འཛམ་གླིང་དངུལ་ཁང་གིས་ འཛམ་གླིང་རྒྱལ་སྤྱིའི་ནང་ དཔལ་འབྱོར་མར་ཉམས་ལུ་ཉེན་བརྡ།

བི་བི་སི།
ར་ཤི་ཡ་གིས་ ཡུ་ཀེ་རེན་ལུ་ བཙན་འཛུལ་འབད་དེ་ དམག་འཁྲུག་ལང་ནི་དེ་གིས་ འཛམ་གླིང་ནང་ དཔལ་འབྱོར་མར་ཉམས་ཐོག་ལུ་ བཟའ་འཐུང་དང་ ནུས་ཤུགས་ ལུད་ཚུ་གི་ གོང་ཚད་ཚུ་ ཡར་སེང་སྦོམ་སྦེ་ར་ འགྱོ་དོ་ཟེར་ཨིན་པས།
དེ་ཡང་ སྤྱི་ཟླ་ ༥ པའི་ཚེས་ ༢༥ ལུ་ ཡུ་ཨེཛ་གི་ ཚོང་འབྲེལ་དུས་སྟོན་ཅིག་ནང་ འཛམ་གླིང་དངུལ་ཁང་གི་འགོ་འཛིན་ ཌེ་ཝིཌ་མཱལ་པཱཛ་གིས་ བཤད་ཡོདཔ་ད་ དེ་མ་ཚད་ ཁོ་གིས་འབད་བ་ཅིན་ རྒྱ་ནག་ལུ་ ནད་ཡམས་ཀོ་ཝིཌ་ལུ་བརྟེན་ཏེ་ འགྲུལ་བཀག་འབད་མི་དེ་གིས་ཡང་ ཧེང་སྐལ་ར་ ཚ་གྱང་ལང་དགོ་པའི་ གཞི་ཅིག་ལུ་ གྱུར་སོང་ཡི་ཟེར་ཨིན་པས།
དེ་བཟུམམའི་ དཔལ་འབྱོར་གྱི་ གནསསྟངས་འདི་ འཛམ་གླིང་འཐོན་སྐྱེད་ཡོངས་འབོར་ལུ་བརྟེན་ཏེ་ ཤེས་ཚུགས་དོ་ཡོདཔ་ལས་ དཔལ་འབྱོར་མཁས་མཆོག་དང་ དངུལ་ཁང་ལྟེ་བ་ཚུ་གིས་ གཟབ་གཟབ་སྦེ་ར་ བརྟག་ཞིབ་འབདཝ་ཨིན་པས་ཟེར་ བཀོད་ཡོདཔ་ཨིན་པའི་གནས་ཚུལ།