མི་དབང་རྒྱལ་བཙུན་མཆོག་ དགེ་ལེགས་ཕུག་ལུ་ ཆིབས་བསྐྱོད་གནང་ཡོདཔ།

སྤྱི་ཟླ་ ༡༠ པའི་ཚེས་ ༡༤ ལུ་ མི་དབང་རྒྱལ་བཙུན་མཆོག་ སྤྱི་ཟླ་ ༡༡ པའི་ཚེས་ ༡ ལུ་ དགེ་ལེགས་ཕུག་ དྲན་ཤེས་ཁྲོམ་ཚོགས་ནང་ བྱང་ཆུབ་མཆོད་རྟེན་ ༡༠༨ བཞེངས་གནང་ནི་ཨིན་མི་ལུ་ གྲ་སྒྲིག་ཚུ་ ཞིབ་དཔྱད་གནང་པར་ དགེ་ལེགས་ཕུག་ལུ་ ཕྱག་ཕེབས་གནང་ནུག།

རིང་ཚད་མི་ཊར་ ༡༥ རེ་འབད་མི་ བྱང་ཆུབ་མཆོད་རྟེན་ཚུ་ བར་ན་ས་སྟོང་ མི་ཊར་ ༡༠༠ རེ་ བཞག་གནང་སྟེ་ མའུ་གཙང་ཆུའི་ མཐའམ་བདའ་སྟེ་ བཞེངས་གནང་ནི་དང་ དེ་ཡང་ དུས་ཅི་ སྤྱི་ཟླ་ ༢ པའི་ནང་ གསལ་བསྒྲགས་གནང་མི་ མི་དབང་མངའ་བདག་རིན་པོ་ཆེའི་ ཐུགས་དགོངས་ལས་འཁྲུངས་པའི་ རྒྱལ་རབས་ཅན་གྱི་ ལས་འགུལ་ཅིག་ཨིན་པས།

སྤྱི་ཟླ་ ༡༡ པའི་ཚེས་ ༡ ལུ་ བྱང་ཆུབ་མཆོད་རྟེན་དེ་ཚུ་ བཞེངས་གནང་པའི་སྐབས་ལུ་ མི་དབང་མངའ་བདག་རིན་པོ་ཆེ་ ཡབ་མེས་སྲས་སྲོས་དང་ མི་དབང་སྐུ་འཁོར་ལྷན་རྒྱས་ཀྱིས་ དབུ་གཙོས་པའི་ གཞུང་གི་འགོ་དཔོན་ཚུ་དང་ ཆོས་འབྲེལ་འགོ་ཁྲིདཔ་ རྒྱབ་སྐྱོར་ཕུལ་མི་ ཕྱི་རྒྱལ་གྱི་མགྱོནམོ་ དེ་ལས་ འབྲུག་གི་མི་སེར་ཚུ་ སྨོན་ལམ་བཏབ་པར་ འཛོམས་ནི་ཨིནམ་ད་ ད་ཚུན་གྱི་བར་ན་ མི་སེར་གཅིག་འབུམ་ལྷགཔ་ཅིག་གིས་ བྱང་ཆུབ་མཆོད་རྟེན་བཞེངས་ནིའི་ནང་ གྲལ་གཏོགས་ཀྱི་དོན་ལུ་ ཐོ་བཀོད་འབད་ནུག།

དེ་ཡང་ སྐྱེ་འགྲོ་ཡོངས་ཀྱི་ ཞི་བདེ་དང་ བདེ་སྐྱིད་ཀྱི་རྟེན་ལུ་ བཞེངས་གནང་ནི་ཨིན་མི་ འབྱུང་རབས་ཅན་གྱི་ བྱིན་རླབས་ཆེ་བའི་ ལས་འགུལ་ཅིག་ཨིན་པས།

མི་དབང་རྒྱལ་བཙུན་མཆོག་ དགེ་ལེགས་ཕུག་ དྲན་ཤེས་ཁྲོམ་ཚོགས་ནང་ བཞུགས་པའི་སྐབས་ལུ་ ཨ་ལོའི་གཅེས་སྐྱོང་དང་ གོང་འཕེལ་ལས་རིམ་ སློབ་རིམ་ ༦ པ་ཚུན་གྱི་དོན་ལུ་ སྒེར་གྱི་ཤེས་རིག་སྤེལ་ཁང་ ཧ་ཏི་ས་སློབ་གྲྭའི་ ས་བསླངས་རྟེན་འབྲེལ་ནང་ཡང་ དབུ་བཞུགས་མཛད་གནང་ཡོད་པའི་གནས་ཚུལ།