རོའི་ཊརཛ།
སྤྱི་ཟླ་ ༤ པའི་ཚེས་ ༣ ལུ་ རྒྱ་ནག་གིས་ འཕྲལ་ཁམས་ཅིག་ཁར་ ཡུ་ཨེཛ་གིས་ ཡར་སེང་འབད་དེ་ཡོད་མི་ རྒྱ་ནག་གི་ ཚོང་ཟོག་ཁྲལ་དེ་ དེ་འཕྲལ་ལས་ ཆ་མེད་གཏང་དགོ་པའི་ ནན་སྐུལ་འབད་ཡོདཔ་ཨིན་པས།
གལ་སྲིད་ ཡུ་ཨེཛ་གིས་ ནན་སྐུལ་དེ་ལུ་ ཆ་གནས་མ་འབད་བ་ཅིན་ རྒྱ་ནག་གི་ ཁ་ཐུག་ལས་ཡང་ གདོང་ལན་གྱི་ ཐབས་ལམ་ཚུ་ ལག་ལེན་འཐབ་ནི་ཨིན་མི་དེ་ཡང་ རྒྱ་ནག་གི་ མཐའ་དོན་ཉེན་སྲུང་གི་དོན་ལུ་ཨིནམ་སྦེ་ བཤད་ཡོདཔ་ཨིན་པས།
དེ་མ་ཚད་ ཡུ་ཨེཛ་གིས་ དེ་བཟུམ་མའི་ ཁྲལ་ཡར་སེང་འབད་མི་དེ་ འདས་པའི་ལོ་ཚུ་ནང་ ཕྱོགས་མང་ཚོང་འབྲེལ་གྱི་ འགྲིག་ཆ་བཟོ་མི་ལས་ཡང་ འགལ་དོ་ཡོད་པའི་ཁར་ ཡུ་ཨེཛ་ལུ་ རྒྱལ་སྤྱི་ཚོང་འབྲེལ་ཐོག་ལས་ ཁེ་ཕན་སྦོམ་སྦེ་ར་ བྱུང་སྟེ་ཡོདཔ་སྦེ་ རྒྱ་ནག་གི་ ཚོང་འབྲེལ་ལྷན་ཁག་ལས་ གསལ་བཤད་ཅིག་ནང་བཀོད་ནུག།
དེ་ཡང་ ཡུ་ཨེཛ་གིས་ ནང་འདྲེན་ཁྲལ་ ཡར་སེང་འབད་མི་ལུ་བརྟེན་ཏེ་ རྒྱལ་སྤྱི་གནས་རིམ་ནང་ དཔལ་འབྱོར་སྦོམ་ཤོས་ཚུ་གི་བར་ན་ ཚོང་འབྲེལ་གྱི་ བྱེལཝ་ཐོན་ཏེ་ ཚོང་ཟོག་བཀྲམ་སྤེལ་གྱི་ མཐུད་སྦྲེལ་ལུ་ གནོད་སྐྱོན་འབྱུང་འོང་ཟེར་ཨིན་པས།
སྤྱི་ཟླ་ ༤ པའི་ཚེས་ ༢ ལུ་ སྲིད་འཛིན་ཊཱམ་གྱིས་ གསལ་བསྒྲགས་འབད་མིའི་ནང་ དུས་ཅི་ ལོ་འགོ་ཚེསཔ་ད་ རྒྱ་ནག་གི་ ཚོང་ཟོག་ལུ་ ནང་འདྲེན་ཁྲལ་ བརྒྱ་ཆ་ ༢༠ ཡར་སེང་འབད་ཡོད་མི་གུ་ ད་རུང་ཡང་ བརྒྱ་ཆ་ ༣༤ ཡར་སེང་འབད་ནི་ཨིན་ཟེར་ བཀོད་ཡོདཔ་ལས་ ནང་འདྲེན་ཁྲལ་དེ་ བརྒྱ་ཆ་ ༥༤ ལུ་ འཛེགས་ནི་ཨིན་པས་ཟེར་བཀོད་ནུག།
དེ་ལས་ རྒྱལ་ཁབ་གཞན་ཚུ་ནང་ ཕྱིར་ཚོང་འཐབ་མི་ཚུ་གི་ ཚོང་ཟོག་ལུ་ ཕོག་དོ་བཟུམ་སྦེ་ རྒྱ་ནག་གི་ ཕྱིར་ཚོང་འཐབ་མི་ཚུ་གིས་ ཚོང་ཟོག་ཕྱིར་ཚོང་ཐོག་ལས་ ཡུ་ཨེཛ་ལུ་ ནང་འདྲེན་འབདཝ་ད་ ནང་འདྲེན་གྱི་ གཞི་རྟེན་ཁྲལ་དེ་ བརྒྱ་ཆ་ ༡༠ རེ་ ཕོག་ནི་ཨིན་པས་ཟེར་ བཀོད་འདུག་པའི་གནས་ཚུལ།
རྒྱ་ནག་གིས་ ཡུ་ཨེཛ་ལུ་ ཚོང་ཟོག་ནང་འདྲེན་གྱི་ ཁྲལ་ཡར་སེང་འབད་མི་དེ་ མར་ཕབ་འབད་དགོ་པའི་ནན་སྐུལ།
Comments are closed.
Related
རྒྱ་གར་གྱི་རྒྱལ་ས་ དིལླིའི་ས་ཁོངས་ཚུ་ནང་ ངོ་རྒོལ་འབད་མི་ཚུ་འཛིན་བཟུང་།
རོའི་ཊརཛ། སྤྱི་ཟླ་ ༡༠ པའི་ཚེས་ ༡༠ ལུ་ རྒྱ་གར་གྱི་ བཙག་འཐུ་ལྷན་འཛིན་སྤྱི་ཁྱབ་ དགོངས་ཞུ་འབད་དགོཔ་སྦེ་ ངོ་རྒོལ་འབད་མི་ཚུ་ ཁ་ཕྱལ་བཏང་ཐབས་ལུ་ ཉེན་སྲུང་དམག་མི་ཚུ་གིས་ དིལླིའི་ས་ཁོངས་ཚུ་ནང་ འགྲུལ་སྐྱོད་བཀག་དམ་འབད་བའི་ཁཡ་ ཁྲིམས་སྲུང་འགག་སྡེ་གིས་ ངོ་རྒོལ་འབད་མི་ཚུ་ཡང་ བརྒྱ་ཕྲག་ལས་བཅད་དེ་ འཛིན་བཟུང་འབད་ནུག། དེ་བཟུམ་སྦེ་ ཁྲོམ་སྡེའི་ནང་འཁོད་ལུ་ ཁྲིམས་སྲུང་འགག་པ་དང་ ཞི་བའི་དམག་མི་ སྟོང་ཕྲག་ལས་བཅད་དེ་ བཀྲམ་སྤེལ་འབད་ཡོདཔ་མ་ཚད་ ཚོང་འབྲེལ་ལྟེ་བ་དང་ འགྲུལ་འཕྲིན་ཡོངས་འབྲེལ་གྱི་ ཞབས་ཏོག་ཚུ་ཡང་ མཚམས་བཀག་འབད་ནུག། ངོ་རྒོལ་གྱི་ ས་ཁོངས་ཅིག་ཨིན་མི་ ཇཱན་ཏར་མན་ཏར་ལུ་ མི་སྟོང་ཕྲག་ལས་བཅད་དེ་ འཛོམས་ནི་གི་ འཆར་གཞི་ཡོདཔ་ཨིན་རུང་ ངོ་རྒོལ་འགོ་མ་བཙུགས་པའི་ཧེ་མ་ལས་ ཉེན་སྲུང་དམག་མི་ཚུ་གིས་ སྒོ་བསྡམས་ཡོདཔ་ཨིན་པས། ཨིན་རུང་ ཁྲོམ་སྡེའི་ས་གནས་ ལག་བཟོའི་ཚོང་ཁང་དང་ མ་ཧཱཏ་མ་གཱན་དྷིའི་ དྲན་རྟེན་ཚུ་ནང་ ངོ་རྒོལ་འབདཝ་ཨིན་པས་ཟེར་ བཀོད་འདུག་པའི་གནས་ཚུལ།
འགྲོ་བ་མིའི་དབང་ཆའི་ གཙོ་འཛིན་བགྲེསཔ་ ཨམ་ནཱ་ཝི་པི་ལེ་གིས་ འཛམ་གླིང་ཞི་བདེའི་ གཟེངས་རྟགས་ཐོབ་ཡོདཔ།
བི་བི་སི། སྤྱི་ལོ་ ༢༠༢༦ ལོའི་ འཛམ་གླིང་ཞི་བདེའི་གཟེངས་རྟགས་དེ་ འཛམ་གླིང་སྤྱི་ཚོགས་ འགྲོ་བ་མིའི་དབང་ཆའི་ གཙོ་འཛིན་བགྲེསཔ་དང་ རྒྱལ་སྤྱི་ཁྲིམས་འདུན་གྱི་དྲང་དཔོན་ ཨམ་ནཱ་ཝི་པི་ལེ་ལུ་ གནང་ཡོདཔ་ཨིན་པས། ལྷོ་ཨཕ་རི་ཀའི་ དྲང་དཔོན་དེ་གིས་ ཞི་བདེ་དང་ རྒྱལ་སྤྱིའི་ཁྲིམས་ལུགས་ ཡར་དྲགས་གཏང་ནི་ལུ་ བརྩོན་ཤུགས་བསྐྱེད་ཡོད་པའི་ ངོས་འཛིན་བྱུང་ཡོདཔ་མ་ཚད་ རྒྱལ་སྤྱི་ཁྲིམས་ལུགས་ཀྱི་ སྒྲིག་གཞི་ཡོངས་རྫོགས་ཀྱི་དོན་ལུ་ཡང་ ལམ་སྟོན་འབད་ཡོདཔ་སྦེ་ འཛམ་གླིང་ཞི་བདེའི་ གཟེངས་རྟགས་ཚོགས་ཆུང་གིས་ གསལ་བཤད་འབད་ནུག། སྐྱེས་ལོ་ ༨༥ འབད་མི་ ཨམ་པི་ལེ་གིས་ ལོ་ངོ་བཅུ་ཕྲག་ལས་བཅད་དེ་ རེ་ཝང་ཌ་དང་ མི་ཡེན་མར་ གཱ་ཛ་ཚུ་རྩིས་ཏེ་ འགྲོ་བ་མིའི་ཐོབ་དབང་ལུ་ གནོད་སྐྱོན་རྐྱབ་ཡོད་པའི་ ཉེས་འཛུགས་བཀལ་མི་ཚུ་ལུ་ གཞི་བཞག་སྟེ་ མཐོ་རིམ་གྱི་ལཱ་ཚུ་ནང་ བཅའ་མར་གཏོགས་ཡོདཔ་ཨིན་པས། མོ་གི་ཧེ་མའི་ལཱ་ཚུ་ཡང་ ལྷོ་ཨཕ་རི་ཀ་ལུ་ མི་རིགས་དཀར་ནག་ཕྱེ་མི་ལུ་ རྒྱབ་འགལ་འབད་མི་ རྩོལ་འདོད་ཅན་ཚུ་ལུ་ རྒྱབ་སྐྱོར་འབད་ཡོདཔ་ལས་ སྤྱི་ཟླ་ ༡༠ པའི་ཚེས་ ༨ ལུ་ རྒྱལ་ཁབ་ནང་ ཞི་བདེའི་གཟེངས་རྟགས་ཐོབ་མི་ མི་ངོམ་ ༥ པ་ཨིནམ་སྦེ་བཀོད་ནུག། ནོར་ཝེ་ཇིན་ལས་ […]
ཡུ་ཨེཛ་ལུ་ ར་ཤི་ཡའི་ ས་སྣུམ་ཌི་ཟེལ་ ནང་འདྲེན་འབད་ནི་ཨིན་པའི་ གསལ་བསྒྲགས་འབད་ཡོདཔ།
བི་བི་སི། ཨ་མི་རི་ཀའི་སྲིད་འཛིན་ ཌོ་ནཱལ་ཊཱམ་གྱིས་ ཡུ་ཨེཛ་ལུ་ ར་ཤི་ཡའི་ ས་སྣུམ་ཌི་ཟེལ་ ནང་འདྲེན་འབད་ནི་ཨིན་པའི་ གསལ་བསྒྲགས་འབད་མི་ལུ་ ཡུ་ཀེ་རེན་གྱི་སྲིད་འཛིན་ ཝོ་ལོ་ཌི་མིར་ ཟེ་ལེནཛ་ཀི་གིས་ སྐྱོན་བརྗོད་འབད་ནུག། དེ་མ་ཚད་ སྲིད་འཛི་ཟེ་ལེནཛ་ཀི་གིས་ བཤད་དོ་བཟུམ་འབད་བ་ཅིན་ དེ་སྦེ་ ཕྱད་མདའི་ནང་ མ་རྩ་བཙུགས་མི་དེ་ ར་ཤི་ཡའི་སྲིད་འཛིན་ ཝ་ལ་ཌི་མིར་ པུ་ཊིན་ལུ་ གསོལ་རས་སྦེ་ འོང་ནི་མས་ཟེར་ཨིན་པས། སྲིད་འཛིན་པུ་ཊིན་གྱིས་ ཨ་མི་རི་ཀ་དང་ འཛམ་གླིང་ཚོང་འབྲེལ་ནང་ དེ་འཕྲལ་ལས་ ས་སྣུམ་ཌི་ཟེལ་ ཊཱོན་ ༣༠༠,༠༠༠ དེ་ཅིག་ གཏོན་ནི་ཨིནམ་མ་ཚད་ སྤྱི་ཟླ་ ༡༡ པའི་ནང་ ཊཱོན་ ༥༠༠,༠༠༠ དང་ དེ་གི་ཤུལ་ལས་ ས་ཡ་ ༡ གཏོན་ནི་ཨིན་པའི་ ཁས་བླངས་ཡང་འབད་ནུག།