གནམ་གཤིས་འགྱུར་བགྲོད་ལུ་བརྟེན་ཏེ་ ཆུ་རུད་དང་ ས་རུད་ཚུ་ ལོག་བལྟབ་སྦེ་ འཐོན་ནི་གི་ཉེན་ཁ།

རོའི་ཊརཛ།
སྤྱི་ཟླ་ ༩ པའི་ཚེས་ ༢༥ ལུ་ ཚན་རིག་མཁས་མཆོག་ཚུ་གིས་ སྲིད་བྱུས་རྩོམ་མི་ཚུ་ལུ་ འཛམ་གླིང་དྲོད་འཕར་ བཀག་ཐབས་ཀྱི་ སྲིད་བྱུས་ཚུ་ བརྩམ་དགོ་པའི་ ནན་སྐུལ་འབད་ནུག།
དེ་ཡང་ འཕྲལ་ཁམས་ཅིག་ཁར་ ཡུ་རོབ་དབུས་ཕྱོགས་ཀྱི་ ས་གནས་ཚུ་ནང་ ཆུ་རུད་དང་ ས་རུད་ཚུ་ ཚབས་ཆེན་སྦེ་ར་ འཐོན་དོ་བཟུམ་སྦེ་ གནམ་གཤིས་འགྱུར་བགྲོད་ལུ་བརྟེན་ཏེ་ དེ་བཟུམ་མའི་ རྐྱེན་ངན་ཚུ་ ལོག་བལྟབ་སྦེ་ར་ འཐོན་ནི་གི་ ཉེན་ཁ་འདུག་ཟེར་ཨིན་པས།
ཡུ་རོབ་རྒྱལ་ཁབ་ཚུ་ནང་ ལོ་ངོ་བཅུ་ཕྲག་ ༢ ལུ་ འཕྲལ་ཁམས་ཅིག་ཁར་ཐོན་མི་ ཆུ་རུད་ཀྱི་རྐྱེན་ངན་དེ་ ཚབས་ཆེན་ཅིག་ཨིནམ་ད་ རྐྱེན་ངན་དེ་ཚུ་གིས་ ཟམ་དང་ སྒྲིང་ཁྱིམ་ཚུ་ མེདཔ་བཏང་པའི་ཁར་ ཁྲོམ་སྡེ་ཚུ་ ས་འདམ་གྱིས་ གང་སྟེ་ཡོདཔ་ལས་ དེ་ཚུ་ཉམས་གསོའི་དོན་ལས་ ཌོ་ལར་ཐེར་འབུམ་སྦེ་ ཟད་འགྲོ་གནས་ནི་ཨིན་པའི་ཁར་ རྐྱེན་ངན་དེ་ཚུའི་ནང་ མི་གྲངས་ ༢༤ ལུ་ཡང་ ཤི་རྐྱེན་བྱུང་ནུག།
འཛམ་གླིང་གནམ་གཤིས་ཡིག་ཚང་གི་ སྙན་ཞུ་དང་འཁྲིལ་བ་ཅིན་ རྒྱལ་སྤྱིའི་ཚན་རིག་མཁས་མཆོག་སྡེ་ཚན་ཅིག་གིས་ གནམ་གཤིས་འགྱུར་བགྲོད་ཀྱི་ གནོད་རྐྱེན་ཚུ་གི་སྐོར་ལས་ ཞིབ་འཇུག་ཅིག་ འགོ་འདྲེན་འཐབ་པའི་སྐབས་ལུ་ རླུང་འཚུབ་དང་ ཆར་ཆུའི་ཉེན་ཁ་དེ་ ལོག་བལྟབ་ཀྱིས་ འགྱུར་འགྱོ་ནི་མས་ཟེར་ཨིན་པས།
ལཱོན་ཌཱོན་ན་ཨིམ་པེ་རི་ཡཱལ་ མཐོ་རིམ་སློབ་གྲྭའི་ ཞིབ་འཚོལཔ་དང་་ ཚན་རིག་མཁས་མཆོག་སྡེ་ཚན་གྱི་ འཐུས་མི་ཨིན་མི་ ཇོ་ཡིཛ་ཀི་མུ་ཏའི་གིས་ ད་རེས་ཀྱི་ ས་རུད་དང་ ཆུ་རུད་ཀྱིས་ ས་སྣུམ་ལུ་བརྟེན་མི་ སྐྱེལ་འདྲེན་གྱི་ གྲུབ་འབྲས་སྟོན་མས་ཟེར་བཤད་ནུག།
ཁོ་གིས་ ས་སྣུམ་དང་ ཐབ་རླུང་ སོལ་མོ་ཚུ་ སླར་འབྱུང་ནུས་ཤུགས་ཀྱིས་ ཚབ་འཛིན་མ་འབད་བ་ཅིན་ ཆར་ཆུ་ཡར་སེང་སོང་སྟེ་ དཔལ་འབྱོར་ལུ་ གནོད་ཉེན་ཆེ་བའི་ གནས་སྟངས་འཐོན་ནི་ཨིནམ་སྦེ་ཡང་ བཤད་ནུག་ཟེར་ བཀོད་འདུག་པའི་གནས་ཚུལ།