ཨཱལ་ཇ་ཟི་ར། ད་རེས་ནངས་པ་ རྒྱ་པཱན་ལུ་ སྐྱེས་ལོ་ ༡༠༠ ཡན་ཆད་འབད་མི་ མི་གྲངས་ ༡༠༠,༠༠༠ ལྷགཔ་ཅིག་ཡོདཔ་ད་ དེ་ཡང་ རྒྱལ་ཁབ་དེ་ནང་ མི་ཚེ་རིང་པའི་ ལམ་རིམ་གསརཔ་ཅིག་ལུ་ གྱུར་ཡོདཔ་ཨིན་པས། རྒྱ་པཱན་གྱི་ གསོ་བ་དང་ ལས་མི་ ཕན་བདེ་ལྷན་ཁག་གིས་ ཐོ་བཀོད་འབད་མིའི་ནང་ དུས་ཅི་ སྐྱེས་ལོ་ ༡༠༠ ཡན་ཆད་འབད་མི་ མི་གྲངས་ ༡༠༧,༦༧༧ ལུ་ ལྷོད་ཡོདཔ་ད་ དེ་ཡང་ སྤྱི་ལོ་ ༢༠༢༥ ལས་ ད་ཚུན་གྱི་བར་ན་ མི་གྲངས་ ༧,༩༡༤ དེ་ཅིག་ ཡར་སེང་སོང་ནུག།
བི་བི་སི། སྤྱི་ཟླ་ ༩ པའི་ཚེས་ ༡༨ ལུ་ པ་ཀིཛ་ཏཱན་གྱི་ ནུབ་བྱང་ཁ་ཐུག་ལུ་ ཁྲིམ་སྲུང་འགག་སྡེའི་ ས་ཁོངས་ནང་ཡོད་མི་ ཁ་ཆེའི་ལྷ་ཁང་ཅིག་ལུ་ རྫས་བམ་འབག་མི་ སྣུམ་འཁོར་ཅིག་གིས་ གནོད་འཚུབ་བཀལ་ཡོདཔ་ལས་ མི་གྲངས་ ༢༡ དེ་ཅིག་ལུ་ ཤི་རྐྱེན་དང་ ༡༠༠ ལྷགཔ་ཅིག་ལུ་ རྨ་སྐྱོན་བྱུང་ཡོདཔ་ཨིན་པས། དེ་ཡང་ ཁི་བཱར་པག་ཏཱུན་ཁེ་ཝ་མངའ་སྡེའི་ ཀོ་ཧཱཊ་ཁྲོམ་སྡེ་ལུ་ ཁྲིམས་སྲུང་འགག་སྡེའི་ མཐུན་རྐྱེན་ས་ཁོངས་ནང་ རང་སྲོག་བཅད་ཐོག་ལུ་ རྫས་བམ་འགས་བཅུག་ མིའི་ནང་ ཤི་རྐྱེན་བྱུང་མི་ཚུ་གི་གྲས་ཁར་ ཁྲིམ་སྲུང་འགག་སྡེའི་ འགོ་དཔོན་ ༡༥ དང་ སྐྱེས་ལོ་ ༤ འབད་མི་ ཨ་ལུ་ཅིག་ཡང་ཡོདཔ་སྦེ་བཀོད་ནུག།
བི་བི་སི། སྤྱི་ཟླ་ ༩ པའི་ཚེས་ ༡༧ ལུ་ བརྟག་ཞིབ་སྙན་ཞུ་ཅིག་ནང་ བཀོད་དོ་བཟུམ་འབད་བ་ཅིན་ ནེ་པཱལ་དང་ བོད་ཀྱི་ས་མཚམས་ལུ་ ཆུ་རུད་སྦོམ་སྦེ་ར་ ཐོན་མི་དེ་ གནམ་གཤིས་འགྱུར་བ་ལུ་བརྟེན་ཏེ་ འཁྱེག་རི་ཚུ་ རམ་འགྱོ་ནི་དེ་གིས་ཨིན་པའི་ གྲུབ་འབྲས་ཐོན་ཡི་ཟེར་ཨིན་པས། དེ་ཡང་ གནམ་གཤིས་ལུ་བརྟེན་ཏེ་ ངེས་བདེན་ཨིན་པའི་སྐོར་ལས་ ལཱོན་ཌཱོན་ཨིམ་པེ་རི་ཡལ་ མཐོ་རིམ་སློབ་གྲྭའི་ གནམ་གཤིས་མཁས་མཆོག་ ཌོག་ཊར་ཕི་རི་ཌེ་རིག་ཀེ་ ཨོ་ཊོ་གིས་ གསལ་བཤད་འབད་ནུག། འཛམ་གླིང་ནང་ ཚ་དྲོད་ཡར་སེང་འགྱོཝ་ལས་ འཁྱེག་རི་ཚུ་ རིམ་པ་བཞིན་དུ་ བཞུ་འགྱོ་ནི་དེ་གིས་ འཁྱེག་རི་སྲབ་ཤོག་ཤོ་སྦེ་ ཐལ་བའི་ཤུལ་ལུ་ རམ་འགྱོ་བའི་སྟབས་ཀྱིས་ ཆུ་རུད་ཐོན་ཡོདཔ་སྦེ་ འཛམ་གླིང་གནམ་གཤིས་བརྟག་ཞིབ་ཀྱིས་ བཤད་ཡོདཔ་ཨིན་པས།
བི་བི་སི། སྤྱི་ཟླ་ ༩ པའི་ཚེས་ ༡༦ ལུ་ ས་གནས་ཀྱི་ སྲོག་སྐྱབས་སྡེ་ཚན་ཚུ་གིས་ ག་ཟའི་ས་ཁོངས་ནང་ དམག་འཁྲུག་གིས་ གནོད་སྐྱོན་རྐྱབ་སྟེ་ཡོད་མི་ སྒྲིང་ཁྱིམ་ཅིག་ རམ་ཡར་སོངཔ་ལས་ ཨ་ལུ་ཚུ་རྩིས་ཏེ་ མི་གྲངས་ ༢༠ དེ་ཅིག་ལུ་ ཤི་རྐྱེན་བྱུང་ཡོདཔ་མ་ཚད་ ལེ་ཤ་ཅིག་ཡང་ བྱང་སྟོར་ཤོར་ཡོདཔ་སྦེ་ བཤདཔ་ཨིན་པས། དེ་ཡང་ ག་ཟ་ཁྲོམ་སྡེ ཏཱལ་ཨཱལ་ཧ་ཝའི་ ས་ཁོངས་ནང་ ཐོག་ཚད་ལེ་ཤ་ཡོད་མི་ སྒྲིང་ཁྱིམ་དེ་ རམ་འགྱོ་བའི་ཤུལ་ལུ་ ས་རུག་རྡོ་རུག་ཚུ་གི་ནང་ལས་ ཤི་མིའི་ཕུངམོ་ཚུ་དང་ མ་ཤི་བར་ལུས་མི་ཚུ་ འཚོལ་ཞིབ་འབད་དོ་ཡོདཔ་སྦེ་བཀོད་ནུག། ས་གནས་ཀྱི་ མི་སེར་ཚུ་གིས་ སླབ་མིའི་ནང་ ཧེ་མ་ལས་ ཁང་ཚན་ཅན་གྱི་ སྒྲིང་ཁྱིམ་ཚུ་ ཉེན་སྲུང་མེད་པའི་སྐོར་ལས་ ཉེན་བརྡ་འབད་ཡོད་རུང་ བཟའ་ཚང་ ༡༠ དེ་ཅིག་ སྒྲིང་ཁྱིམ་དེ་ནང་ར་ སྡོད་ནུག་ཟེར་ཨིན་པས། ག་ཟ་ལུ་ ཨིཛ་རེལ་གྱིས་ ཅ་ཆས་ཚུ་ བཀག་ཆ་འབད་མི་ལུ་བརྟེན་ཏེ་ ཧ་མཱཛ་གིས་ འགོ་འདྲེན་འཐབ་མི་ ཞི་བའི་སྲུང་སྐྱོབ་ཞབས་ཏོག་སྡེ་ཚན་གྱི་ འཐུས་མི་ཚུ་གིས་ འཚོལ་ཞིབ་ཀྱི་ལཱ་ཚུ་ ལག་པ་གིས་འབད་ཡོད་རུང་ […]
བི་བི་སི། སྤྱི་ཟླ་ ༩ པའི་ཚེས་ ༡༦ ལུ་ ཁྲོམ་སྡེའི་མེ་བསད་དབང་འཛིན་ཚུ་གིས་ བཤད་དོ་བཟུམ་འབད་བ་ཅིན་ ལོཛ་ཨེན་ཇི་ལེཛ་གི་ ཟུར་ཁྲོམ་ཅིག་ནང་ གནམ་གྲུ་ཧེ་ལི་ཀོབ་ཊར་ཅིག་ལུ་ ཐུག་རྐྱེན་བྱུང་ཡོདཔ་ལས་ མི་གྲངས་ ༣ ལུ་ ཤི་རྐྱེན་དང་ གཞན་མི་ ༢ ལུ་ རྨ་སྐྱོན་བྱུང་ཡོདཔ་ཨིན་པས། དེ་སྦེ་ ཐུག་རྐྱེན་བྱུང་མི་ གནམ་གྲུ་དེ་ གནས་ཚུལ་གྱི་དོན་ལུ་ ལག་ལེན་འཐབ་དོ་ཡོདཔ་མ་ཚད་ ཊེ་ལེ་མཱན་ཌུ་ ༥༢ ཟེར་མིའི་དོན་ལུ་ཡང་ ལག་ལེན་འཐབ་དོ་ཡོདཔ་ད་ དེ་བསྒང་ ས་གནས་དེ་ཁར་ཡོད་མི་ སྣུམ་འཁོར་སྐྱེལ་འདྲེན་བཱཛ་ ལེ་ཤ་ཅིག་ལུ་ཡང་ ཐུག་རྐྱེན་བྱུང་ཡོད་པའི་ སྙན་ཞུ་འབད་ནུག།
བི་བི་ཧི། སྤྱི་ཟླ་ ༩ པའི་ཚེས་ ༡༢ ལུ་ ཨི་རག་ལས་ མཁའ་དམག་འཕྲུལ་ཆས་ ཌྲཱོན་ཚུ་གི་ཐོག་ལས་ གནོད་འཚུབ་བཀལ་བའི་ཤུལ་ལུ་ སཱའུ་དི་ཨ་ར་བི་ཡ་གིས་ མར་ཁུའི་དུང་ལམ་ གལ་ཅན་ཅིག་ སྒོ་བསྡམས་ཡོདཔ་ཨིན་པས། དེ་ཡང་ ཨི་རག་གིས་ ཁྱིམ་ཚང་རྒྱལ་ཁབ་ཀྱི་ ཤར་ནུབ་དུང་ལམ་ལུ་ མཁའ་དམག་འཕྲུལ་ཆས་ཌྲཱོན་ཚུ་གིས་ གནོད་འཚུབ་བཀལ་མི་དེ་ ཨི་རཱན་གྱི་ ས་མཚམས་ལུ་ཡོད་པའི་ མངའ་སྡེ་ཅིག་ལས་ བྱུང་ཡོདཔ་སྦེ་ ངོས་ལེན་འབད་ནུག།
བི་བི་སི། སུ་ཡིཛ་ཨཱལ་པཱཛ་གི་ ཤར་ལྷོ་ཁ་ཐུག་ལུ་ བལྟ་བཤལ་པའི་ སྣུམ་འཁོར་ཅིག་ལུ་ ཐུག་རྐྱེན་བྱུང་ཡོདཔ་ལས་ མི་གྲངས་ ༥ ལུ་ ཤི་རྐྱེན་དང་ ༤༠ དེ་ཅིག་ལུ་ རྨ་སྐྱོན་སྦོམ་བྱུང་ནུག། དེ་ཡང་ སྤྱི་ཟླ་ ༩ པའི་ཚེས་ ༡༠ གྱི་ ཕྱི་རོ་ཁམས་ཅིག་ཁར་ ཌཱཆ་བལྟ་བཤལ་པའི་ སྣུམ་འཁོར་བཱཛ་དེ་ ག་ར་འུ་བཱན་ཌེན་ ལུང་ཕྱོགས་ནང་ སུ་ཅེཆ་དང་ ཟེར་ནེཛ་གི་བར་ན་ འཁོར་ལམ་གྱི་ ལཱ་འབད་སའི་ ས་ཁོངས་ཅིག་ནང་ ལམ་འོག་ལས་མར་ མགོ་མཇུག་ལོག་སྟེ་ ཡར་སོངཔ་ཨིན་པས། དེ་བསྒང་ རྨ་སྐྱོན་བྱུང་མི་ཚུ་ག་ར་ ཉེན་སྐྱོབ་གནམ་གྲུ་ ཧེ་ལི་ཀོབ་ཊར་ཚུ་ནང་སྦེ་ སྨན་ཁང་ཚུ་ནང་ བསྐྱལ་ཡོདཔ་སྦེ་ སུ་ཡིཛ་ཁྲིམས་སྲུང་འགག་སྡེ་གིས་ གསལ་བཤད་འབད་ནུག།
བི་བི་སི། སྤྱི་ཟླ་ ༩ པའི་ཚེས་ ༡༡ ལུ་ ཡུ་ཀེ་རེན་གྱི་ འགོ་དཔོན་ཚུ་གིས་ བཤད་དོ་བཟུམ་འབད་བ་ཅིན་ ར་ཤི་ཡའི་ མཁའ་དམག་རང་སྒུལ་འཕྲུལ་ཆས་ ཌྲཱོན་གྱི་ཐོག་ལས་ ཡུ་ཀེ་རེན་གྱི་ ལུང་ཕྱོགས་ཁྲོམ་སྡེ་ ཌི་ནི་པོ་རོ་པེ་ཊོབ་ལུ་ཡོད་མི་ པབ་ལོ་རཱཌ་ཟེར་སར་ ཚོང་འབྲེལ་སྒྲིང་ཁྱིམ་ཅིག་ལུ་ གནོད་འཚུབ་བཀལ་ཡོདཔ་ལས་ མི་ ༥ ལུ་ ཤི་རྐྱེན་དང་ གཞན་མི་ ༦༧ ལུ་ རྨ་སྐྱོན་བྱུང་ནུག་ཟེར་ཨིན་པས། གནོད་འཚུབ་དེ་ཡང་ གནམ་ཉིན་མར་ བཀལ་ཡོདཔ་ལས་ དེ་བསྒང་ ཁྲོམ་ལམ་བདའ་སྟེ་ མི་མང་དང་ ཚོང་ཁང་ སྣུམ་འཁོར་ཚུ་ མང་རབས་ཅིག་ རྒྱུན་འགྲུལ་འཐབ་སྟེ་ཡོད་པའི་སྐོར་ལས་ ཡུ་ཀེ་རེན་གྱི་ ནང་སྲིད་བློན་པོ་ ཨི་ཝཱན་ཝི་ཧིབ་སི་ཀི་གིས་ གསལ་བཤད་འབད་ནུག།
བི་བི་སི། སྤྱི་ཟླ་ ༩ པའི་ཚེས་ ༡༠ ལུ་ ཕི་ལི་པིན་གྱི་ མཚོ་མཐའི་སྲུང་རྒྱབ་ཀྱིས་ བཤད་དོ་བཟུམ་འབད་བ་ཅིན་ ཕི་ལི་པིན་གྱི་ གྲུ་ཆུང་ཅིག་ལུ་ མེ་རྐྱེན་བྱུང་ཡོདཔ་ལས་ མི་གྲངས་ ༥ ལུ་ ཤི་རྐྱེན་དང་ གཞན་མི་ ༨༦ དེ་ཅིག་ བྱང་སྟོར་ཤོར་ནུག་ཟེར་ཨིན་པས། དེ་ཡང་ ཕི་ལི་པིནགྱི་རྒྱལ་ས་ མ་ནི་ལ་ལས་ འགྲུལ་པ་ ༡༡༧ དང་ ལས་བྱེདཔ་ ༡༧ འབག་སྟེ་ འགྲུལ་བསྐྱོད་འབད་མི་ གྲུ་ཆུང་ཨེམ་ཝི་ ཇུན་ཨེཛ་ཊར་དེ་ ཀོ་རཱོན་ལུ་ཡོད་མི་ བལྟ་བཤལ་ས་ཁོངས་ཀྱི་ ཉེ་འདབས་ལུ་ལྷོདཔ་ད་ མེ་རྐྱེན་བྱུང་ཡོདཔ་སྦེ་བཀོད་ནུག།
ཨཱལ་ཇ་ཛི་ར། སྤྱི་ཟླ་ ༩ པའི་ཚེས་ ༩ ལུ་ ཨོ་མཱན་མཚོ་ཁུག་དང་ ཁ་རག་མཚོ་གླིང་གི་ ཉེ་འདབས་ལུ་ ཨི་རཱན་གྱི་ མར་ཁུ་འབག་མི་ གྲུ་གཟིངས་ ༥ ལུ་ གནོད་འཚུབ་བཀལ་ཡོདཔ་ད་ དེ་ཡང་ ཨི་རཱན་གྱིས་ ཡུ་ཨེཛ་གི་ དམག་གྲུ་ཅིག་ལུ་ ནུས་ཤུགས་ཅན་གྱི་ མི་ཛ་ཡེལ་ཐོག་ལས་ གནོད་འཚུབ་བཀལ་བའི་ དགྲ་ལན་ལུ་ཨིན་པས། དེ་སྦེ་ དགྲ་ལན་འཇལ་མི་དེ་ཡང་ སྤྱི་ཟླ་ ༩ པའི་ཚེས་ ༨ ལུ་ ཇོར་ཌེན་གྱི་ས་གནས་ ཨཱལ་ཨཱཛ་རག་ལུ་ཡོད་མི་ ཡུ་ཨེཛ་གི་ དམག་སྒར་ལུ་ མི་ཛ་ཡེལ་ཚུ་གི་ཐོག་ལས་ གནོད་འཚུབ་བཀལ་ཡོདཔ་མ་ཚད་ ལུང་ཕྱོགས་དེ་ནང་ཡོད་མི་ ཡུ་ཨེཛ་གི་ གྲུ་གཟིངས་ ༢ དང་ ས་སྣུམ་སྐྱེལ་འདྲེན་འབད་མི་ གྲུ་གཟིངས་ ༨ ལུ་ཡང་ གནོད་འཚུབ་བཀལ་ཡོདཔ་ལས་ གནོད་སྐྱོན་སྦོམ་སྦེ་ར་ བྱུང་ནི་དེ་གིས་ཨིན་ཟེར་བཀོད་ནུག།