འབྲུག་གི་བྱ་རིགས་དུས་སྟོན་ ཐེངས་ ༦ པ་དེ་ སྤྱི་ལོ་ ༢༠༢༦ སྤྱི་ཟླ་ ༡༡ པའི་ཚེས་ ༡༣ དང་ ༡༤ ལུ་ གཞལམ་སྒང་གིས་ འགོ་འདྲེན་འཐབ་ནི།

འབྲུག་གི་ཁྱད་ཆོས་ཅན་གྱི་ བྱ་རིགས་བལྟ་ནིའི་ དུས་སྟོན་སྐབས་ལུ་ གཞལམ་སྒང་གི་ བྱ་རིགས་དང་ སྐྱེ་ལྡན་རིགས་སྣ་ དངོས་གནས་ལམ་སྲོལ་ཚུ་གི་ཉམས་མྱོང་།       

བཟོ་གྲྭ་ཚོང་འབྲེལ་དང་ ལཱ་གཡོག་ལྷན་ཁག་འོག་གི་ བལྟ་བཤལ་ལས་ཁུངས་ཀྱིས་ གཞལམ་སྒང་རྫོང་ཁག་བདག་སྐྱོང་དང་ མཉམ་འབྲེལ་ཐོག་ལས་ འབྲུག་གི་བྱ་རིགས་དུས་སྟོན་ ཐེངས་ ༦ པ་དེ་ སྤྱི་ལོ་ ༢༠༢༦ སྤྱི་ཟླ་ ༡༡ པའི་ཚེས་ ༡༣ དང་ ༡༤ ལུ་ འགོ་འདྲེན་འཐབ་ནི་ཨིན་པས།

དེ་ཡང་ གཞལམ་སྒང་རྫོང་ཁག་དེ་ བྱ་རིགས་བལྟ་མི་དང་ རང་བཞིན་གནས་སྟངས་ལུ་དགའ་མི་ དེ་ལས་ ཉམས་མྱོང་གསར་རྙེད་ཚུ་ནང་ སྤྲོ་བ་ཡོད་མི་ཚུ་ འཛམ་གླིང་མཐའ་དབུས་མེད་པའི་ བལྟ་བཤལ་པ་ཚུ་གི་དོན་ལུ་ འབྲུག་གི་སྐྱེ་ལྡན་བལྟ་བཤལ་གྱི་ ས་གོ་གཙོ་བོ་ཨིནམ་སྦེ་ གནས་ཚུལ་གསར་བཏོན་ནང་བཀོད་ནུག།

གཞལམ་སྒང་དེ་ ཐིམ་ཕུ་ལས་ དུས་ཡུན་ཆུ་ཚོད་ ༨ ཀྱི་ས་ཁར་ འབྲུག་གི་དབུས་ཕྱོགས་ལུ་ ཆགས་ཏེ་ཡོདཔ་ད་ རྫོང་ཁག་དེ་གི་ཕྱོགས་ ༣ ཉེན་སྲུང་ཅན་གྱི་ རྒྱལ་འཛིན་མ་ནཱཛ་རྒྱལ་ཡོངས་གླིང་ག་དང་ འཇིགས་མེད་སེངྒེ་དབང་ཕྱུག་རྒྱལ་ཡོངས་གླིང་ག་ དེ་ལས་ ཁྲུམ་ཤིང་ལ་རྒྱལ་ཡོངས་གླིང་ག་ཚུ་གིས་ མཐའ་བསྐོར་ཏེ་ཡོདཔ་ལས་ བྱ་རིགས་བལྟ་མི་ཚུ་གི་དོན་ལུ་ སྤྲོ་ཉམས་དང་ལྡན་པའི་ ས་ཁོངས་ཅིག་ཨིན་པས།

ལུང་ཕྱོགས་དེ་ནང་ བྱ་རིགས་མ་འདྲཝ་ ༣༥༧ དེ་ཅིག་ཡོད་པའི་ཁར་ ལུང་ཕྱོགས་དེ་གི་ རང་བཞིན་གནས་སྟངས་དང་བསྟུན་ཏེ་ གཅན་གཟན་སྟག་ བེང་གཱལ་ཊའི་གར་ཟེར་མི་དང་ སྤྱ་སེར་གོལ་ཌེན་ལང་གུར་ཟེར་མི་ཚུ་ཡོདཔ་ད་ མང་སྡེ་ཆུ་དང་ གྲང་མེད་ཆུ་གི་ ཆུ་གཞོང་ཚུ་ནང་འབད་བ་ཅིན་ ཆུ་དང་འབྲེལ་བའི་ དཔའ་རྩལ་ཅན་གྱི་ འོས་འབབ་ཡོད་པའི་ ས་གོ་ཅིག་ཨིན་ཟེར་བཀོད་ནུག།

ཉིན་གྲངས་ ༢ ཀྱི་ དུས་སྟོན་དེ་ཡང་ ལས་སྣ་མ་འདྲཝ་ཚུ་གི་སྒོ་ལས་ བྱ་རིགས་བལྟ་ནི་གི་ ལས་སྣ་གོང་འཕེལ་དང་ སྐྱེ་ལྡན་བལྟ་བཤལ་བཙན་ཐབས་ ས་གནས་ཀྱི་དཔལ་འབྱོར་ལུ་ རྒྱབ་སྐྱོར་ཚུ་གི་དོནལས་ བཟོ་སྒྲིགས་འབད་ཡོདཔ་ད་ དུས་སྟོན་གྱི་སྐབས་ལུ་ ས་གནས་དེ་ཁར་འཛོམས་མི་ཚུ་ལུ་ རྒྱལ་ཡོངས་དང་ ས་གནས་ཀྱི་ བྱ་རིགས་མཁས་མཆོག་ཚུ་གིས་ བྱ་རིགས་ཉམས་སྲུང་དང་འབྲེལ་བའི་ གསལ་བཤད་དང་ གློག་བརྙན་ཚུ་ སྟོན་ནི་དང་ ལུས་སྦྱོང་ལུ་ སྤྲོ་བ་ཡོད་མི་ཚུ་གི་དོན་ལས་ སྟིང་སྟིང་སྦིས་ལས་ ཡེ་སྦི་ལབ་རྩའི་བར་ན་ ཀི་ལོ་མི་ཊར་ ༢༡ གི་ རྒྱུག་འགྲན་ཅིག་ཡང་ འགོ་འདྲེན་འཐབ་ནི་ཨིན་པས།

དེ་བཟུམ་སྦེ་ དུས་སྟོན་དེ་ སྤྲོ་བ་ཆེ་ཏོག་ཏོ་སྦེ་ བཟོ་ནིའི་དོན་ལས་ སྦེར་ཏི་ལུ་ གྲུ་གཏང་ནི་དང་ ཉ་བཟུང་ནི་གི་ ལས་རིམ་ཚུ་ཡང་ཡོད་པའི་ཁར་ རང་སོའི་གདོང་ཚུ་ བྱ་རིགས་དང་ རི་དྭགས་སེམས་ཅན་གྱི་ བཟོ་རྣམ་ཅན་སྦེ་ ཚོན་གཏང་ནི་གི་ ལས་རིམ་ཚུ་ཡང་ཡོདཔ་སྦེ་བཀོད་ནུག།

ལམ་སྲོལ་གྱི་ ལས་རིམ་ནང་ དུས་སྟོན་དེ་གི་ གཙོ་རིམ་དང་ ས་གནས་ཀྱི་སྙན་ཆ་ ཞབས་བྲོ་ གར་འཆམ་ཚུ་ཡོད་པའི་ནང་ལས་ འབྲུག་གི་ལམ་སྲོལ་དང་ རང་བཞིན་གནས་སྟངས་ གཅིག་སྒྲིལ་གྱི་ བརྡ་མཚོན་ལུ་ བྱ་རིགས་དང་ འབྲེལ་བའི་ལྟདམོ་ཚུ་ཡང་ བྱ་རིགས་ཀྱི་རྣམ་པའི་ཚུལ་ལུ་ སྟོན་ནི་ཨིན་པས།

བཟའ་ཆས་འགྲེམ་སྟོན་གྱི་ འབྲེལ་སྟེགས་ནང་ལས་ གཞལམ་སྒང་གི་ འཚོ་བའི་བཟའ་འཐུང་ ཁ་རང་དང་ ཉ་མེ་སྐམ་ སྤ་ཚར་ སྦང་ཆང་ལ་སོགས་པ་ཚུ་ཡང་ འཐོབ་ནི་ཨིན་པའི་ཁར་ དུས་སྟོན་ནང་ འཛོམས་མི་ཚུ་གིས་ འབྲུག་གི་ལམ་སྲོལ་ཅན་གྱི་ བཟོ་རིགས་ ༡༣ ནང་ཚུད་པའི་ ཚར་ལས་གྲུབ་པའི་ ནང་ཆས་ཀྱི་རིགས་ ལག་ཅུང་དང་ གཟེམ་ རྒྱན་ཆ་ཚུ་ཡང་ བལྟ་ནི་དང་ ཉོ་ནི་འཐོབ་ཟེར་བཀོད་ནུག།

འབྲུག་རྒྱལ་ཁབ་ནང་ བྱ་རིགས་མ་འདྲཝ་ ༧༧༠ ལྷགཔ་ཅིག་ཡོདཔ་ད་ དེ་ཚུ་གི་གྲས་ཁར་ རྩ་མེད་ཐལ་སྲིད་པའི་ བྱ་རིགས་ཆུ་བྱ་དཀརཔོ་དང་ བྱ་རྒོད་བྱང་ཁོགས་དཀརཔོ་དང་ མཆུ་ཏོག་དམརཔོ་ཚུ་བཟུམ་མའི་ བྱ་རིགས་ཡང་ཡོདཔ་ཨིན་པས།

དེ་འབདཝ་ལས་ འབྲུག་གི་ཉམས་སྲུང་གི་ ཐབས་ལམ་དེ་ཡང་ བྱ་རིགས་བཟུང་ནི་དང་ དཀྲོགས་ནི་མིན་པར་ གཅིག་སྒྲིལ་ཐོག་ལུ་གནས་ཏེ་ ཡུན་བརྟན་ཅན་གྱི་ འཚོ་བའི་ཐབས་ལམ་ལུ་ གཙོ་བོར་བཟུང་དོ་ཡོདཔ་ཨིན་པའི་གནས་ཚུལ།