རོའི་ཊརཛ།
སྤྱི་ཟླ་ ༡༠ པའི་ཚེས་ ༡༩ ལུ་ ཀོ་ལོམ་བི་ཡའི་ ལྷོ་ནུབ་ཁ་ཐུག་ལུ་ ཁྲིམས་འགལ་ཐོག་ལས་ གསེར་བཏོན་མི་ ས་ཁོངས་ཅིག་ རམ་ཡར་སོངཔ་ལས་ མི་གྲངས་ ༡༤ ལུ་ ཤི་རྐྱེན་དང་ གཞན་མི་ ༧ ལུ་ རྨ་སྐྱོན་བྱུང་ནུག།
རྐྱེན་ངན་དེ་ཡང་ ན་རི་ནོ་མངའ་སྡེའི་ སཱན་ཊ་བཱར་བཱ་ར་ ཌི་ཨིཛ་ཀཱུན་ཌི་ ཁྲོམ་སྡེའི་གྲོང་གསེབ་ ཅམ་བེ་རོའི་ ས་ཁོངས་ནང་ བྱུང་ཡོདཔ་ད་ ས་གནས་དེ་ཁར་ འཚོལ་ཞིབ་དང་ ཉེན་སྐྱོབ་ཀྱི་ ལཱ་ཚུ་ཡང་ མཇུག་བསྡུ་ཡོདཔ་སྦེ་ ནཱ་རི་ནོ་ མངའ་སྡེའི་གཙོ་འཛིན་ ལུ་ཡིཛ་ཨཱལ་ཕཱོན་སོ་ ཨིཛ་ཀོ་བཱར་གྱིས་ བཤད་ཡོདཔ་ཨིན་པས།
ནཱ་རི་ནོ་ མངའ་སྡེའི་གཙོ་འཛིན་གྱིས་ གཞུང་དང་ རྒྱལ་ཡོངས་ས་གཏེར་ལས་སྡེ་ དེ་ལས་ ས་གཏེར་དང་ ནུས་ཤུགས་ལྷན་ཁག་ཚུ་ལུ་ ཁྲིམས་འགལ་དང་ ས་གཏེར་ཆུང་བ་ཚུ་གི་དོན་ལས་ ལཱ་གི་གནས་སྟངས་དང་ ཉེན་སྲུང་གི་ གནས་ཚད་ཚུ་ ཡར་དྲག་གཏངཐབས་ལུ་ གཞུང་འབྲེལ་གྱི་ བྱ་རིམ་ཚུ་ མགྱོགས་དྲགས་སྦེ་ར་ ལག་ལེན་འཐབ་དགོ་པའི་ ཞུ་བ་འབད་ནུག།
མདང་ཞག་ སྤྱི་ཟླ་ ༨ པའི་ནང་ཡང་ ནཱ་རི་ནོ་མངའ་སྡེའི་ པོ་ལི་ཀར་པ་ཁྲོམ་ཁར་ དེ་བཟུམ་མའི་ ས་གཏེར་གྱི་ ས་ཁོངས་ཅིག་ནང་ ཐུག་རྐྱེན་བྱུང་ཡོདཔ་ལས་ མི་གྲངས་ ༡༣ ལུ་ ཤི་རྐྱེན་བྱུང་ཡོདཔ་ཨིན་པས།
ཀོ་ལོམ་བི་ཡའི་ གྲོང་གསེབ་ས་ཁོངས་ཚུ་ནང་ ཁྲིམས་མཐུན་མིན་པའི་ ས་གཏེར་གྱི་ལཱ་འབད་མི་ ཡོངས་གྲགས་ཅན་སྦེ་ཡོད་རུང་ ཉེན་སྲུང་གི་ གཞི་རྟེན་མཁོ་ཆས་དང་ མཐུན་རྐྱེན་ཚུ་ མེད་ནི་དེ་གིས་ འཕྲལ་འཕྲལ་སྦེ་ར་ ཐུག་རྐྱེན་བྱུངམ་ཨིན་པས་ཟེར་ བཀོད་འདུག་པའི་གནས་ཚུལ།
Leave a Reply