དགེ་ལེགས་ཕུག་ལུ་ ཕྱི་མི་ནང་བསྐྱོད་ཀྱི་དོན་ལུ་ རང་འགུལ་གློག་འཕྲུལ་གྱི་ ཐོན་འཛུལ་སྒོ་ར་སྒོ་འབྱེད།

པདྨ་དབང་འདུས།

སྤྱི་ཟླ་ ༡༠ པའི་ཚེས་ ༢༢ ལུ་ དགེ་ལེགས་ཕུག་ དྲན་ཤེས་ཁྲོམ་ཚོགས་ཀྱིས་ ཕྱི་མི་ནང་བསྐྱོད་ཀྱི་དོན་ལུ་ རང་འགུལ་གློག་འཕྲུལ་སྒོ་ར་ སྒོ་འབྱེད་འབད་ཡོདཔ་ད་ དེ་ཡང་ འོས་ཚད་ཡོད་པའི་ འབྲུག་མི་དང་ རྒྱ་གར་གྱི་ མི་སེར་ཚུ་གིས་ འབྲུག་དང་ རྒྱ་གར་གྱི་ ས་མཚམས་བརྒྱུད་དེ་ རྐང་ཐང་སྦེ་ འགྲུལ་བསྐྱོད་སྐབས་ལུ་ རང་སོའི་དངོས་གཟུགས་ཁྱད་རྣམ་ཚུ་ བདེན་དཔྱད་འབད་དེ་ ཐོན་འཛུལ་གྱི་དོན་ལུ་ ཉོག་སེལ་འབད་ནི་གི་ ལམ་ལུགས་འགོ་བཙུགས་ཡོདཔ་ཨིན་པས།

རང་འགུལ་གློག་འཕྲུལ་གྱི་ ཐོན་འཛུལ་སྒོ་ར་དེ་ཡང་ དགེ་ལེགས་ཕུག་ དྲན་ཤེས་ཁྲོམ་ཚོགས་ཀྱི་སྤྱི་འཛིན་ དྲག་ཤོས་ཌོག་ཊར་བློ་གྲོས་ཚེ་རིང་གིས་ འགོ་འབྱེད་མཛད་ཡོདཔ་དང་ སྒོ་འབྱེད་རྟེན་འབྲེལ་དེ་ནང་ འགོ་དཔོན་དང་ མགྱོནམོ་ཚུ་གིས་ཡང་ གྲལ་གཏོགས་འབད་ནུག།

རང་འགུལ་གློག་འཕྲུལ་སྒོ་ར་དེ་གིས་ འགྲུལ་བསྐྱོད་འབད་མི་ཚུ་གི་ ངོ་རྟགས་ཚུ་ ཐོ་བཀོད་གྲུབ་པའི་ རང་སོའི་དངོས་གཟུགས་ ཁྱད་རྣམ་ཚུ་དང་འབྲེལ་ཏེ་ ཞིབ་དཔྱད་ཚུ་འབད་དོ་ཡོདཔ་ད་ འོས་ཚད་ཡོད་པའི་ འགྲུལ་པ་ཚུ་གི་ ཉོག་སེལ་ཚུ་ ནམ་རྒྱུན་གྱི་ ལག་བཟུང་འཕྲུལ་ཆས་ཐོག་ལས་ ཞིབ་དཔྱད་ཚུ་ འབད་མི་དགོ་ནི་ཨིན་པས།

ད་རེས་ཀྱི་ ལམ་ལུགས་གསརཔ་དེ་གིས་ ཉོག་སེལ་ལུ་ སྒུག་དགོ་པའི་ དུས་ཡུན་མར་ཕབ་ འབད་ཚུགས་ནི་ཨིན་པའི་ཁར་ ས་མཚམས་རྒལ་ཏེ་ འགྱོ་ནི་དེ་ཡང་ སྔོན་དཔག་འབད་ཚུགསཔ་ བཟོ་ནི་ཨིནམ་སྦེ་ཡང་ གནས་ཚུལ་གསར་བཏོན་ནང་བཀོད་ནུག།

ལམ་ལུགས་གསརཔ་དང་གཅིག་ཁར་ ཕྱི་མི་ནང་བསྐྱོད་ཀྱི་ སྔར་ཡོད་ཉོག་སེལ་ལམ་ལུགས་ཚུ་ཡང་ རང་འཇགས་ཡོདཔ་ལས་ རང་སོའི་དངོས་གཟུགས་ཁྱད་རྣམ་ ཐོ་བཀོད་མ་འབད་མི་ཚུ་ འཕྲོ་མཐུད་དེ་ར་ འབྲེལ་སྟེགས་ཁར་ཡོད་པའི་ ལས་བྱེདཔ་ཚུ་གིས་ ཞིབ་དཔྱད་ཀྱི་ བྱ་སྒོ་ཚུ་ ལག་ལེན་འཐབ་ནི་ཨིན་པས།

ཐོན་འཛུལ་སྒོ་ར་དེ་ དགེ་ལེགས་ཕུག་ དྲན་ཤེས་ཁྲོམ་ཚོགས་གོང་འཕེལ་གྱི་ ཆ་ཤས་ཅིག་ཨིནམ་ད་ སྒོ་ར་དེ་གིས་ དགེ་ལེགས་ཕུག་དང་ རྒྱ་གར་གྱི་བར་ན་ མི་སེར་ཚུ་གིས་ ཡར་སེང་ཅན་གྱི་ འགྲུལ་བསྐྱོད་ལུ་ ཕན་ཐོགས་ནི་ཨིནམ་སྦེ་བཀོད་ནུག།

འགོ་འབྱེད་རྟེན་འབྲེལ་སྐབས་ལུ་ སྤྱི་འཛིན་གྱིས་འབད་བ་ཅིན་ ཐོན་འཛུལ་སྒོ་ར་དེ་ སྒྲིག་བཀོད་ཙམ་ཅིག་མིན་པར་ རྒྱ་འབྲུག་ས་མཚམས་ཀྱི་བར་ན་ རྒྱུན་འགྲུལ་འབད་མི་ཚུ་གིས་ ཐོ་བཀོད་འབད་ནི་ལུ་ གལ་ཆེ་བའི་ཁར་ ཉེན་སྲུང་བཙན་ཐབས་ཀྱི་དོན་ལུ་ཡང་ཨིན་ཟེར་ བཤད་ཡོདཔ་ཨིན་པས།

དེ་སྦེ་ ཐོན་འཛུལ་སྐབས་ལུ་ ཞབས་ཏོག་གི་ གླ་ཡོན་ཡང་ དུམ་གྲ་རེ་ བཀལ་ནི་ཨིནམ་ད་ མ་གཞི་ གླ་ཡོན་ཆུང་ཀུ་རེ་ བཀལ་བ་ལུ་ མ་དགའ་མི་རེ་ཡང་ འཐོན་སྲིད་རུང་ སྤུས་ཚད་ཅན་གྱི་ མཐུན་རྐྱེན་དང་ འཇོན་སྟབས་ཡོད་པའི་ ཞབས་ཏོག་ཚུ་ སྤྲོད་པ་ལུ་ཡང་ ཐོན་ཁུངས་དགོ་པས་ཟེར་བཀོད་ནུག།

དེ་འབདཝ་ལས་ དྲན་ཤེས་ཁྲོམ་ཚོགས་ཀྱི་ ཁ་ཐུག་ལས་ མི་རེ་རེ་བཞིན་གྱི་དོན་ལུ་ ཞབས་ཏོག་དང་ མཐུན་རྐྱེན་ཚུ་ ལེགས་སྒྱུར་འབད་ནི་དང་འབྲེལ་ཏེ་ མི་མང་གིས་ གོ་རྟོགས་ཀྱི་སྒོ་ལས་ མཉམ་འབྲེལ་དང་ རྒྱབ་སྐྱོར་འབད་གནང་ཟེར་ཨིནམ་ད་ ད་རེས་ ཐོན་འཛུལ་སྒོ་ར་དེ་གིས་ རྒྱལ་འབྲུག་གི་ མི་སེར་ཚུ་ལུ་ ཆ་གནས་ཡོད་པའི་ ཐོན་འཛུལ་གྱི་ དགོས་མཁོ་ཚུ་དང་འཁྲིལ་ཏེ་ ཞབས་ཏོག་ཚུ་ སྤྲོད་དོ་ཡོདཔ་ཨིན་པས།

ཨིན་རུང་ ཕྱི་རྒྱལ་ཁག་གི་ མི་སེར་ཚུ་གི་དོན་ལུ་ མཐུན་རྐྱེན་ཚུ་ རྒྱ་གར་གཞུང་གི་ འབྲེལ་ཡོད་ཡིག་ཚང་ཚུ་དང་ མཉམ་འབྲེལ་ཐོག་ལས་ ཤུལ་ལས་ འགོ་བཙུགས་ནི་དང་ ད་རེས་ སྤྱི་ཟླ་ ༡༡ པའི་ཚེས་ ༡ ལུ་ བྱང་ཆུབ་མཆོད་རྟེན་ ༡༠༨ བཞེངས་ནི་དང་འབྲེལ་ཏེ་ མགྲོན་བརྡ་གནང་ཡོད་མི་ ཕྱིའི་མི་ཁུངས་ཚུ་ དཱད་ག་རི་ས་མཚམས་ཀྱི་ ཐོན་འཛུལ་ས་གོ་བརྒྱུད་དེ་ འགྲུལ་བསྐྱོད་འབད་ཚུགས་ཟེར་བཀོད་ནུག།

དེ་ཡང་ མགྲོན་བརྡ་གནང་ཡོད་མི་ཚུ་ རྐྱངམ་གཅིག་གི་དོན་ལུ་ སྤྱི་ཟླ་ ༡༠ པའི་ཚེས་ ༢༤ ལས་ སྤྱི་ཟླ་ ༡༡ པའི་ཚེས་ ༦ ཚུན་ གནས་སྐབས་ཀྱི་འགྲིག་ཆ་ཅིག་ཨིནམ་ད་ ཐོན་འཛུལ་ས་གོ་དེ་ཁར་ རྒྱ་གར་གྱི་ འབྲེལ་ཡོད་དབང་འཛིན་ཚུ་གི་ ཕྱི་མི་ནང་བསྐྱོད་དང་ ཉོག་སེལ་བྱ་སྒོ་ཚུ་དང་འཁྲིལ་དགོ་ནི་ཨིན་པས།

དགེ་ལེགས་ཕུག་ དྲན་ཤེས་ཁྲོམ་ཚོགས་དབང་འཛིན་གྱིས་ གནས་སྐབས་ཀྱི་ འགྲིག་ཆ་བཟོ་ནི་ལུ་ ཆ་རོགས་འབད་མི་ རྒྱ་གར་གཞུང་ལུ་ བཀའ་དྲིན་ཆེ་ཟེར་ བཤད་ནི་དང་འབྲེལ་ ས་མཚམས་དེ་ནང་ལས་ འགྲུལ་བསྐྱོད་འབད་ནི་དེ་ ཉེན་སྲུང་ཅན་དང་ འཇོན་སྟབས་ཚུལ་མཐུན་ བཟོ་ནིའི་ལཱ་ཚུ་ དགེ་ལེགས་ཕུག་ དྲན་ཤེས་ཁྲོམ་ཚོགས་དབང་འཛིན་གྱིས་ རྒྱ་འབྲུག་གཉིས་ཀྱི་ དབང་འཛིན་ཚུ་དང་གཅིག་ཁར་ འཕྲོ་མཐུད་དེ་ར་འབད་ནི་ཨིན་ཟེར་ བཀོད་འདུག་པའི་གནས་ཚུལ།