སྐྱབས་རྗེ་མཆོག་གིས་ རྟ་ལོག་བཤད་གྲྭའི་ དབུ་འཛིན་གསར་བསྐོས་ཐོག་ལུ་ བཀྲིས་ལེགས་དར།
རང་ཟླ་ ༨ པའི་ཚེས་ ༢༥ སྤྱི་ཟླ་ ༡༠ པའི་ཚེས་ ༩ ལུ་ སྐྱབས་རྗེ་རིན་པོ་ཆེ་མཆོག་གིས་ ཐིམ་ཕུ་བཀྲིས་ཆོས་རྫོང་ནང་ ཀྲོང་གསར་སྟག་རྩེ་ལས་ཨིན་མི་ སློབ་དཔོན་དོན་གྲུབ་རྡོ་རྗེ་དེ་ སྤུ་ན་ཁ་ རྟ་ལོག་བཤད་གྲྭའི་ དབུ་འཛིན་སྦེ་ གསར་བསྐོས་ཐོག་ལུ་ བཀྲ་ཤིས་ལེགས་དར་གནང་ནུག། སློབ་དཔོན་དོན་གྲུབ་རྡོ་རྗེ་གིས་ སྐུ་ན་ཆུང་ཀུའི་བསྒང་ལས་ར་ ཀྲོང་གསར་གྲྭ་ཚང་ནང་ འཛུལ་བཞུགས་ཀྱིས་ གཞི་རིམ་ཤེས་ཡོན་ཚུ་ སྦྱངས་ཡོདཔ་མ་ཚད་ ཚང་ཁ་འབྲིང་རིམ་བཤད་གྲྭ་དང་ བཀའ་ལུང་མཐོ་རིམ་བཤད་གྲྭ་ དེ་ལས་ རྟ་མགོ་ནང་པའི་ཆེ་མཐོ་རིག་པའི་ སློབ་གྲྭ་ཚུ་གི་ནང་ལས་ རིམ་པ་བཞིན་དུ་ དགེ་བཤེས་མདོ་སྔགས་སྨྲ་བའི་ འཛིན་གྲྭ་དགུ་པ་ མཐར་འཁྱོལ་ཡོདཔ་ཨིན་པས། དེ་གི་ཤུལ་ལས་ སྐྱབས་རྗེ་ཁྲི་ཟུར་རིན་པོ་ཆེའི་ཞབས་ལས་ ཕྱག་ཆེན་ཆོས་དྲུག་གི་ གདམས་ངག་ཚུ་ཞུ་སྟེ་ ཤར་བདེ་ཆེན་ཆོས་གླིང་ སྒྲུབ་སྡེའི་ནང་ ལོ་གསུམ་ཕྱོགས་གསུམ་གྱི་ ཐུགས་དམ་གནང་ཡོདཔ་མ་ཚད་ ནང་པའི་ཆོས་འབྲེལ་གྱི་ ཞིབ་འཚོལ་ཡང་ མང་རབས་ཅིག་མཛད་ནུག། གོ་གནས་འདི་ མ་བཞེས་པའི་ཧེ་མར་ རྟ་མགོ་གསང་ཆེན་རྡོ་རྗེ་ཐེག་པའི་ སློབ་སྦྱོང་སྤེལ་ཁང་གི་ རིག་འཛིན་སློབ་དཔོན་སྦེ་ ཕྱག་ཞུ་ཡོད་པའི་གནས་ཚུལ།