སྐྱབས་མགོན་རྒྱལ་ཚབ་རིན་པོ་ཆེ་མཆོག་གིས་ ཐིམ་ཕུ་ཅང་གླིང་མའི་ཐང་ནང་ དབུ་ཞྭ་མཐོང་གྲོལ་ཆེན་མོའི་ མཇལ་ཁ་གནང་ཡོདཔ།

རང་ཟླ་ ༩ པའི་ཚེས་ ༧ སྤྱི་ཟླ་ ༡༠ པའི་ཚེས་ ༡༧ ལུ་ སྐྱབས་མགོན་རྒྱལ་བའི་རྒྱལ་ཚབ་ དྲུང་གཽ་ཤྲི་རིན་པོ་ཆེ་མཆོག་གིས་ ཐིམ་ཕུ་ཅང་གླིང་མའི་ཐང་ འཛམ་གླིང་ཞི་བདེའི་ སྨོན་ལམ་ཆེན་མོའི་ཐང་ནང་སྦེ་ དད་ལྡན་མི་སེར་ལུ་ དབུ་ཞྭ་མཐོང་གྲོལ་རིན་པོ་ཆེའི་ མཇལ་ཁ་དང་འབྲེལ་ཏེ་ མ་གཅིག་གྲུབ་པའི་རྒྱལ་མོའི་ལུགས་ཀྱི་ ཚེ་དབང་གནང་ཡི།
དེ་ཡང་ སྐྱབས་མགོན་རྒྱལ་བའི་རྒྱལ་ཚབ་ དྲུང་གཽ་ཤྲི་རིན་པོ་ཆེ་སྐུ་ཕྲེང་གཉིས་པ་ བཀྲ་ཤིས་རྣམ་རྒྱལ་མཆོག་ལས་ འགོ་བཙུགས་ཏེ་ ད་རེས་ ཞལ་བཞུགས་མི་ སྐྱབས་མགོན་རྒྱལ་བའི་རྒྱལ་ཚབ་ དྲུང་གཽ་ཤྲི་རིན་པོ་ཆེ་ སྐུ་ཕྲེང་བཅུ་གཉིས་པ་ གྲགས་པ་མི་འགྱུར་གོ་ཆ་མཆོག་ཚུན་ཚོད་ སྐུ་ཕྲེང་བཅུ་གཅིག་གིས་ མི་ལོ་ ༥༠༠ ལྷགཔ་ཅིག་གི་རིང་ལུ་ བཞེས་གནང་མི་ དབུ་ཞྭ་མཐོང་གྲོལ་ གསེར་གྱི་མདོག་ཅན་ཨིན་པས།
དབུ་ཞྭ་དེ་ རྒྱལ་དབང་ཀརྨ་པ་བདུན་པ་ ཆོས་གྲགས་རྒྱ་མཚོ་མཆོག་ལུ་ (༡༤༥༤-༡༥༠༦) ཨོ་རྒྱན་གུ་རུ་རིན་པོ་ཆེ་གིས་ ལུང་བསྟན་གནང་དོ་བཟུམ་སྦེ་ རྒྱལ་དབང་ཀརྨ་པ་ སྐུ་འཕྲེང་བདུན་པ་གིས་ བླ་མ་དགོངས་འདུས་ཀྱི་སྒོ་ལས་ ཞྭ་དམར་གསེར་གྱི་མདོག་ཅན་ བསྒྲུབས་གནང་སྟེ་ མགོན་པོ་འོད་དཔག་མེད་དང་ དབྱེ་བ་མེད་པར་ བྱིན་གྱིས་བརླབས་ཏེ་ རྒྱལ་ཚབ་སྐུ་ཕྲེང་གཉིས་པ་ བཀྲ་ཤིས་རྣམ་རྒྱལ་གྱི་ (༡༤༨༧-༡༥༡༥) དབུ་ལུ་གསོལ་ཏེ་ སྟོན་འཁོར་དགོངས་པ་ ཐ་མི་དད་པའི་ ཞལ་བཞེས་དང་ ཀརྨ་པ་རང་གི་ ཆོས་ཀྱི་རྒྱལ་ཚབ་ལུ་ མངའ་གསོལ་མཛད་དེ་ ད་ལྟོའི་བར་ན་ཡང་ དབུ་ཞྭའི་འགྲོ་དོན་ མཛད་བཞིན་དུ་ཡོདཔ་སྦེ་ བཀོད་གནང་ནུག།
དབུ་ཞྭ་མཇལ་བའི་ ཕན་ཡོན་དེ་ཡང་ སྐལ་མཆོག་རྣམས་ཀྱིས་མཐོང་བའི་མོད་ཉིད་ལ། །ས་དང་ལམ་གྱི་ཡོན་ཏན་སྩོལ་བར་མཛད། །སྐལ་མེད་སྡིག་ཅན་དག་གིས་མཐོང་བའི་ཚེ། །བསྐལ་སྟོང་སོགས་བསགས་སྡིག་སྒྲིབ་འཛད་པར་བྱེད། །ཚེ་འདིའི་ཕུན་ཚོགས་ཇི་ལྟར་འདོད་པ་རྣམས། །ཁྱོད་ལ་དམིགས་ནས་གསོལ་བ་བཏབ་པའི་ཚེ། །ཡིད་ལ་རེ་བ་ཇི་བཞིན་འགྲུབ་པར་འགྱུར། །ཞེས་གསུངས་དོ་བཟུམ་ཨིན་པས།
དེ་བཟུམ་མའི་ དབུ་ཞྭ་མཐོང་གྲོལ་རིན་པོ་ཆེའི་ མཇལ་ཁ་དེ་ཡང་ མི་ལ་རས་པ་ཞི་ཚོགས་དང་ རི་དབང་ཆོས་གླིང་ཞི་ཚོགས་ ༢ ཀྱི་ འགོ་འདྲེན་ཐོག་ལུ་ གནང་ཡོད་པའི་གནས་ཚུལ།