རྒྱལ་ཁབ་ཀྱི་ ལམ་སྲོལ་འདི་ ཨང་གནས་འཕྲུལ་རིག་ཐོག་ལས་ ཉམས་སྲུང་དང་ བརྗེ་སོར་གྱི་ ཐབས་ལམ་གསར་བཏོད།
པདྨ་དབང་འདུས། འབྲུག་གིས་ སྔར་ཁྱུན་ལམ་སྲོལ་ཉམས་སྲུང་དང་ ཡུན་བརྟན་ཅན་གྱི་ ལམ་སྲོལ་གོང་འཕེལ་གྱི་དོན་ལུ་ ཐིམ་ཕུ་ཨང་གནས་འཕྲུལ་རིག་བརྒྱུད་དེ་ ཁྱད་ཆོས་དང་ལྡན་པའི་ འཕྲུལ་རིག་ལས་འགུལ་ཅིག་ སྤྱི་ཟླ་ ༥ པའི་ཚེས་ ༢༨ ལུ་ འགོ་བཙུགས་ནུག།ནང་སྲིད་ལྷན་ཁག་ སྲོལ་འཛིན་དང་ རྫོང་ཁ་གོང་འཕེལ་ལས་ཁུངས་ཀྱིས་ འབྲུག་གི་རྒྱུ་ནོར་གཞི་བཟུང་ལས་སྡེ་དང་ འབྲུག་གཞུང་འཕྲུལ་རིག་ལས་སྡེ་ ༢ དང་ མཉམ་འབྲེལ་ཐོག་ལས་ ཁྱད་ཆོས་དང་ལྡན་པའི་ ཨང་གནས་བདོག་གཏད་ གསར་བཏོད་འབད་མིའི་ དམིགས་གཏད་དེ་ཡང་ རྒྱལ་ཁམས་ཀྱི་ ཐུན་མོང་མ་ཡིན་པའི་ ལམ་སྲོལ་འདི་ ཨང་གནས་འཕྲུལ་རིག་ཐོག་ལས་ ཉམས་སྲུང་དང་ བརྗེ་སོར་འབད་ཐབས་ལུ་ཨིན་པས།དེ་བཟུམ་མའི་ གལ་གནད་ཆེ་བའི་ གསར་བཏོད་འདི་གིས་ བྱིན་ལྡན་ཅ་ཆས་དང་ ཐགས་རིགས་ཚུ་ ཡོངས་འབྲེལ་ཐོག་ལས་ ཉོ་སྒྲུབ་འབད་ཚུགས་ནི་ཨིནམ་ད་ དེ་ཡང་ འབྲུག་གི་དུས་མེད་ལམ་སྲོལ་འདི་ དེང་དུས་དང་བསྟུན་པའི་ འཕྲུལ་རིག་དང་ འབྲེལ་མཐུན་འབད་ཐབས་ལུ་ཨིན་ཟེར་ གནས་ཚུལ་གསར་བཏོན་ནང་བཀོད་ནུག།དེ་མ་ཚད་ ལས་འགུལ་དེ་གིས་ འབྲུག་གི་མ་འོངས་པའི་དོན་ལུ་ཡང་ སྔར་ཁྱུན་ལམ་སྲོལ་ ཉམས་སྲུང་གིས་མ་དོ་བར་ ཁྱད་ཆོས་ཅན་གྱི་ འབྲུག་གི་ལམ་སྲོལ་འདི་ རྒྱལ་སྤྱིའི་གནས་རིམ་ནང་ ཁྱབ་སྤེལ་ཡང་འབད་ཚུགས་ནི་ཨིན་པས།གནད་དོན་དེ་གི་སྐོར་ལས་ ནང་སྲིད་ལྷན་ཁག་ སྲོལ་འཛིན་དང་ རྫོང་ཁ་གོང་འཕེལ་ལས་ཁུངས་ འགྲེམ་སྟོན་སྡེ་ཚན་གྱི་གཙོ་འཛིན་ […]
