བོད་ཀྱི་གངས་རི་ལུང་ཕྱོགས་ཅིག་ནང་ ས་ཡོམ་ཤུགས་ཅན་ཅིག་ རྐྱབ་ཡོདཔ་ལས་ མི་གྲངས་ ༡༦ ལུ་ ཤི་རྐྱེན་བྱུང་ཡོདཔ།

བི་བི་སི།
རྒྱ་ནག་གི་ གཞུང་འབྲེལ་བརྡ་བརྒྱུད་ནང་ བཀོད་དོ་བཟུམ་འབད་བ་ཅིན་ བོད་ཀྱི་གངས་རི་ལུང་ཕྱོགས་ཅིག་ནང་ ས་ཡོམ་ཤུགས་ཚད་ མེག་ནི་ཅཱུཌ་ ༧ འབད་མི་ཅིག་ རྐྱབ་ཡོདཔ་ལས་ མི་གྲངས་ ༡༦ དེ་ཅིག་ལུ་ ཤི་རྐྱེན་དང་ ༣༢ དེ་ཅིག་ལུ་ རྨ་སྐྱོན་བྱུང་ནུག་ཟེར་ཨིན་པས།
དེ་ཡང་ སྤྱི་ཟླ་ ༡༠ པའི་ཚེས་ ༢༢ ཀྱི་ ནུབ་མོར་རྐྱབ་མི་ ས་ཡོམ་ལྟེ་བ་དེ་ ནག་ཀུ་ལུང་ཕྱོགས་ཀྱི་ བ་ཀེན་ཚོ་ཁག་ནང་ ཕོག་ཡོདཔ་སྦེ་ ས་གནས་ཀྱི་ གློ་བུར་འཛིན་སྐྱོང་ལས་སྡེ་གིས་ སྙན་ཞུ་འབད་མི་དེ་ ཛིན་ཧྭ་བརྡ་བརྒྱུད་ནང་བཀོད་ནུག།
ཚོ་ཁག་དེ་ རྒྱ་ནག་གིས་ སྤྱི་ལོ་ ༡༩༥༠ ང་གྲངས་ནང་ མངའ་དབང་ལུ་བསྡུ་མི་ བོད་རང་སྐྱོང་ལུང་ཕྱོག་ཀྱི་རྒྱལ་ས་ ལྷ་ས་ལས་ བྱང་ཤར་ཁ་ཐུག་ལུ་ ཀི་ལོ་མི་ཊར་ ༤༠༠ གི་ས་ཁར་ ཆགས་ཏེ་ཡོདཔ་ཨིན་པས།
དེ་བསྒང་ རྡོ་རུད་ཆད་དེ་ སྡོད་ཁྱིམ་ ༣༣༩ དེ་ཅིག་ ཧྲམ་བཏང་ཡོདཔ་མ་ཚད་ གློག་མེ་ཚུ་ལུ་ཡང་ གནོད་སྐྱོན་རྐྱབ་ཡོདཔ་ལས་ དབང་འཛིན་ཚུ་གིས་ གནོད་སྐྱོན་བྱུང་སའི་ ས་ཁོངས་དེ་ནང་ གློ་བུར་གྱི་ ཉེན་སྐྱོབ་སྡེ་ཚན་ཚུ་ བཏང་ཡོདཔ་སྦེ་བཀོད་ནུག།
དེ་བཟུམ་སྦེ་ བོད་ཀྱི་ཁྲོམ་སྡེ་ ཀམ་མདོ་དང་ ཉིང་ཅི་ ༢ ཀྱི་ནང་ཡང་ ས་ཡོམ་སྦོམ་སྦེ་ར་ རྐྱབ་ཡོདཔ་ད་ ས་ཡོམ་དེ་གི་སྐབས་ལུ་ གཡུས་ཁའི་མི་སེར་ཚུ་ སྤྱ་སྡུག་འཐབ་སྟེ་ ཁྲོམ་ཁ་ལུ་ བྱོག་སོང་ཡོདཔ་ཨིན་པས།
འཕྲལ་ཁམས་ཅིག་ཁར་ ཟླཝ་ ༢ མ་ལངམ་ཅིག་གི་ཧེ་མ་ འཁྱེག་རི་ཆད་པའི་སྟབས་ཀྱིས་ བོད་དང་ ནེ་པཱལ་ལུ་ ས་རུད་དང་ ཆུ་རུད་ཐོན་ཏེ་ མི་གྲངས་ ༡,༤༠༠ དེ་ཅིག་ལུ་ ཤི་རྐྱེན་བྱུང་ཡོདཔ་མ་ཚད་ མི་སེར་བརྒྱ་ཕྲག་ལས་བཅད་དེ་ བྱང་སྟོར་ཤོར་མི་ཚུ་ཡང་ ད་ལྟོའི་བར་ན་ འཚོལ་མ་ཐོབ་པར་ཡོདཔ་ཨིན་པས་ཟེར་ བཀོད་འདུག་པའི་གནས་ཚུལ།