ར་ཤི་ཡ་གིས་ ཡུ་ཀེ་རེན་གྱི་ཁྲོམ་ཚོགས་ པཱོལ་ཊོ་བཱ་ལུ་ མི་ཛ་ཡེལ་ཐོག་ལས་ མི་གྲངས་ ༥༡ དམར་བསད།

ཨཱལ་ཇ་ཟི་ར།
སྤྱི་ཟླ་ ༩ པའི་ཚེས་ ༣ ལུ་ ཡུ་ཀེ་རེན་གྱི་ཁྲོམ་ཚོགས་ པཱོལ་ཊོ་བཱ་ལུ་ཡོད་མི་ སློབ་གྲྭ་དང་ སྨན་ཁང་གི་ མཐུན་རྐྱེན་ཚུ་གུ་ ར་ཤི་ཡ་གིས་ མི་ཛ་ཡེལ་ཐོག་ལས་ གནོད་འཚུབ་བཀལ་ཏེ་ མི་གྲངས་ ༥༡ དེ་ཅིག་ དམར་བསད་འབད་བའི་ཁར་ གཞན་མི་ ༢༠༠ ལྷགཔ་ཅིག་ལུ་ཡང་ རྨ་སྐྱོན་བྱུང་ནུག།
ཡུ་ཀེ་རེན་གྱི་སྲིད་འཛིན་ ཝོ་ལོ་ཌི་མིར་ ཛེ་ལེནཛ་ཀི་གིས་ གསུངས་དོ་བཟུམ་འབད་བ་ཅིན་ དྲག་པོའི་དམག་སྡེའི་ བརྒྱུད་འབྲེལ་ལས་ཁང་ཅིག་གི་ ཆ་ཤས་ཅིག་ཡང་ མེདཔ་བཏང་རུང་ སྒྲིང་ཁྱིམ་རམ་བཏང་མིའི་འོག་ལུ་ ཚུད་དེ་ཡོད་མི་ཚུ་ སྲོག་སྐྱབས་འབད་ཚུགས་ཅི་ཟེར་ཨིན་པས།
པཱོལ་ཊོ་བཱ་ ཁྲོམ་ཚོགས་དེ་ རྒྱལ་ས་ཀི་ཡེབ་ལས་ ཤར་ལྷོ་ཁ་ཐུག་ལུ་ ཀི་ལོ་མི་ཊར་ ༣༥༠ དེ་ཅིག་གི་ ས་ཁར་ཡོདཔ་ད་ དགོས་མཁོ་ཡོད་མི་ སྲོག་སྐྱབས་ཀྱི་ ཞབས་ཏོག་ཚུ་ སྤྲོད་དེ་ཡོད་པའི་ཁར་ ཞིབ་དཔྱད་ཚུ་ཡང་འབད་ནུག།
སྲུང་སྐྱོབ་ལྷན་ཁག་ལས་ བཤད་དོ་བཟུམ་འབད་བ་ཅིན་ ཁྲོམ་ཚོགས་དེ་ནང་ མཁའ་ཐོག་གནོད་འཚུབ་ཀྱི་ ཉེན་བརྡའི་སྒྲ་སྐད་ བཏང་པའི་ཤུལ་ལུ་ མི་སེར་ཚུ་ ཉེན་སྲུང་ས་གོའི་ནང་ འགྱོ་བའི་བར་ན་ མི་ཛ་ཡེལ་ཚུ་གིས་ ཕོག་ཡོདཔ་ད་ ཉེན་སྲུང་དང་ སྨན་བཅོས་འབད་མི་ཚུ་ མཉམ་འབྲེལ་ཐོག་ལས་ ལཱ་ཚུ་འབད་མི་ལུ་བརྟེན་ཏེ་ མི་གྲངས་ ༢༥ དེ་ཅིག་ སྲོག་སྐྱབས་འབད་ཚུགས་ཅི་ཟེར་ཨིན་པས།
པཱོལ་ཊོ་བཱ་ ཁྲོམ་ཚོགས་ཀྱི་གཙོ་འཛིན་ ཕི་ལིབ་པོར་ནིན་གྱིས་ སྤྱི་ཟླ་ ༩ པའི་ཚེས་ ༤ ལས་འགོ་བཟུང་སྟེ་ ཉིན་གྲངས་ ༣ གྱི་རིང་ལུ་ མྱ་ངན་གྱི་ཉིནམ་སྦེ་ གསལ་བསྒྲགས་འབད་ནུག་ཟེར་ བཀོད་འདུག་པའི་གནས་ཚུལ།