ལ་ཡག་ལུ་ཡོད་མི་ ཁྱེགས་མཚོ་ཤིང་རྟ་ཕུ་མཚོ་རྦེད་དེ་ ཆུ་རུད་ཐོན་ཡོདཔ་ལས་ ས་གནས་ཁག་གི་ནང་གནོད་སྐྱོན།

པདྨ་དབང་འདུས།
སྤྱི་ཟླ་ ༡༠ པའི་ཚེས་ ༢༩ གི་དྲོ་པ་ ལ་ཡག་ལུ་ཡོད་པའི་ ཁྱེགས་མཚོ་ཤིང་རྟ་ཕུ་མཚོ་དེ་ རྦེད་པའི་རྐྱེན་གྱིས་ མོ་ཆུ་དང་ སྤུ་ན་གཙང་ཆུ་བདའ་སྟེ་ ཆུ་རུད་ཐོནམ་ལས་ ས་གནས་ཁག་མ་འདྲཝ་ཚུ་ནང་ གནོད་སྐྱོན་བྱུང་ཡོདཔ་ད་ དེ་ཡང་ མགར་ས་ལུ་འབད་བ་ཅིན་ ལྟག་རྩེ་དམག་ཁང་དང་ མགར་ས་ཚ་ཆུ་ལུ་ གནོད་སྐྱོན་སྦོམ་སྦེ་ར་ བྱུང་ཡོདཔ་ཨིན་པས།
ལྟག་རྩེ་དམག་ཁང་ལུ་ གསར་བབསྐྲུན་འབད་ཡོད་པའི་ མི་མང་ཆབ་གསང་དང་ མཛོད་ཁང་ཚུ་ཚུ་ མེདཔ་བཏང་པའི་ཁར་ མགར་ས་དང་ ལ་ཡག་བར་ནའི་ འཁོར་ལམ་ལུ་ཡང་ གནོད་སྐྱོན་བྱུང་ནུག།
མགར་ས་ཚ་ཆུ་ལུ་ མི་མང་ཚ་ཆུ་སྦང་སའི་ ཆུ་རྫིང་ ༢ དང་ ཆེ་མཐོ་སྦང་སའི་ ཆུ་རྫིང་ཚུ་དང་སྦྲགས་ཏེ་ ཆབ་གསང་དང་ ངལ་སངས་ས་གོ་ ཐོག་གཡབ་ཅན་གྱི་ས་གོ་ ཆུ་སྦང་སའི་རྡོ་ཁྱིམ་ གོ་ལ་སོར་སའི་ཁང་ཁྱིམ་ ཚོང་གི་འབྲེལ་སྟེགས་ཚུ་ ཕྱགས་བདའ་ཡོདཔ་མ་ཚད་ སྣུམ་འཁོར་བཞག་ཐང་དང་ རྒྱལ་འཛིན་མགྲོན་ཁྱིམ་གྱི་ ཉེ་འདབས་ལུ་ཡོད་མི་ ཆབ་གསང་ཡང་ མེདཔ་བཏང་ཡོདཔ་ཨིན་པས།
ཁྱེགས་མཚོ་རྦེད་པའི་སྐོར་ལས་ ལ་ནོར་འཚོ་མི་ཚུ་གིས་ ཉེན་བརྡ་ཚུ་ མི་སྡེ་བརྡ་བརྒྱུད་ཚུ་གི་ཐོག་ལས་ ཁྱབ་སྤེལ་འབད་ཡོདཔ་ད་ ལ་ཡག་དང་ མགར་ས་ལུ་ ཉེན་ཁ་ཅན་གྱི་ ས་ཁོངས་ནང་ཡོད་མི་ཚུ་ ས་གནས་དབང་འཛིན་ཚུ་གིས་ འགོ་འདྲེན་ཐོག་ལུ་ ཉེན་སྲུང་ལྡན་པའི་ ས་ཁོངས་ཚུ་ནང་བསྐྱལ་ནུག།
སྤུ་ན་ཁ་ལུ་འབད་བ་ཅིན་ མོ་ཆུ་དང་ སྤུ་ན་གཙང་ཆུ་བདའ་སྟེ་ སྡོད་མི་ཚུ་གི་དོན་ལུ་ བརྒྱུད་འཕྲིན་དང་ སྡེ་ཚན་གྲོས་གནས་ མི་སྡེ་བརྡ་བརྒྱུད་ཚུ་གིས་མ་དོ་བར་ ཉེན་བརྡའི་སྒྲ་སྐད་བཏང་སྟེ་ སྔ་གོང་ཉེན་བརྡ་ཚུ་འབད་ཡོདཔ་ཨིན་པས།
དེ་བསྒང་ མི་སྡེ་བརྡ་བརྒྱུད་ཚུ་གི་ཐོག་ལས་ མི་སེར་དང་ དགེ་སློང་ཚུ་ རང་སོའི་སྡོད་ཁྱིམ་ནང་ལས་ ཐོན་འགྱོ་ས་དང་ དབང་འདུས་ཕོ་བྲང་ བ་འཇོའི་མི་སེར་ཚུ་ སྣུམ་འཁོར་ནང་འཛུལ་ཏེ་ ས་ཁ་མཐོ་སར་སོང་ནུག།
ཨིན་རུང་ སྤུ་ན་ཁ་ ལྕང་ཡུལ་ལུ་ སྡོད་ཁྱིམ་ ༢ ཀྱི་ནང་ ཆུ་འཛུལ་ཏེ་ མེདཔ་བཏང་པའི་ཁར་ རེད་བརྔ་བཞག་མི་ཚུ་ ཆུ་གིས་སྦང་ཡོདཔ་ད་ ལཱ་ཁུ་ལུ་ སྒོ་ནོར་ ༨ བྱང་སྟོར་ཤོར་ས་ལས་ ༣ ཤི་ཡོདཔ་སྦེ་ མཐོང་ཡོདཔ་ཨིན་པས།
འཛོམས་གླིང་ཐང་ལུ་ཡང་ ཆུ་ཞིང་ཨེ་ཀར་ ༢ ལྷགཔ་ཅིག་ མེདཔ་བཏང་པའི་ཁར་ འཁོར་ལམ་ཚུ་བསུབ་སྟེ་ རྒྱུན་འགྲུལ་འཐབ་མ་ཚུགསཔ་ བཟོ་ཡོདཔ་ད་ དགོན་ཤར་རི་རྒེད་འོག་ནང་ གཞན་གོ་ས་སྤྱི་འོག་དང་ སྒུམ་སྒང་ཡོར་བོ་སྤྱི་འོག་ ༢ ཀྱི་བར་ན་ཡོད་མི་ ཟམ་ ༢ མེདཔ་བཏང་ཡོདཔ་མ་ཚད་ ཡེ་སྦི་ལབ་རྩ་ལུ་ཡང་ རྐང་ཟམ་ ༡ དང་ ཆུ་ཞིང་ཚུ་ ཕྱགས་བདའ་ནུག།
ཆུ་རུད་དེ་གིས་ འཁོར་ལམ་དག་པ་ཅིག་ར་ མེདཔ་བཏང་ཡོདཔ་ལས་ སྤུ་ན་ཁ་དང་ མགར་ས་ལས་ མི་སེར་ལེ་ཤ་ཅིག་ར་ དགེ་ལེགས་ཕུག་ དྲན་ཤེས་ཁྲོམ་ཚོགས་ཀྱི་ མཆོད་རྟེན་ ༡༠༨ བཞེངས་སར་ འགྱོ་མ་ཚུགས་པར་ ལུས་ཡོདཔ་མ་ཚད་ བལྟ་བཤལ་ ༡༣༠ དེ་ཅིག་ཡང་ འཁོར་ལམ་མེདཔ་ཤོར་མི་ལུ་བརྟེན་ཏེ་ ལ་ཡག་ལུ་ ལུས་ཡོདཔ་ཨིན་པས།
བལྟ་བཤལ་པ་ཚུ་གི་དོན་ལུ་ བལྟ་བཤལ་ལས་ཁུངས་དང་ བལྟ་བཤལ་ཚོང་སྡེ་ཚུ་གིས་ འགོ་འདྲེན་འཐབ་སྟེ་ བལྟ་བཤལ་པ་ཚུ་གི་ ཉེན་སྲུང་ངེས་གཏན་ བཟོ་བའི་ཁར་ བལྟ་བཤལ་ལས་ཁུངས་ཀྱིས་ ཁེ་གྱོང་ཕོག་མི་ཚུ་ལུ་ ཆུ་རུད་ཀྱིས་ གནོད་སྐྱོན་བྱུང་སའི་ ས་གོ་ཚུ་ནང་ རྐང་འགྲུལ་ཚུ་ བག་ཐོན་གྱི་སྒོ་ལས་ ལག་ལེན་འཐབ་དགོ་པའི་ སླབ་བྱ་ཚུ་བྱིན་ནུག།
ཆུ་རུད་ཐོན་པའི་ཤུལ་ལས་ སྤྱི་ཟླ་ ༡༠ པའི་ཚེས་ ༣༠ ལུ་ ལ་ཡག་རྒཔོ་གིས་ བཤད་དོ་བཟུམ་འབད་བ་ཅིན་ མི་ལུ་ཤི་རྐྱེན་བྱུང་ཡོད་པའི་ ལོ་རྒྱུས་ཚུ་ མ་གོ་ཟེར་ཨིན་རུང་ གཡག་འཚོ་མི་ཚུ་དང་ ཁོང་གི་སྒོ་ནོར་སྐོར་ལས་ ཚ་གྱང་ཡོད་ལུགས་ཚུ་ བཤད་ཡོདཔ་ཨིན་པས།
ད་རེས་ ཆུ་རུད་ཀྱི་ གནོད་སྐྱོན་ཚུ་ དབྱེ་ཞིབ་དང་ མཚོ་གི་གནས་སྟངས་དེ་ཡང་ བལྟ་རྟོག་འབདཝ་འབད་ས་ར་ཡོདཔ་ད་ ད་རེས་ གནས་སྐབས་གཅིག་ ལམ་འགྲུལ་གྱི་ དཀའ་ངལ་ལུ་བརྟེན་ཏེ་ མི་སྡེ་དང་ གཞི་རྟེན་མཁོ་ཆས་ མེདཔ་བཏང་ཡོད་མི་ཚུ་ནང་ འགྱོ་མ་ཚུགས་པར་ཡོདཔ་ཨིན་པའི་གནས་ཚུལ།