ཨི་རཱན་ལུ་ ཧ་མཱཛ་དམག་སྡེའི་ གཙོ་འཛིན་དམར་བསད།

རོའི་ཊརཛ།
སྤྱི་ཟླ་ ༧ པའི་ཚེས་ ༣༡ ལུ་ པེ་ལིཛ་ཊིན་གྱི་ གཡིབ་དམག་སྡེ་ཚན་ ཧ་མཱཛ་གིས་ བཤད་དོ་བཟུམ་འབད་བ་ཅིན་ ཁོང་གི་འགོ་ཁྲིདཔ་ ཨིཛ་མ་ཡེལ་ ཧ་ནི་ཡེ་དེ་ ཨི་རཱན་ལུ་ དམར་བསད་འབད་ནུག་ཟེར་ཨིན་པས།
ཨིཛ་རེལ་གྱི་ གནས་རིམ་གཞི་སྒྱུར་ སྲུང་རྒྱབ་སྡེ་ཚན་གྱིས་ཡང་ དམར་བསད་འབད་ཡོདཔ་ ངེས་བདེན་ཨིནམ་སྦེ་ སླབ་ཡོདཔ་ད་ དེ་ཡང་ ཨི་རཱན་གྱི་ སྲིད་འཛིན་གསརཔ་གིས་ གཞུང་སྐྱོང་འགོ་བཙུགས་ཀྱི་ རྟེན་འབྲེལ་བརྩི་སྲུང་ནང་ འགོ་ཁྲིདཔ་ཚེ་འདས་ཀྱིས་ གྲལ་གཏོགས་འབད་བའི་ཤུལ་ལུ་ དམར་བསད་འབད་ཡོདཔ་ལས་ ཁོང་གིས་ ཞིབ་དཔྱད་ཚུ་འབད་དོ་ཟེར་ཨིན་པས།
ཨི་རཱན་གྱི་སྲིད་འཛིན་ མ་སུད་པེ་ཛེཤ་ཀི་ཡཱན་གྱིས་ ཨི་རཱན་གྱི་ཁ་ཐུག་ལས་ ས་ཁོངས་དང་ བརྩི་བཀུར་ དཔའ་ཉམས་ཚུ་གི་ དྲང་བདེན་ཉེན་སྲུང་ཐོག་ལས་ དྲག་ཐོག་དབང་བཙོང་འབད་མི་ཚུ་གིས་ ཧ་མཱཛ་གི་ འགོ་ཁྲིདཔ་དེ་ རྐུ་གསོད་རྐྱབ་མི་ལུ་ ངན་ལན་འཇལ་ནི་ཨིནམ་སྦེ་ གསུངས་ཡོདཔ་ཨིན་པས།
ཨིན་རུང་ ཨིཛ་རེལ་གྱི་ ཁ་ཐུག་ལས་ གནད་དོན་དེ་གི་སྐོར་ལས་ ག་ནི་ཡང་ སླབ་མ་བཏུབ་པར་ཡོདཔ་ད་ ཨིཛ་རེལ་གྱི་ དམག་སྡེ་གིས་འབད་བ་ཅིན་ ཞི་བའི་མི་སེར་ཚུ་གི་དོན་ལུ་ ཉེན་སྲུང་ལམ་སྟོན་གསརཔ་ གང་རུང་དང་འབྲེལ་ཏེ་ གནས་སྟངས་ཚུ་ བརྟག་དཔྱད་འབད་དོ་ཟེར་ཨིན་པས།
ཡུ་ཨེཛ་གི་ སྲུང་སྐྱོབ་དྲུང་ཆེན་ ལོ་ཡེཌ་ཨོཛ་ཊིན་གྱིས་ ཨིཛ་རེལ་ལུ་ གནོད་འཚུབ་རེ་ བཀལ་བ་ཅིན་ ཡུ་ཨེཛ་གི་ ཁ་ཐུག་ལས་ ཉེན་སྐྱོབ་ཀྱི་ གྲོགས་རམ་ཚུ་འབད་ནི་ཨིན་རུང་ ཕྱད་མདའ་དེ་ རྐྱབ་དགོཔ་སྦེ་ར་མེདཔ་ལས་ དོན་གཅོད་ཀྱི་སྒོ་ལས་ བདེ་ཐབས་བཟོ་ནི་གི་ གོ་སྐབས་ཡོད་ལུགས་ཚུ་ཡང་ བཤད་ནུག་ཟེར་ བཀོད་འདུག་པའི་གནས་ཚུལ།