National News
མི་དབང་ཞབས་ལུ་ རྒྱ་གར་གཞུང་ཚབ་ཀྱིས་ ངོ་སྤྲོད་ཡིག་ཆ།
སྤྱི་ཟླ་ ༨ པའི་ཚེས་ ༢༠ ལུ་ བཀྲ་ཤིས་ཆོས་རྗོང་ནང་སྦེ་ འབྲུག་ལུ་ རྒྱ་གར་གཞུང་ཚབ་གསརཔ་ སུ་དྷ་ཀར་ ད་ལེ་ལ་གིས་ མི་དབང་མངའ་བདག་རིན་པོ་ཆེ་མཆོག་ལུ་ གཞུང་ཚབ་ངོ་སྤྲོད་ཀྱི་ ཡིག༌ཆ་ཚུ་ཕུལ་ནུག།གཞུང་ཚབ་དེ་ ངོ་སྤྲོད་ཡིག་ཆའི་ རྟེན་འབྲེལ་གྱི་དོན་ལུ་ བཀྲིས་ཆོས་རྫོང་ནང་ རང་ལུགས་ཆིབས་གྲལ་ཐོག་ལས་ གདན་འདྲེན་ཞུ་ཡོདཔ་ཨིན་པས།དེ་སྦེ་ གཞུང་ཚབ་ངོ་སྤྲོད་ཀྱི་ རྟེན་འབྲེལ་མཇུག་བསྡུ་བའི་ཤུལ་ལུ་ མི་དབང་མངའ་བདག་རིན་པོ་ཆེ་དང་ མི་དབང་རྒྱལ་བཙུན་མཆོག་གིས་ གཞུང་ཚབ་དང་ ཨམ་ནམ་ར་ཏ་ ད་ལེ་ལ་གིས་གཙོས་པའི་ རྒྱ་གར་གྱི་ འཐུས་མི་སྡེ་ཚན་དང་ མཇལ་ཕྲད་མཛད་གནང་ནུག།གཞུང་ཚབ་སུ་དྷ་ཀར་ ད་ལེ་ལ་དེ་ འབྲུག་ལུ་ གཞུང་ཚབ་སྦེ་ མ་བསྐོས་པའི་ཧེ་མར་ ཡུ་ཨེཛ་ཝ་ཤིང་ཊཱོན་ལུ་ རྒྱ་གར་གཞུང་ཚབ་ཡིག་ཚང་ནང་ སྐུ་ཚབ་འོགམ་སྦེ་ ཕྱག་ཞུ་ཡོདཔ་ཨིན་པའི་གནས་ཚུལ།