ཝ་ནུ་ཨ་ཏུ་ལུ་ ས་ཡོམ་ཤུགས་ཚད་ མེག་ནེ་ཅཱུད་ ༧.༣ རྐྱབ་མིའི་ནང་ མི་གྲངས་ ༡༤ ལུ་ ཤི་རྐྱེན་དང་ ༢༠༠ ལྷགཔ་ཅིག་ལུ་རྨ་སྐྱོན།

བི་བི་སི།
སྤྱི་ཟླ་ ༡༢ པའི་ཚེས་ ༡༧ ལུ་ ཝ་ནུ་ཨ་ཏུ་ རྒྱལ་ཁབ་ནང་ ས་ཡོམ་ཤུགས་ཚད་ མེག་ནེ་ཅཱུད་ ༧.༣ འབད་མི་ཅིག་ རྐྱབ་པ་ལུ་བརྟེན་ཏེ་ མི་གྲངས་ ༡༤ ལུ་ ཤི་རྐྱེན་བྱུང་ཡོདཔ་མ་ཚད་ མི་གྲངས་ ༢༠༠ ལྷགཔ་ཅིག་ལུ་ཡང་ རྨ་སྐྱོན་བྱུང་ཡོདཔ་ཨིན་པས།
དེ་བསྒང་ ས་ཡོམ་དེ་གིས་ ཝ་ནུ་ཨ་ཏུ་ལུ་ཡོད་མི་ ཡུ་ཨེཛ་དང་ ཕཱ་རནཛ་ ཡུ་ཀེ་ ནིའུ་ཛི་ལེན་ རྒྱལ་ཁབ་ཁག་གི་ གཞུང་ཚབ་ཡིག་ཚང་ཚུ་རྩིས་ཏེ་ སྒྲིང་ཁྱིམ་ལེ་ཤ་ཅིག་་ལུ་ གནོད་སྐྱོན་བྱུང་ཡོདཔ་མ་ཚད་ གློག་མེ་དང་ བརྒྱུད་འཕྲིན་གྱི་ ཞབས་ཏོག་ཚུ་ལུ་ཡང་ གནོད་སྐྱོན་བྱུང་ནུག།
ཝ་ནུ་ཨ་ཏུ་ ཁྲིམས་སྲུང་འགག་སྡེ་གིས་ བཤད་དོ་བཟུམ་འབན་བ་ཅིན་ འཚོལ་ཞིབ་དང་ གྲོགས་རམ་གྱི་ལཱ་ཚུ་འབད་བའི་བསྒང་ཡོདཔ་ལས་ ཉིན་གྲངས་ ༧ གྱི་རིང་ལུ་ མི་སེར་ཚུ་ ཕར་ཚུར་འགྱོ་མ་ཆོགཔ་སྦེ་ གསལ་བསྒྲགས་འབད་ཡི་ཟེར་ཨིན་པས།
དེ་ཡང་ མི་གྲངས་ ༤ རྒྱལ་ས་པོཊ་ཝི་ལའི་ སྨན་ཁང་ནང་སྦེ་ ཤི་རྐྱེན་བྱུང་ཡོདཔ་ད་ མི་གྲངས་ ༦ ས་རུད་ཆད་སར་དང་ མི་གྲངས་ ༤ དེ་ཅིག་ སྒྲིང་ཁྱིམ་རམ་འགྱོ་མིའི་ འོག་ལུ་ཚུད་དེ་ ཤི་རྐྱེན་བྱུང་ནུག།
ཝ་ནུ་ཨ་ཏུ་ལུ་ཡོད་མི་ རྒྱ་ནག་གི་ གཞུང་ཚབ་ཡིག་ཚང་ལས་ ལི་མིང་གང་གིས་ བཤད་དོ་བཟུམ་འབད་བ་ཅིན་ ས་ཡོམ་གྱི་ རྐྱེན་ངན་དེ་ནང་ རྒྱ་ནག་གི་ མི་ཁུངས་ ༢ ལུ་ཡང་ ཤི་རྐྱེན་བྱུང་ནུག་ཟེར་ཨིན་པས།
འཛམ་གླིང་སྤྱི་ཚོགས་ འགྲོ་བ་མིའི་མཉམ་འབྲེལ་ཡིག་ཚང་ལས་ ས་ཡོམ་དེ་གིས་ གནོད་སྐྱོན་ཚབས་ཆེན་སྦེ་ར་ བྱུང་ཡོདཔ་ལས་ ད་ལས་ཕར་ མི་གྲངས་ ༡༡༦,༠༠༠ དེ་ཅིག་ལུ་ གནོད་སྐྱོན་འབྱུང་ནི་བཟུམ་ཅིག་ཡོདཔ་སྦེ་ བཤདཔ་ཨིན་པས་ཟེར་ བཀོད་འདུག་པའི་གནས་ཚུལ།