མི་དབང་མངའ་བདག་རིན་པོ་ཆེ་དང་ མི་དབང་རྒྱལ་བཙུན་ མི་དབང་སྲས་སྲོས་ཚུ་ དགེ་ལེགས་ཕུག་ལུ་ བྱོན་གནང་ཡོདཔ།

པདྨ་དབང་འདུས།
སྤྱི་ཟླ་ ༡༠ པའི་ཚེས་ ༢༥ ལུ་ མི་དབང་མངའ་བདག་རིན་པོ་ཆེ་མཆོག་དང་ མི་དབང་རྒྱལ་བཙུན་མཆོག་གིས་ དབུ་གཙོས་པའི་ མི་དབང་རྒྱལ་སྲས་དང་ མི་དབང་རྒྱལ་སྲསམོ་ལྷན་རྒྱས་ཚུ་ སྤྱི་ཟླ་ ༡༡ པའི་ཚེས་ ༡ ལུ་ རྒྱལ་བ་ལྷ་ལས་བབས་པའི་ དུས་བཟང་ཁྱད་པར་ཅན་གྱི་ཉིན་མར་ འབྱུང་རབས་ཅན་གྱི་ བྱང་ཆུབ་མཆོད་རྟེན་ ༡༠༨ གསར་བཞེངས་ཀྱི་ཧེ་མ་ དགེ་ལེགས་ཕུག་ དྲན་ཤེས་ཁྲོམ་ཚོགས་ནང་ ཕྱག་ཕེབས་གནང་ནུག།
བྱང་ཆུབ་མཆོད་རྟེན་ གསར་བཞེངས་ཀྱི་ མཐའ་བཅད་གྲ་སྒྲིག་དོན་ལུ་ ཁས་བླངས་པ་ སྟོང་ཕྲག་ལས་བཅད་མི་ཚུ་གིས་ བརྩོན་ཤུགས་ཐོག་ལས་ ཞབས་ཏོག་ཚུ་ ཞུ་བའི་བསྒང་ཡོདཔ་ད་ འབྲུག་རྒྱལ་ཁབ་མཐའ་དབུས་མེད་པའི་ མི་སེར་ཚུ་ འབྱུང་རབས་ཅན་གྱི་ དུས་སྟོན་ནང་ གྲལ་གཏོགས་འབད་བར་ དགེ་ལེགས་ཕུག་ལུ་ འགྲུལ་བསྐྱོད་འབདཝ་ཨིན་པས།
དུས་སྟོན་དེ་ཁར་ དགེ་ལེགས་ཕུག་ལུ་ མི་གྲངས་ ༢༠༠,༠༠༠ ལས་ལྷག་སྟེ་ སྤུངས་འཛོམས་འབད་ནི་བཟུམ་ཅིག་ཡོདཔ་ད་ དེ་ཡང་ འབྲུག་གི་འབྱུང་རབས་ནང་ མི་སེར་སྤུངས་འཛོམས་ཀྱི་ གྲངས་ཚད་མཐོ་ཤོས་ཅིག་ འོང་ནི་ཨིན་པས་ཟེར་བཀོད་ནུག།
དེ་བསྒང་ མི་དབང་སྐུ་འཁོར་ལྷན་རྒྱས་དང་ ནང་པའི་བླ་སློབ་ རྒྱལ་སྤྱིའི་སྐུ་མགྲོན་ཚུ་གིས་ ཉིནམ་གཅིག་ནང་ མཆོད་རྟེན་ ༡༠༨ གསར་བཞེངས་ཀྱི་དོན་ལུ་ ཐུགས་སྨོན་གནང་ནི་དང་ དུས་སྟོན་བརྩི་སྲུང་མཛད་པར་ བྱོན་གནང་ནི་ཨིན་པས།
དེ་བཟུམ་མའི་ ངོ་མཚར་རྨད་དུ་བྱུང་བའི་ ཕྱག་ལཱ་བཟང་པོ་ལུ་བརྟེན་ཏེ་ གཅིག་སྒྲིལ་ཅན་གྱི་ ཡིད་ཆེས་དང་ དད་དམ་ ཞབས་ཏོག་ཚུ་གི་སྒོ་ལས་ མི་སེར་ཆེ་འབྲིང་ཆུང་གསུམ་ གཅིག་ཁར་སྤུངས་འཛོམས་འབད་ནི་དེ་ དགེ་ལེགས་ཕུག་ དྲན་ཤེས་ཁྲོམ་ཚོགས་དང་ རྒྱལ་ཁམས་ཀྱི་ འབྱུང་རབས་ནང་ གལ་གནད་ཆེ་བའི་ དུས་སྐབས་ཅིག་སྦེ་ གནས་ནི་ཨིན་པའི་གནས་ཚུལ།