ཡུ་ཀེ་རེན་གྱིས་ ར་ཤི་ཡའི་ ས་སྣུམ་མཛོད་ཁང་ལུ་ གནོད་འཚུབ་བཀལ་ཡོདཔ།
རོའི་ཊརཛ། སྤྱི་ཟླ་ ༣ པའི་ཚེས་ ༢༡ ལུ་ ར་ཤི་ཡའི་ ལུང་ཕྱོགས་དབང་འཛིན་ཚུ་གིས་ བཤད་དོ་བཟུམ་འབད་བ་ཅིན་ ཀ་རཱཛ་ནོ་དར་ ལུང་ཕྱོགས་ནང་ཡོད་མི་ ས་སྣུམ་མཛོད་ཁང་ཅིག་གུ་ ཡུ་ཀེ་རེན་གྱིས་ མཁའ་དམག་གནམ་གྲུ་ཆུང་བ་ ཌྲཱོན་བཏང་སྟེ་ གནོད་འཚུབ་བཀལ་མི་ལུ་བརྟེན་ཏེ་ མེ་རྐྱེན་བྱུང་ཡོདཔ་ཨིན་པས།དེ་མ་ཚད་ མེ་བསད་ནི་གི་ ལཱ་ཚུ་འབད་བའི་སྐབས་ལུ་ སྣུམ་མཛོད་ ༡ གས་པའི་རྐྱེན་གྱིས་ ས་སྣུམ་ཕྱི་ཁར་ཞལ་མི་ལུ་ཡང་ མེ་བཤེད་དེ་ སྣུམ་མཛོད་གཞན་ཡང་ འཚིགས་སོངཔ་ལས་ མེ་རྐྱེན་དེ་གིས་ ས་ཁོངས་གྲུ་བཞི་ མི་ཊར་ ༡༠,༠༠༠ དེ་ཅིག་ལུ་ ཁྱབ་ཡོདཔ་སྦེ་བཀོད་ནུག།ཀ་རཱཛ་ནོ་དར་ ལུང་ཕྱོགས་ནང་ཡོད་མི་ ས་སྣུམ་མཛོད་ཁང་དེ་ གཡུས་ཚན་ཀབ་ཀཱཛ་ཀ་ཡའི་ ཉེ་འདབས་ལུ་ཨིནམ་ད་ དེ་ཡང་ ར་ཤི་ཡ་གིས་ བེ་ལེག་སཱི་ལུ་ ས་སྣུམ་བཀྲམ་སྤེལ་གྱི་དོན་ལས་ དུང་ཅུང་ཚུ་ མཐུད་འབྲེལ་འབད་དེ་ཡོད་མི་ ས་ཁོངས་ཅིག་ཨིན་པས།ཡུ་ཀེ་རེན་གྱི་ ཁ་ཐུག་ལས་ ས་སྣུམ་མཛོད་ཁང་ལུ་ གནོད་འཚུབ་བཀལ་མི་དེ་ ནུས་ཤུགས་ས་ཁོངས་ཚུ་ནང་ གནོད་འཚུབ་མ་བཀལ་བར་ ཕྱད་མདའ་མཚམས་འཇོག་འབད་ནི་གི་ གྲོས་འཆར་ལས་ འགལ་ཡོདཔ་སྦེ་ བཤདཔ་ཨིན་པས་ཟེར་ བཀོད་འདུག་པའི་གནས་ཚུལ།
