བི་བི་སི།
ར་ཤི་ཡ་གིས་ ཡུ་ཀེ་རེན་ རྒྱལ་ཁབ་ནང་ བཙན་འཛུལ་འབད་མི་ལུ་ གདོང་ལན་འབད་ནིའི་དོན་ལས་ ནེ་ཊོ་རྒྱལ་ཁབ་ཚུ་གི་བར་ན་ ཞལ་འཆམ་བྱུང་ཡོདཔ་བཞིན་དུ་ ཡུ་ཨེཛ་གིས་ ཡུ་རོབ་རྒྱལ་ཁབ་ཚུ་ནང་ དམག་སྡེ་ཡར་སེང་འབད་ནི་ཨིན་པས།
དེ་འབདཝ་ལས་ པོ་ལེན་རྒྱལ་ཁབ་ནང་ གཏན་འཇགས་ཀྱི་ དམག་མིའི་ཡིག་ཚང་ཅིག་ གཞི་བཙུགས་འབད་ཞིནམ་ལས་ ཡུ་ཨེཛ་གི་ དམག་གྲུ་གསརཔ་ཚུ་ སི་པེན་ལུ་དང་ མཁའ་དམག་གནམ་གྲུ་ཚུ་ ཡུ་ཀེ་ལུ་འགྱོ་ནི་དང་ ས་ཐོག་དམག་མི་ཚུ་ རོ་མ་ནི་ཡ་ལུ་ འགྱོ་ནི་ཨིན་པས།
ཡུ་ཨེཛ་གི་སྲིན་འཛིན་ ཇཱོ་བའི་ཌེན་གྱིས་ ནེ་ཊོ་ཟེར་ ཡུ་རོབ་རྒྱལ་ཁབ་ ༣༠ ལྷགཔ་ཅིག་ གཅིག་བསྡོམས་ཚོགས་པ་དེ་ཁར་ དུས་ཨ་རྟག་བ་ཡང་ལྷགཔ་སྦེ་ ད་རེས་ དགོས་མཁོ་སྦོམ་སྦེ་ར་ འཐོན་སོང་ནུག་ཟེར་ཨིན་པས།
དེ་བཟུམ་མའི་ འཆར་གཞི་གསརཔ་དེ་ ར་ཤི་ཡ་གིས་ བཙན་འཛུལ་འབད་མི་ལུ་ གདོང་ལན་འབད་ནིའི་དོན་ལས་ཨིནམ་ད་ ད་ཚུན་ དམག་མི་རུ་ཁག་ ༤༠,༠༠༠ ཡོད་ས་ལས་ ༣༠༠,༠༠༠ ལྷགཔ་ཅིག་ལུ་ ཡར་སེང་ཐོག་ལས་ སང་ཕོད་ཀྱི་དོན་ལུ་ གྲ་སྒྲིག་འབད་དེ་ བཞག་ནི་ཨིན་པས།
དབུ་ཁྲིད་ཞལ་འཛོམས་གནང་ས་ སི་པེན་གྱི་རྒྱལ་ས་ མ་ཌེཌ་ལུ་ སྲིད་འཛིན་བའི་ཌེན་གྱིས་ ས་དམག་དང་ མཁའ་དམག་ མཚོ་དམག་ཚུ་གི་ཐོག་ལས་ ནེ་ཊོའི་མངའ་འོག་ལུ་ཡོད་མི་ ས་ཕྱོགས་ག་ར་ སྒྲིང་སྒྲིང་བཟོ་ནི་ཨིནཔའི་སྐོར་ལས་ གསལ་བཤད་གནང་ནུག་ཟེར་ བཀོད་འདུག་པའི་གནས་ཚུལ།
