ར་ཤི་ཡ་གིས་ འཕྲུལ་སྐར་ཅིག་ གནམ་ཁར་བཏང་མི་དེ་ འཕྲུལ་སྐར་གཞན་ཚུ་ལུ་ གནོད་འཚུབ་བཀལ་ནི་གི་ ནུས་ཤུགས་ཡོད་པའི་དོགས་ཟོན།

བི་བི་སི།
སྤྱི་ཟླ་ ༥ པའི་ཚེས་ ༢༢ ལུ་ ཡུ་ཨེཛ་གིས་ བཤད་དོ་བཟུམ་འབད་བ་ཅིན་ བདུན་ཕྲག་ཧེ་མའི་ནང་ ར་ཤི་ཡ་གིས་ འཕྲུལ་སྐར་ཅིག་ གནམ་ཁར་བཏང་མི་དེ་ འཕྲུལ་སྐར་གཞན་ཚུ་ལུ་ གནོད་འཚུབ་བཀལ་ནི་གི་ ནུས་པ་ཡོད་པའི་ དོགས་པ་ཡོད་ཟེར་ཨིན་པས།
དེ་ཡང་ ར་ཤི་ཡ་གིས་ འཛམ་གླིང་པད་སྐོར་རྐྱབ་མི་ འཕྲུལ་སྐར་ཅིག་ གནམ་ཁར་བཏང་མི་དེ་ མཁའ་ཐོག་གོ་མཚོན་ཚུ་ བཟློག་ཐབས་ལུ་ འོང་ནི་བཟུམ་ཅིག་ཨིནམ་སྦེ་ ཡུ་ཨེཛ་པེན་ཊ་གཱོན་གྱི་མགྲིན་ཚབ་ ཡོངས་ཁྱབ་མདོ་འཛིན་ པེཊ་རའི་ཌར་གྱིས་ གསལ་བཤད་འབད་ནུག།
ར་ཤི་ཡའི་ འཕྲུལ་སྐར་དེ་ཡང་ ཡུ་ཨེཛ་གཞུང་གི་ འཕྲུལ་སྐར་ལྡིང་སྐོར་རྐྱབ་སའི་ མཐོ་ཚད་དང་ འདྲ་མཉམ་སྦེ་ཡོདཔ་ལས་ འཕྲོ་མཐུད་དེ་ར་ བལྟ་རྟོག་ཚུ་འབད་དེ་ རང་གི་སྲུང་སྐྱོབ་ལུ་ གྲ་སྒྲིག་འབད་དགོཔ་ཡོད་ཟེར་ཨིན་པས།
ར་ཤི་ཡའི་ ཕྱི་འབྲེལ་ལྷན་ཁག་གི་མགྲིན་ཚབ་ མ་རི་ཡ་ཟ་ཁ་རོ་བ་གིས་ བཤད་དོ་བཟུམ་འབད་བ་ཅིན་ ཡུ་ཨེཛ་ཁ་ཐུག་ལས་ མཁའ་དབྱིངས་དེ་ཡང་ དྲག་པོའི་གདོང་ཐུག་གི་ ས་གོ་ཅིག་ལུ་ བསྒྱུར་ཐབས་འབདཝ་མས་ཟེར་ཨིནམ་ད་ དེ་བཟུམ་སྦེ་ དྲག་པོའི་མཁས་མཆོག་ དག་པ་ཅིག་གིས་ར་ འཕྲུལ་རིག་གོང་འཕེལ་ལུ་བརྟེན་ཏེ་ མཁའ་དབྱིངས་དེ་ ཕྱད་མདའ་རྐྱབ་སའི་ ས་གོ་ལུ་ འགྱུར་ཉེན་ཡོད་པའི་སྐོར་ལས་ ཧེ་མ་ལས་ར་ ཉེན་བརྡ་འབད་ནུག།
པེན་ཊ་གཱོན་གྱི་ ཁ་ཐུག་ལས་ ར་ཤི་ཡའི་ འཕྲུལ་སྐར་དེ་ ཡུ་ཨེཛ་གི་ འཕྲུལ་སྐར་དང་ མཐོ་ཚད་འདྲ་མཉམ་སྦེ་ བཏང་ཡོདཔ་ལས་ འཕྲུལ་སྐར་གཞན་ཚུ་ལུ་ གནོད་འཚུབ་བཀལ་ནི་གི་ ནུས་པ་ཡོད་པའི་ ཡིད་ཆེས་ཡོདཔ་སྦེ་ བཤདཔ་ཨིན་པས་ཟེར་ བཀོད་འདུག་པའི་གནས་ཚུལ།