སི་པེན་ལུ་ མགྱོགས་ཤུགས་ཅན་གྱི་ རེ་ལི་ ༢ ཀྱི་བར་ན་ ཐུག་རྐྱེན་བྱུང་ཡོདཔ་ལས་ མི་གྲངས་ ༦༨ ལུ་ཤི་རྐྱེན།

བི་བི་སི།
སི་པེན་རྒྱལ་ཁབ་ཀྱི་ དབུས་ཕྱོགས་ཁ་ཐུག་ལུ་ མགྱོགས་ཤུགས་ཅན་གྱི་ རེ་ལི་ ༢ ཀྱི་བར་ན་ ཐུག་རྐྱེན་བྱུང་ཡོདཔ་ལས་ མི་གྲངས་ ༦༨ དེ་ཅིག་ལུ་ ཤི་རྐྱེན་བྱུང་ཡོདཔ་མ་ཚད་ གཞན་མི་ལེ་ཤ་ཅིག་ལུ་ཡང་ རྨ་སྐྱོན་བྱུང་ནུག།
དེ་ཡང་ སྤྱི་ཟླ་ ༡༠ པའི་ཚོས་ ༢༨ ཀྱི་དྲོ་པ་ མེ་ཌི་རིཌ་ལས་ སེ་ཝིལ་ལེ་ ཁ་ཐུག་ལུ་ འགྲུལ་སྐྱོད་འབད་མི་ རེ་ལི་ཅིག་གིས་ ལམ་ཁར་ལུས་མི་ རེ་ལི་གཞན་ཅིག་གུ་ རྒྱབ་ཁ་ལས་ བརྡུངས་བྱིན་ཡོདཔ་ཨིན་པས།
ད་རེས་ཀྱི་ ཐུག་རྐྱེན་དེ་ གཙོ་བོ་ར་ གློག་རིག་གི་ འཐུས་ཤོར་ལུ་བརྟེན་ཏེ་ བྱུང་ཡོདཔ་སྦེ་ སྐྱེལ་འདྲེན་བློན་པོ་གིས་ བཤད་ཡོདཔ་མ་ཚད་ ད་ཚུན་ མི་ལོ་ ༡༣ གྱི་ ནང་འཁོད་ལུ་ རྒྱལ་ཁབ་དེ་ནང་ དེ་བཟུམ་མའི་ ཐུག་རྐྱེན་བྱུང་མི་དེ་ཡང་ སྦོམ་ཤོས་ཅིག་ཨིནམ་སྦེ་ གསལ་བཤད་འབད་ནུག།
རྐྱེན་ངན་དེ་ནང་ མི་རྐྱེན་མ་བྱུང་མི་ འགྲུལ་པ་ཚུ་གིས་ བཤད་དོ་བཟུམ་འབད་བ་ཅིན་ དེ་སྦེ་ ཐུག་རྐྱེན་བྱུང་པའི་སྐབས་ལུ་ འགྲུལ་པ་ཚུ་ གནམ་ཁར་གཏོར་བཏང་པའི་ཁར་ རག་རོ་ཚུ་གི་ནང་ཡང་ ཚུད་ཡོདཔ་ད་ འགྲུལ་པ་ལ་ལོ་ཅིག་གིས་ ཕྱི་ཁར་ཐོན་ནིའི་དོན་ལས་ སྒོ་སྒྲིག་ཚུ་ཡང་ བཅག་དཀྲུམས་འབད་ཡོདཔ་ལས་ ག་ནི་བ་ འཇིགས་སྣང་ཅན་གྱི་ ཚོར་སྣང་བྱུང་ཡི་ཟེར་ཨིན་པས།
རེ་ལི་དེ་ མེ་ཌི་རོཌ་གི་ ལྷོ་ཁ་ཐུག་ལུ་ ཀི་ལོ་མི་ཊར་ ༡༤༠ དེ་ཅིག་གི་ས་ཁར་ མོ་ར་དང་ ཨོར་གཱཛ་ཁྲོམ་སྡེའི་བར་ན་ ས་གནས་ཀྱི་ དྲོ་པའི་ཆུ་ཚོད་ ༩ དེ་ཅིག་ཁར་ ཐུག་རྐྱེན་བྱུང་ཡོདཔ་སྦེ་བཀོད་ནུག།
སི་པེན་གྱི་ སྐྱེལ་འདྲེན་བློན་པོ་ ཨོཛ་ཀར་པུན་ཊེ་གིས་ སྒེར་གྱི་རེ་ལི་ལས་སྡེ་ ཨི་རི་ཡོ་གིས་ ལག་ལེན་འཐབ་མི་ རེ་ལི་དེ་ནང་ འགྲུལ་པ་ ༡༤༧ དེ་ཅིག་ སྡོད་ནུག་ཟེར་ཨིནམ་ད་ རེ་ལི་གཞན་མི་དེ་ གློག་རིག་ལག་ལེན་འཐབ་མ་བཏུབ་པར་ ལམ་ཁར་ལུས་ཡོད་མི་ལུ་ བརྡུངས་བྱིན་ཡོདཔ་སྦེ་ བཤདཔ་ཨིན་པས་ཟེར་ བཀོད་འདུག་པའི་གནས་ཚུལ།