རྒྱ་ནག་གིས་ ཇ་པཱན་གྱི་ མཁའ་དབྱིངས་ལུ་ ལྒང་ཕུ་བཏང་མི་དེ་ ཁྲིམས་འགལ་ཨིན་པའི་ངོས་ལེན།

རོའི་ཊརཛ།
སྤྱི་ཟླ་ ༢ པའི་ཚེས་ ༡༥ ལུ་ རྒྱ་པཱན་གཞུང་གི་ མགྲིན་ཚབ་ཅིག་གིས་ རྒྱ་པཱན་གྱི་ མཁའ་དབྱིངས་ལུ་ རྒྱ་ནག་གིས་ ཁྲིམས་འགལ་ཐོག་ལས་ མི་མེད་པའི་ གསང་ཞིབ་ལྒང་ཕུ་ཚུ་ བཏང་ནི་དེ་ རྩ་ལས་ར་ ངོས་ལེན་མ་རུང་བའི་ གནད་དོན་ཅིག་ཨིནམ་སྦེ་ གསལ་བཤད་འབད་ནུག།
དེ་ཡང་ རྒྱ་པཱན་གྱི་ སྲུང་སྐྱོབ་ལྷན་ཁག་ལས་ བཤད་དོ་བཟུམ་འབད་བ་ཅིན་ སྤྱི་ལོ་ ༢༠༡༩ ལས་ཚུར་ རྒྱ་ནག་གི་ གསང་ཞིབ་ལྒང་ཕུ་ ཉུང་ཤོས་ར་ ཚར་ ༣ དེ་ཅིག་ ཁོང་གི་མཁའ་དབྱིངས་ལུ་ བཏང་ཡོད་པའི་ དོགས་པ་ཡོད་ཟེར་ཨིན་པས།
རྒྱ་པཱན་ལྷན་རྒྱས་གཞུང་ཚོགས་ཀྱི་ དྲུང་ཆེན་གཙོ་འཛིན་ ཧི་རོ་ཀ་ཟུ་ མ་ཙུ་ནོ་གིས་ གནས་ཚུལ་ཞལ་འཛོམས་ཅིག་ནང་ བཤད་དོ་བཟུམ་འབད་བ་ཅིན་ རྒྱ་པཱན་གྱི་ མཁའ་དབྱིངས་ལུ་ བཟོ་དབྱིབས་ལྒང་ཕུ་བཟུམ་མའི་ མཁའ་ཐོག་ཅ་ལ་ཚུ་ལུ་ ཞིབ་དཔྱད་འབད་བའི་ཤུལ་ལས་ རྒྱ་ནག་གི་ མི་མེད་པའི་ གསང་ཞིབ་ལྒང་ཕུ་ཨིན་པའི་ དོགས་པ་སྦོམ་ཡོད་ཟེར་ཨིན་པས།
རྒྱ་པཱན་གཞུང་གིས་ ཁོང་གི་མཁའ་དབྱིངས་ལུ་ ཧམ་འཛུལ་འབད་མི་ཚུ་ལས་ ཉེན་སྲུང་འབད་ཐབས་ལུ་ ལག་ལེན་འཐབ་དགོ་མི་ གོ་མཚོན་ཚུ་ དམ་འཛིན་ཡངས་ཆག་གཏང་ནི་གི་ གྲོས་འཆར་ཡང་བཀོད་ནུག།
ཞིབ་དཔྱད་དེ་ཡང་ ཡུ་ཨེཛ་གིས་ རྒྱ་ནག་གི་ ལྒང་ཕུ་ཅིག་ ཕབ་བཏང་སྟེ་ རྒྱལ་ཁབ་ ༤༠ དེ་ཅིག་གི་ འགོ་དཔོན་ཚུ་ལུ་ གསལ་བཤད་འབད་བའི་ཤུལ་ལས་ ཡར་སེང་འབད་ཡོདཔ་སྦེ་ བཀོད་འདུག་པའི་གནས་ཚུལ།