ཨཱཛ་ཊེ་ལི་ཡ་ལུ་ ལཱ་མང་རབས་ཅིག་ཡོད་རུང་ ལཱ་འབད་མི་ ཉུང་སུ་ཅིག་ལས་མེད་པའི་དཀའ་ངལ།

སི་ཨེན་ཨེན།
སྤྱི་ལོ་ ༢༠༢༠ གི་ ལོ་འགོ་ལུ་ ནད་ཡམས་ཀོ་ཝིཌ་-༡༩ ངོས་འཛིན་བྱུངམ་ད་ ཨཱཛ་ཊེ་ལི་ཡའི་ ས་མཚམས་འཛུལ་སྒོ་ཚུ་བསྡམས་ཏེ་ ཕྱི་མི་ནང་བསྐྱོད་ བཀག་དམ་འབདཝ་ལས་ ཟུར་བརྟག་ས་སྒོ་སྦེ་ སྤྱོད་ནི་གི་དོན་ལུ་ བཟའ་ཁང་ཚུ་ ལངམ་སྦེ་ཡོདཔ་ཨིན་པས།
ད་རེས་ ནད་ཡམས་དང་འབྲེལ་བའི་ བཀག་འཛིན་ཚུ་ ཡངས་ཆག་བཏང་སྟེ་ ནད་ཡམས་ཀོ་ཝིཌ་ཐོབ་མི་ཚུ་ རང་སོའི་ཁྱིམ་ནང་ ཉིན་གྲངས་ ༧ གྱི་ཚབ་ལུ་ ཉིན་གྲངས་ ༥ རེ་ ཟུར་སྡོད་དགོ་དོ་ཡོདཔ་ཨིན་པས།
ད་ཚུན་གྱི་རིང་ལུ་ ཨཱཛ་ཊེ་ལི་ཡའི མི་སེར་ཚུ་ ཕྱིའི་རྒྱལ་ཁབ་ཚུ་ནང་ འགྱོ་ནི་མེད་པར་ བཀག་དམ་འབད་དེ་ བཞག་མི་ཚུ་ ས་མཚམས་བརྒལ་ཏེ་འགྱོ་ནི་ལུ་ འུར་འབྱེལ་འཐབ་སྟེ་ཡོད་རུང་ ནད་ཡམས་མ་ཐོན་གོང་གི་ གནས་ཚད་ཁར་དེ་ མ་ལྷོད་ཟེར་ཨིན་པས།
ཕྱི་མི་ནང་བསྐྱོད་ བཀག་དམ་འབད་ནི་དེ་གིས་ ཚོང་ལཱ་ཚུ་ནང་ ལས་མི་མ་ལང་པའི་ དཀའ་ངལ་ཐོན་ཡོདཔ་མ་ཚད་ སོ་ནམ་ཞིང་པ་ཚུ་ལུ་ཡང་ ལོ་ཐོག་བསྡུ་མི་ ལས་མི་མ་ཐོབ་པའི་ དཀའ་ངལ་ཡོདཔ་ཨིན་པས།
དེ་བཟུམ་སྦེ་ སྨན་ཁང་གི་ ལས་གཡོགཔ་ཚུ་ཡང་ དུས་ཐེབས་ཀྱི་ ལཱ་འབད་དགོཔ་ ཐོན་ཏེ་ཡོདཔ་དང་ བཟོ་བསྐྲུན་གྱི་ ལཱ་འབད་མི་ཚུ་ཡང་ ལཱ་གི་ས་ཁོངས་མ་འདྲཝ་ཚུ་ནང་ ཉུང་སུ་ལས་བརྒལ་ཏེ་ མེདཔ་ཨིན་པས།
ཕྱི་མི་ནང་བསྐྱོད་དང་ ནང་བསྐྱོད་ཆོག་ཐམ་གྱི་ ལཱ་འབད་མི་ལས་སྡེ་ ཨི་ཟི་མའི་གེ་རེཊ་མདོ་ཆེན་ ཟ་ཧཱན་མིཛ་ཏིར་གྱིས་འབད་བ་ཅིན་ དཀའ་ངལ་དེ་ ག་ར་ལུ་ ཐོན་ཏེ་ཡོད་ཟེར་ཨིནམ་ད་ ཁོང་གིས་ བརྡ་དོན་འཕྲུལ་རིག་དང་ མགྲོན་སྐྱོང་ཞབས་ཏོག་ དེ་ལས་ ཨ་ལོ་གཅེས་སྐྱོང་དང་ རྒན་རྒས་སྐྱོང་བཞག་འཐབ་མི་ བཟོ་བསྐྲུན་གྱི་ ལཱ་འབད་མི་ཚུ་ འཚོལ་བའི་བསྒང་ཡོད་ཟེར་ བཤདཔ་ཨིན་པས།
དཀའ་ངལ་དེ་ ནད་ཡམས་ལུ་བརྟེན་ཏེ་ ས་མཚམས་སྒོ་བསྡམས་ནི་དེ་གིས་མ་གཏོགས་ ནང་བསྐྱོད་ཆོག་ཐམ་གྱི་ཐད་ཁར་ ཧེ་མ་ལས་ར་ འབྲེལ་ཟིང་ཅན་ཅིག་ཨིནམ་སྦེ་ མཁས་མཆོག་ཚུ་གིས་ བཤདཔ་ཨིན་པས་ཟེར་ བཀོད་འདུག་པའི་གནས་ཚུལ།