མི་དབང་མངའ་བདག་རིན་པོ་ཆེ་མཆོག་ གསེར་ཁྲིར་མངའ་གསོལ་ཞུ་སྟེ་ མི་ལོ་ ༡༨ འཁོར་བའི་དུས་སྟོན།

མགོན་པོ་རྡོ་རྗེ།
སྤྱི་ཟླ་ ༡༡ པའི་ཚེས་ ༡ ལུ་ འབྲུག་གི་སྤྱི་ནོར་དམ་པ་ མི་དབང་མངའ་བདག་རིན་པོ་ཆེ་མཆོག་ གསེར་ཁྲིར་མངའ་གསོལ་ཞུ་སྟེ་ མི་ལོ་ ༡༨ འཁོར་བའི་ དུས་སྟོན་ཁྱད་པར་ཅན་ཅིག་ཨིནམ་ད་ དེ་ཡང་ སྤྱི་ལོ་ ༢༠༠༨ སྤྱི་ཟླ་ ༡༡ པའི་ཚེས་ ༡ ལུ་ སྤུངས་ཐང་བདེ་བ་ཆེན་པོའི་ཕོ་བྲང་ནང་ ཞབས་དྲུང་མ་ཆེན་རིན་པོ་ཆེའི་ སྐུ་མདུན་ལས་ དར་མཛོད་སྣེ་ལྔ་ བཞེས་པའི་ཤུལ་ལུ་ ཆིབས་གྲལ་བཙར་ཏེ་ སྤུངས་ཐིམ་དགེ་འདུན་འདུས་པའི་ ཀུན་དགའ་རྭ་བའི་ནང་ གདན་འདྲེན་ཞུ་ནུག།
དེ་སྦེ་ ཀུན་རྭའི་ནང་ གདན་འདྲེན་ཞུ་བའི་ཤུལ་ལུ་ རྗེ་མཁན་ཁྲི་རབས་ ༧༠ པ་ སྐྱབས་རྗེ་རྗེ་མཁན་རིན་པོ་ཆེ་ སྤྲུལ་སྐུ་འཇིགས་མེད་ཆོས་གྲགས་མཆོག་གིས་ སྐུ་གསུང་ཐུགས་རྟེན་གྱིས་གཙོས་པའི་ བཀྲ་ཤིས་རྟགས་བརྒྱད་དང་ བཀྲ་ཤིས་རྫས་བརྒྱད་ལ་སོགས་པ་ཚུ་ ཕུལ་གནང་སྟེ་ བཞུགས་གྲལ་ཕུན་སུམ་ཚོགས་པའི་ རྟེན་འབྲེལ་རྒྱས་ཤིང་རྒྱསཔ་སྦེ་ མཛད་གནང་ཡོདཔ་ཨིན་པས།
དེ་ལས་ སྤྱི་ཟླ་ ༡༡ པའི་ཚེས་ ༣ ལུ་ བཀྲ་ཤིས་ཆོས་རྫོང་གི་ གསེར་ཁྲི་ཁང་བཟང་དང་ དགེ་འདུན་འདུས་པའི་ ཀུན་རྭའི་ནང་སྦེ་ བཞུགས་གྲལ་ཕུན་སུམ་ཚོགས་པའི་ རྟེན་འབྲེལ་རྒྱས་པ་ མཛད་གནང་ཡོདཔ་ད་ སྤྱི་ཟླ་ ༡༡ པའི་ཚེས་ ༤ ལས་ ༦ ཚུན་ ཉིན་གྲངས་ ༣ གྱི་རིང་ལུ་ ཅང་གླིང་མའི་ཐང་ནང་ མི་སེར་ཚུ་དང་ཅིག་ཁར་ དགའ་སྟོན་རྟེན་འབྲེལ་མཛད་དེ་ འཛམ་གླིང་རྒྱལ་ཁབ་ཁག་གི་ སྐུ་མགྲོན་ཚུ་གིས་གཙོས་པའི་ མི་སེར་ཚུ་ག་ར་ གླུ་གར་དང་ རྩེད་རིགས་སྣ་ཚོགས་ཀྱིས་ ཚིམས་པར་མཛད་གནང་ནུག།
མི་དབང་མངའ་བདག་རིན་པོ་ཆེ་མཆོག་ གསེར་ཁྲིར་ཕེབས་ཞིནམ་ལས་ཚུར་ མི་སེར་གྱི་ སྐྱིད་སྡུག་དང་ དཔལ་འབྱོར་ཡར་རྒྱས་ཀྱི་དོན་ལུ་ ཉིན་མཚན་མེད་པར་ ཕྱག་ལཱ་ཚུ་ གནང་བཞིན་དུ་ཡོད་པའི་ཁར་ རྒྱལ་ཁབ་ཀྱི་ གྲོང་གཡུས་ཁག་སོ་སོར་ སྐུ་དངོས་སུ་སྦེ་ ཆིབས་བསྐྱོད་གནང་ཐོག་ལས་ མི་སེར་ཚུ་ བདེ་སྐྱིད་ཀྱི་ངང་ལུ་ བཀོད་གནང་སྟེ་ཡོདཔ་ཨིནམ་ མི་མང་ག་ར་གིས་ མཁྱེན་གསལ་ལྟར་དུ་ཨིན་པས།
ག་དེ་སྦེ་ཨིན་རུང་ འབྲུག་གི་ལྷ་མི་སྲིད་སྡེ་ཡོངས་ཀྱི་ བསོད་ནམས་ཀྱི་ བགོ་སྐལ་ལུ་བྱོན་མི་ བྱང་ཆུབ་སེམས་དཔའི་རྣམ་སྤྲུལ་ མི་དབང་མངའ་བདག་རིན་པོ་ཆེ་མཆོག་ སྐུ་ཚེ་ཞབས་པད་ བསྐལ་བརྒྱར་བརྟན་ཏེ་ མཛད་པ་འཕྲིན་ལས་ཚུ་ ཡར་ངོའི་ཟླཝ་བཞིན་དུ་ གོང་ལས་གོང་དུ་འཕེལ་བའི་ བཀྲིས་སྨོན་འདུན་ ཞུ་དགོཔ་འདི་ གལ་ཅན་ཅིག་ཨིན་པའི་གནས་ཚུལ།