲུག་དང་ ཀམ་བོ་ཌི་ཡ་ རྒྱལ་ཁབ་གཉིས་ཀྱིས་ མ་འོངས་མདུན་བསུ་ཅན་གྱི་ མཐུན་འབྲེལ་གཞི་བཙུགས་འབད་ནི་ལུ་ གཞི་འགྱམ་བཙུགས་གནང་ནུག།
ཀམ་བོ་ཌི་ཡའི་ རྒྱལ་ཁབ་དང་གཅིག་ཁར་ དོན་གཅོད་མཐུན་ལམ་ གཞི་བཙུགས་འབད་མི་དེ་རྩིས་ཏེ་ འབྲུག་གིས་ ཡུ་རོ་པི་ཡཱན་ རྒྱལ་ཁབ་ཚོགས་པ་དང་ གཞན་ཡང་ རྒྱལ་ཁབ་ ༦༣ དང་གཅིག་ཁར་ དོན་གཅོད་མཐུན་ལམ་ཡོདཔ་ཨིན་པའི་གནས་ཚུལ།