མི་དབང་མངའ་ཞབས་མཆོག་གིས་ རྒྱལ་འཛིན་ས་ཁ་མཐོ་སའི་ དུས་སྟོན་ནང་ དབུ་བཞུགས་མཛད་གནང་ཡོདཔ།

སྤྱི་ཟླ་ ༡༠ པའི་ཚེས་ ༢༣ ལུ་ མི་དབང་མངའ་བདག་རིན་པོ་ཆེ་མཆོག་གིས་ མགར་ས་རྫོང་ཁག་ ལ་ཡག་ལུ་ རྒྱལ་འཛིན་ས་ཁ་མཐོ་སའི་ དུས་སྟོན་ ༢༠༢༦ པའི་ནང་ དབུ་བཞུགས་མཛད་གནང་ནུག།
དུས་སྟོན་དེ་ཡང་ སྤྱི་ཟླ་ ༡༠ པའི་ཚེས་ ༢༣ དང་ ༢༤ གི་བར་ན་ བརྩི་སྲུང་འབད་དོ་ཡོདཔ་ད་ དུས་སྟོན་བརྩི་སྲུང་ནང་ གླང་མགོ་ཐང་ མཐའ་བསྐོར་ཏེ་ གཡག་སྤུ་ལས་གྲུབ་པའི་གུར་ཚུ་ སྤུབས་ཡོད་མིའི་ནང་ལས་ ས་ཁ་མཐོ་སའི་ བཟའ་འཐུང་དང་ ས་གནས་ཀྱི་ ཐོན་སྐྱེད་ཚུ་ འགྲེམ་སྟོན་འབད་ནི་དང་གཅིག་ཁར་ གླུ་གར་དང་ སྒོ་ནོར་འགྲེམ་སྟོན་ རྟ་རྒྱུགས་ཚུ་ཡང་ འགོ་འདྲེན་འཐབ་ཡོདཔ་ཨིན་པས།
དུས་སྟོན་དེ་ མི་དབང་མངའ་བདག་རིན་པོ་ཆཆེ་མཆོག་གི་ བཀའ་རྒྱ་དང་འཁྲིལ་ཏེ་ ས་ཁ་མཐོ་སའི་ ལམ་སྲོལ་གོང་འཕེལ་དང་ མི་སྡེ་ཚུ་གི་ འཚོ་བའི་གནས་སྟངས་ལུ་ རྒྱབ་སྐྱོར་གྱི་དོན་ལས་ སྤྱི་ལོ་ ༢༠༡༦ ལུ་ གཞི་བཙུགས་གནང་ནུག།
དུས་དེ་ལས་ཚུར་ དུས་སྟོན་དེ་ འབྲུག་མི་དང་ རྒྱལ་སྤྱིའི་བལྟ་བཤལ་པ་ཚུ་གི་དོན་ལུ་ ས་ཁ་མཐོ་སའི་ ཁྱད་ཆོས་ཅན་གྱི་ ལམ་སྲོལ་ཉམས་མྱོང་གི་དོན་ལུ་ ཡོངས་གྲགས་ཅན་གྱི་ དུས་སྟོན་ཅིག་ལུ་ གྱུར་ཏེ་ཡོདཔ་ཨིན་པས།
དུས་ཅི་གི་ དུས་སྟོན་ནང་ ཧི་མ་ལ་ཡའི་གཡག་ལུ་ འཚོ་བ་རྟེན་པའི་ ཡོངས་འབྲེལ་གྱི་ གྲོས་གནས་ཡང་ ཚུལ་མཐུན་སྦེ་ འགོ་བཙུགས་གནང་ཡོདཔ་ད་ དེ་ཡང་ ཧི་མ་ལ་ཡའི་ནང་ གཡག་འཚོ་མི་ མི་སྡེ་ཚུ་གི་དོན་ལུ་ ལུང་ཕྱོགས་ཀྱི་ ཡོངས་འབྲེལ་གྲོས་གནས་སྦེ་ འབྲུག་དང་ རྒྱ་གར་ ནེ་པཱལ་བཅས་ཀྱི་ གཡག་འཚོ་མི་ཚུ་གི་ གཅིག་སྒྲིལ་གོང་འཕེལ་གྱི་ ལས་སྣ་ཅིག་ཨིནམ་ད་ གྲོས་གནས་དེ་གི་ ཡིག་ཚང་དེ་ འབྲུག་ལུ་ གཞི་གནས་འབད་ནི་ཨིནམ་སྦེ་བཀོད་ནུག།
མི་དབང་མངའ་ཞབས་མཆོག་ ལ་ཡག་ལུ་ བཞུགས་པའི་རིང་ལུ་ སྲོས་དང་ གླིང་གཞི་ བཙན་ཏོག་གཡུས་ཚན་ཚུ་ལས་ བཟའ་ཚང་ ༥༧ ལུ་ ཁྱིམ་སའི་སྐྱིད་སྡུག་ཚུ་ གནང་ཡོདཔ་ད་ དེ་གིས་སྦེ་ བཟའ་ཚང་དེ་ཚུའི་ སྡོད་ཁྱིམ་དང་ འཚོ་རྟེན་གྱི་ ཉེན་སྲུང་ལུ་ བཙན་ཐབས་འབྱུང་ནི་ཨིན་པས།
ཧེ་མ་ཡང་ མི་དབང་མཆོག་གིས་ མེ་རག་དང་ སག་སྟེང་ ལ་ཡག་ ལུང་ནག་ནང་ བར་གཤོང་ དར་དཀར་ལ་ཚུ་གི་ བཟའ་ཚང་ ༨༠༠ ལུ་ ཁྱིམ་སའི་སྐྱིད་སྡུག་ཚུ་ གནང་ཡོདཔ་ད་ སྐྱིད་སྡུག་གི་ ས་ཆ་འཇལ་ནི་དང་ བདེན་དཔྱད་འབད་ནི་ ས་ཆ་ཐོ་བཀོད་ཀྱི་ བྱ་སྒོ་ཚུ་ལུ་ རྒྱལ་ཡོངས་ས་ཆ་ལྷན་ཚོགས་ཀྱིས་ ཞབས་ཏོག་ཕུལ་ཡོད་པའི་གནས་ཚུལ།