World News
ཨི་རཱན་རྒྱལ་ཁབ་ནང་ ས་ཡོམ་གྱིས་ མི་གྲངས་ ༥ ལུ་ ཤི་རྐྱེན་བྱུང་ཡོདཔ།
ཨེ་བི་སི།སྤྱི་ཟླ་ ༧ པའི་ཚེས་ ༢ ལུ་ ཨི་རཱན་རྒྱལ་ཁབ་ཀྱི་ ལྷོ་ཕྱོགས་ཁ་ཐུག་ལུ་ ས་ཡོམ་ཤུགས་ཚད་ མེག་ནི་ཅཱུད་ ༦.༣ འབད་མི་ཅིག་ རྐྱབ་ཡོདཔ་ལས་ མི་གྲངས་ ༥ དེ་ཅིག་ལུ་ ཤི་རྐྱེན་དང་ ༤༤ དེ་ཅིག་ལུ་ རྨ་སྐྱོན་བྱུང་ཡོདཔ་ཨིན་པས།དེ་ཡང་ མི་སེར་ ༣༠༠ དེ་ཅིག་སྡོད་མི་ ཧོར་མི་གན་མངའ་སྡེའི་ ས་ཡེག་ཁོཤ་ཟེར་མི་ གཡུས་ཚན་ཅིག་ནང་ བྱུང་ཡོདཔ་ལས་ སྲོག་སྐྱབས་འབད་མི་ སྡེ་ཚན་ཚུ་ བགོ་བཀྲམ་འབད་ནུག།དེ་སྦེ་ རྣམ་རྟོག་ལང་སི་སི་སྦེ་རྐྱབ་མི་ ས་ཡོམ་དེ་གིས་ སྒྲིང་ཁྱིམ་ཚུ་དང་ གཞི་རྟེན་མཁོ་ཆས་ མང་རབས་ཅིག་ལུ་ གནོད་སྐྱོན་བྱུང་ཡོདཔ་མ་ཚད་ ཁྱིམ་མཚེས་རྒྱལ་ཁབ་ ལེ་ཤ་ཅིག་གི་ནང་ཡང་ ས་ཡོམ་རྐྱབ་ཡོད་པའི་ ཚོར་སྣང་བྱུང་ནུག་ཟེར་ བཀོད་འདུག་པའི་གནས་ཚུལ།
