པདྨ་དབང་འདུས།
སྤྱི་ཟླ་ ༡༠ པའི་ཚེས་ ༡༩ ལུ་ འབྲུག་གི་གཞུང་ཚབ་ འཚོ་སྐྱིད་ཆོས་སྒྲོན་གྱིས་ ཛེག་རེ་པབ་ལིག་གི་ པེ་རེག་ཕོ་བྲང་ནང་སྦེ་ སྲིད་འཛིན་པི་ཊར་པ་བེལ་ལུ་ གཞུང་ཚབ་ངོ་སྤྲོད་ཀྱི་ ཡིག་ཆ་ཕུལ་ནུག།
དེ་སྦེ་ གཞུང་ཚབ་ངོ་སྤྲོད་ཀྱི་ ཡིག་ཆ་ཕུལ་བའི་ཤུལ་ལུ་ སྲིད་འཛིན་པི་ཊར་པ་བེལ་དང་ བློན་ཆེན་ཨཱན་ཌྲེཇ་བ་བིཛ་གི་ སྐུ་མདུན་ལུ་བཅར་ཏེ་ མི་དབང་མངའ་བདག་རིན་པོ་ཆེའི་ཞབས་ལས་ ཛེག་རེ་པབ་ལིག་གི་ སྲིད་འཛིན་དང་ བློན་ཆེན་ མི་སེར་བཅས་ལུ་ བཀྲིས་ལེགས་སྨོན་ཡོད་ལུགས་དང་ འབྲུག་གཞུང་གི་ ཁ་ཐུག་ལས་ ཛེག་རེ་པབ་ལིག་དང་གཅིག་ཁར་ མཐུན་ལམ་མདུན་བསྐྱོད་དང་ མཉམ་འབྲེལ་གྱི་ དང་འདོད་ཡོད་ལུགས་ཚུ་ ཞུ་ཡོདཔ་ཨིན་པས།
པེ་རེག་ལུ་ གཞུང་ཚབ་སྐྱིད་ཆོས་སྒྲོན་གྱིས་ ཛེག་རེ་པབ་ལིག་གི་ ཕྱི་འབྲེལ་ལྷན་ཁག་དང་ བཟོ་གྲྭ་དང་ ཚོང་འབྲེལ་ལྷན་ཁག་གི་ ཆེ་མཐོའི་འགོ་དཔོན་ཚུ་དང་ སྒེར་སྡེའི་ངོ་ཚབ་ཚུ་དང་ཕྱད་དེ་ དཔལ་འབྱོར་དང་ ཚོང་ལཱ་མཉམ་འབྲེལ་ ཡར་དྲག་གཏང་ནི་དང་ མཐའ་དོན་གཅིག་པའི་ གནད་དོན་ཚུ་ནང་ མཉམ་འབྲེལ་རྒྱ་སྐྱེད་ཚུ་གི་སྐོར་ལས་ གྲོས་གླེང་ཚུ་འབད་ནུག།
འཚོ་སྐྱིད་ཆོས་སྒྲོན་དེ་ ཛེག་རེ་པབ་ལིག་ལུ་ འབྲུག་གི་གཞུང་ཚབ་དང་པ་ཨིནམ་ད་ གཞུང་ཚབ་མོ་ར་ བེལ་ཇི་ཡམ་གྱི་རྒྱལ་ས་ བར་སེལཛ་ལུ་ གཞི་གནས་འབད་དེ་ཡོདཔ་ཨིན་པས།
འབྲུག་དང་ ཛེག་རེ་པབ་ལིག་གི་བར་ན་ དོན་གཅོད་མཐུན་ལམ་དེ་ སྤྱི་ལོ་ ༢༠༡༡ སྤྱི་ཟླ་ ༡༢ པའི་ཚེས་ ༢ ལུ་ གཞི་བཙུགས་གནང་ཡོད་པའི་གནས་ཚུལ།
Leave a Reply