ར་ཤི་ཡའི་ བཙན་དབང་འོག་ལུ་ཡོད་མི་ ཡུ་ཀེ་རེན་གྱི་ ཁྲོམ་ཁ་ལས་ མི་སེར་ཚུ་ བེ་ལ་རུཛ་ལུ་ལྷོད་ཡོདཔ།

རོའི་ཊརཛ།
སྤྱི་ཟླ་ ༡༠ པའི་ཚེས་ ༣༡ ལུ་ ར་ཤི་ཡའི་ བཙན་དབང་འོག་ལུ་ཡོད་མི་ ཡུ་ཀེ་རེན་གྱི་ཁྲོམ་ ཨོ་ལེཤ་ཀི་ཟེར་ས་ལས་ མི་སེར་ཚུ་ གནམ་གྲུ་ ༤ གི་ནང་སྦེ་ འཕུར་འགྲུལ་འབད་དེ་ ས་གནས་བེ་ལ་རུཛ་ལུ་ལྷོད་ནུག།
དེ་ཡང་ ཡུ་ཨེཛ་གི་ རྒྱབ་སྐྱོར་ཐོག་ལུ་ ར་ཤི་ཡ་དང་ ཡུ་ཀེ་རེན་གྱི་བར་ན་ ལོ་ ༥ ལང་དོ་ཡོད་མི་ ཕྱད་མདའ་དེ་ འགྲོ་བ་མིའི་དོན་ལས་ མཚམས་འཇོག་འབད་བའི་སྐབས་ལུ་ ཨོ་ལེཤ་ཀི་ལས་ བཀྲེས་སྐོམ་གྱི་ སྡུག་བསྔལ་གྱིས་ ཉམས་ཐག་སྟེ་ཡོད་མི་ མི་སེར་བརྒྱ་ལས་བཅད་མི་ཚུ་ ཁྲོམ་དེ་ནང་ལས་ ཐོན་སོང་ཡོདཔ་ཨིན་པས།
ཡུ་ཀེ་རེན་གྱི་སྲིད་འཛིན་ བོ་ལོ་ཌི་མིར་ ཛེ་ལེནཛ་ཀི་དང་ འབྲེལ་ཆགས་ཅན་གྱི་ ཞི་བདེ་བཟོ་མི་ ངོམ་ཌེ་བིཌ་ཨ་ར་ཁ་མི་ཡ་གིས་ གནམ་གྲུ་ ༤ པ་དེ་ གནམ་ཐང་གོ་མེལ་ཟེར་སར་ ཆགས་པའི་ཤུལ་ལས་ ཆུ་ཚོད་དག་པ་ཅིག་ནང་ སྤོ་བཤུད་འབད་མི་ མི་སེར་ཚུ་ ཡུ་ཀེ་རེན་གྱི་ འདུམ་འགྲིག་སྡེ་ཚན་དང་སྦྲགས་ཏེ་ ཨོ་ལེཤ་ཀི་ལས་ ཡུ་ཀེ་རེན་གྱི་ ས་ཁོངས་ནང་ འཕུར་འགྲུལ་འབད་ཡི་ཟེར་བཤད་ནུག།
དེ་གི་ཤུལ་ལུ་ གོ་མེལ་གནམ་ཐང་ལས་ འགྲུལ་འཁོར་བཱཛ་ཚུ་ནང་སྦེ་ ཡུ་ཀེ་རེན་གྱི་ ས་མཚམས་ཁར་ བེ་ལ་རུཛ་གི་ ཤར་ལྷོ་ས་ཁོངས་ནང་ བསྐྱལ་ཡོདཔ་ཨིན་པས།
དེ་བཟུམ་སྦེ་ སྤོ་བཤུད་འབད་མི་ མི་སེར་ཚུ་ ཨོ་ལེཤ་ཀི་ལས་ ཐོན་འགྱོ་བའི་སྐབས་ལུ་ ཕྱད་མདའི་གདོང་ཐུག་གི་ ས་ཁོངས་དེ་ ཀི་ལོ་མི་ཊར་དག་པ་ཅིག་གི་ ས་གནས་ཁར་འབདཝ་ལས་ འགྲུལ་བསྐྱོད་འབད་ནི་ལུ་ཡང་ མགུ་རྙོག་དྲགས་ཅིག་ལུ་ གྱུར་ཡོདཔ་སྦེ་བཀོད་ནུག།
སྤོ་བཤུད་འབད་མི་ཚུ་ ཧེ་མ་ར་ ས་གནས་ཀིར་མི་ཡ་བརྒྱུད་དེ་ ར་ཤི་ཡའི་ཁྲོམ་ ཨ་ན་པ་ཟེར་ས་ལུ་ འགྱོ་དགོཔ་ཐོན་ཡོདཔ་ད་ དཁྲོམ་ེ་ཁ་ལས་ གནམ་གྲུ་ནང་སྦེ་ བེ་ལ་རུཛ་ལུ་ལྷོད་ཡོདཔ་ཨིན་པས།
བེ་ལ་རུཛ་ལས་ ད་རུང་ཡང་ ས་མཚམས་ཀྱི་ ས་ཁོངས་བརྒྱུད་དེ་ ཡུ་ཀེ་རེན་གྱི་ ས་ཁོངས་ནང་ འཕུར་འགྲུལ་འབད་ནི་ཨིན་པས་ཟེར་ བཀོད་འདུག་པའི་གནས་ཚུལ།