ཨཱལ་ཇ་ཟི་ར།
ཤར་ལྷོ་ཨེ་ཤི་ཡའི་ ལུང་ཕྱོགས་ནང་ གློག་མེའི་དགོས་མཁོ་ ཡར་སེང་འགྱོ་བའི་ དཀའ་ངལ་སེལ་ཐབས་ལུ་ ས་འོག་གྱུར་རྡོའི་ ཐོན་ཁུངས་ལུ་ མང་སུ་བརྟེན་དགོ་པའི་ གནས་སྟངས་ཤར་ནུག།
ཡུ་ཀེ་ཨེམ་བར་སྡེ་ཚན་གྱི་ སྙན་ཞུ་ལྟར་དུ་འབད་བ་ཅིན་ ཤར་ལྷོ་ཨེ་ཤི་ཡ་ཚོགས་པའི་ རྒྱལ་ཁབ་ཚུ་ནང་ འདས་པའི་ལོ་ནང་ སྤྱིར་སྙོམས་ལུ་ གློག་མེའི་དགོས་མཁོ་ འགྲུབ་ནི་དང་འབྲེལ་ཏེ་ ས་འོག་གྱུར་རྡོའི་ ཐོན་ཁུངས་སྤྱོད་ཚད་ བརྒྱ་ཆ་ ༣.༦ གིས་ ཡར་སེང་སོང་ནུག་ཟེར་ཨིན་པས།
སླར་བྱུང་ནུས་ཤུགས་ཀྱི་ ཐོན་ཚད་དེ་ སྤྱི་ལོ་ ༢༠༢༢ ལུ་ བརྒྱ་ཆ་ ༢༨ ལས་ འདས་པའི་ལོ་ནང་ བརྒྱ་ཆ་ ༢༦ ལུ་ མར་བབས་སོང་ཡོདཔ་ད་ དེ་བཟུམ་སྦེ་ བཙོག་རླུང་ཀཱར་བོན་གྱི་ ཐོན་ཚད་དེ་ཡང་ འདས་པའི་ལོ་ནང་ བརྒྱ་ཆ་ ༦.༦ ཡར་སེང་སོང་ཡོདཔ་ལས་ བཙོག་རླུང་ཀཱར་བཱོན་ ཊཱོན་ས་ཡ་ ༤༤ དེ་ཅིག་གིས་ མཁའ་དབྱིངས་ལུ་ ཧེང་བཀལ་གང་ཡོདཔ་སྦེ་བཀོད་ནུག།
དེ་ཡང་ རྡོ་སོལ་ལུ་བརྟེན་ཏེ་ མཁའ་དབྱིངས་ལུ་ བཙོག་གྲིབ་མང་སུ་ ཕོག་བཅུག་མི་ རྒྱལ་ཁབ་ཚུ་ཡང་ ཝེཊ་ནཱམ་དང་ མ་ལེ་ཤི་ཡ་ ཕི་ལི་པིན་ སིངྒ་པོར་ མཐའ་ཡས་ལེན་ཚུ་ཨིནམ་སྦེ་ བཀོད་དེ་ཡོདཔ་དང་ ལུང་ཕྱོགས་དེ་ནང་ ནུས་ཤུགས་ཀྱི་ གཞི་སྒྱུར་མགྱོགས་དྲགས་མེད་མི་ལུ་བརྟེན་ཏེ་ གནས་གོང་ཆུང་བའི་ ཉི་དྲོད་དང་ རླུང་འཁོར་ཚུ་བཟུམ་མའི་ སླར་བྱུང་ནུས་ཤུགས་ཀྱི་ ཁེ་ཕན་ཚུ་ མི་འཐོབ་ནི་མས་ཟེར་ཨིན་པས།
ཤར་ལྷོ་ཨེ་ཤི་ཡའི་ ལུང་ཕྱོགས་ནང་ ས་འོག་གྱུར་རྡོའི་ཐོན་ཁུངས་ལུ་ གཞི་བརྟེན་འབད་ནི་དེ་ སླར་བྱུང་ནུས་ཤུགས་སྤྱོད་ནི་ལུ་ གཞི་སྒྱུར་མ་འབད་བ་ཅིན་ སླར་བྱུང་ནུས་ཤུགས་ཀྱི་ ཁེ་ཕན་ཚུ་ མ་ཐོབ་པའི་ཁར་ གནམ་གཤིས་གནས་སྟངས་དང་འབྲེལ་བའི་ དམིགས་གཏད་ཚུ་ འགྲུབ་ནི་ལུ་ཡང་ འཐུས་ཤོར་འབྱུང་ནི་མས་ཟེར་ཨིནམ་ད་ ལུང་ཕྱོགས་དེ་ནང་ གློག་མེའི་དགོས་མཁོ་དེ་ ག་ནི་བ་ མགྱོགས་དྲགས་སྦེ་ ཡར་སེང་འགྱོཝ་ལས་ ནུས་ཤུགས་ཀྱི་ དགོས་མཁོ་འགྲུབ་ནི་དེ་ གལ་གནད་ཆེ་དྲགས་ཅིག་ལུ་ གྱུར་ཏེ་ཡོདཔ་སྦེ་བཀོད་ནུག།
ཨེམ་བར་ལས་སྡེ་གིས་ བཤད་དོ་བཟུམ་འབད་བ་ཅིན་ ཡུན་རིང་གི་དོན་ལས་ གོང་གསལ་དཀའ་ངལ་ཚུ་ སེལ་ཐབས་ལུ་ ཉི་དྲོད་དང་ རླུང་འཁོར་ལུ་བརྟེན་པའི་ ནུས་ཤུགས་ཚུ་གིས་ ཁེ་ཕན་སྦོམ་འོང་ནི་དང་ ཆུར་བརྟེན་གློག་མེའི་ཐེད་ཁར་ ཐན་ཤུགས་དང་ ཆར་ཆུ་འབབ་ཚུལ་གྱི་ འགྱུར་བ་ལུ་བརྟེན་ཏེ་ ཏན་ཏན་ཅིག་ར་ མི་འོང་ནི་མས་ཟེར་ཨིན་པས།
རྒྱལ་སྤྱི་ནུས་ཤུགས་ལས་སྡེ་གིས་ ཤར་ལྷོ་ཨེ་ཤི་ཡའི་ ལུང་ཕྱོགས་ནང་ སྤྱི་ལོ་ ༢༠༣༥ འཐོནམ་ད་ གནམ་གཤིས་ཀྱི་ དམིགས་དོན་ཚུ་ འགྲུབ་དགོ་པ་ཅིན་ ཌོ་ལར་ཐེར་འབུམ་ ༡༩༠ དེ་ཅིག་ མ་རྩ་གཞི་བཙུགས་འབད་དགོཔ་ འཐོན་ནི་ཨིནམ་སྦེ་ བཤདཔ་ཨིན་པས་ཟེར་ བཀོད་འདུག་པའི་གནས་ཚུལ།
ཤར་ལྷོ་ཨེ་ཤི་ཡའི་ ལུང་ཕྱོགས་ནང་ ས་འོག་གྱུར་རྡོའི་ ཐོན་ཁུངས་ལུ་ མང་སུ་བརྟེན་དགོ་ནི།
Comments are closed.
Related
རྒྱ་གར་གྱི་རྒྱལ་ས་ དིལླིའི་ས་ཁོངས་ཚུ་ནང་ ངོ་རྒོལ་འབད་མི་ཚུ་འཛིན་བཟུང་།
རོའི་ཊརཛ། སྤྱི་ཟླ་ ༡༠ པའི་ཚེས་ ༡༠ ལུ་ རྒྱ་གར་གྱི་ བཙག་འཐུ་ལྷན་འཛིན་སྤྱི་ཁྱབ་ དགོངས་ཞུ་འབད་དགོཔ་སྦེ་ ངོ་རྒོལ་འབད་མི་ཚུ་ ཁ་ཕྱལ་བཏང་ཐབས་ལུ་ ཉེན་སྲུང་དམག་མི་ཚུ་གིས་ དིལླིའི་ས་ཁོངས་ཚུ་ནང་ འགྲུལ་སྐྱོད་བཀག་དམ་འབད་བའི་ཁཡ་ ཁྲིམས་སྲུང་འགག་སྡེ་གིས་ ངོ་རྒོལ་འབད་མི་ཚུ་ཡང་ བརྒྱ་ཕྲག་ལས་བཅད་དེ་ འཛིན་བཟུང་འབད་ནུག། དེ་བཟུམ་སྦེ་ ཁྲོམ་སྡེའི་ནང་འཁོད་ལུ་ ཁྲིམས་སྲུང་འགག་པ་དང་ ཞི་བའི་དམག་མི་ སྟོང་ཕྲག་ལས་བཅད་དེ་ བཀྲམ་སྤེལ་འབད་ཡོདཔ་མ་ཚད་ ཚོང་འབྲེལ་ལྟེ་བ་དང་ འགྲུལ་འཕྲིན་ཡོངས་འབྲེལ་གྱི་ ཞབས་ཏོག་ཚུ་ཡང་ མཚམས་བཀག་འབད་ནུག། ངོ་རྒོལ་གྱི་ ས་ཁོངས་ཅིག་ཨིན་མི་ ཇཱན་ཏར་མན་ཏར་ལུ་ མི་སྟོང་ཕྲག་ལས་བཅད་དེ་ འཛོམས་ནི་གི་ འཆར་གཞི་ཡོདཔ་ཨིན་རུང་ ངོ་རྒོལ་འགོ་མ་བཙུགས་པའི་ཧེ་མ་ལས་ ཉེན་སྲུང་དམག་མི་ཚུ་གིས་ སྒོ་བསྡམས་ཡོདཔ་ཨིན་པས། ཨིན་རུང་ ཁྲོམ་སྡེའི་ས་གནས་ ལག་བཟོའི་ཚོང་ཁང་དང་ མ་ཧཱཏ་མ་གཱན་དྷིའི་ དྲན་རྟེན་ཚུ་ནང་ ངོ་རྒོལ་འབདཝ་ཨིན་པས་ཟེར་ བཀོད་འདུག་པའི་གནས་ཚུལ།
འགྲོ་བ་མིའི་དབང་ཆའི་ གཙོ་འཛིན་བགྲེསཔ་ ཨམ་ནཱ་ཝི་པི་ལེ་གིས་ འཛམ་གླིང་ཞི་བདེའི་ གཟེངས་རྟགས་ཐོབ་ཡོདཔ།
བི་བི་སི། སྤྱི་ལོ་ ༢༠༢༦ ལོའི་ འཛམ་གླིང་ཞི་བདེའི་གཟེངས་རྟགས་དེ་ འཛམ་གླིང་སྤྱི་ཚོགས་ འགྲོ་བ་མིའི་དབང་ཆའི་ གཙོ་འཛིན་བགྲེསཔ་དང་ རྒྱལ་སྤྱི་ཁྲིམས་འདུན་གྱི་དྲང་དཔོན་ ཨམ་ནཱ་ཝི་པི་ལེ་ལུ་ གནང་ཡོདཔ་ཨིན་པས། ལྷོ་ཨཕ་རི་ཀའི་ དྲང་དཔོན་དེ་གིས་ ཞི་བདེ་དང་ རྒྱལ་སྤྱིའི་ཁྲིམས་ལུགས་ ཡར་དྲགས་གཏང་ནི་ལུ་ བརྩོན་ཤུགས་བསྐྱེད་ཡོད་པའི་ ངོས་འཛིན་བྱུང་ཡོདཔ་མ་ཚད་ རྒྱལ་སྤྱི་ཁྲིམས་ལུགས་ཀྱི་ སྒྲིག་གཞི་ཡོངས་རྫོགས་ཀྱི་དོན་ལུ་ཡང་ ལམ་སྟོན་འབད་ཡོདཔ་སྦེ་ འཛམ་གླིང་ཞི་བདེའི་ གཟེངས་རྟགས་ཚོགས་ཆུང་གིས་ གསལ་བཤད་འབད་ནུག། སྐྱེས་ལོ་ ༨༥ འབད་མི་ ཨམ་པི་ལེ་གིས་ ལོ་ངོ་བཅུ་ཕྲག་ལས་བཅད་དེ་ རེ་ཝང་ཌ་དང་ མི་ཡེན་མར་ གཱ་ཛ་ཚུ་རྩིས་ཏེ་ འགྲོ་བ་མིའི་ཐོབ་དབང་ལུ་ གནོད་སྐྱོན་རྐྱབ་ཡོད་པའི་ ཉེས་འཛུགས་བཀལ་མི་ཚུ་ལུ་ གཞི་བཞག་སྟེ་ མཐོ་རིམ་གྱི་ལཱ་ཚུ་ནང་ བཅའ་མར་གཏོགས་ཡོདཔ་ཨིན་པས། མོ་གི་ཧེ་མའི་ལཱ་ཚུ་ཡང་ ལྷོ་ཨཕ་རི་ཀ་ལུ་ མི་རིགས་དཀར་ནག་ཕྱེ་མི་ལུ་ རྒྱབ་འགལ་འབད་མི་ རྩོལ་འདོད་ཅན་ཚུ་ལུ་ རྒྱབ་སྐྱོར་འབད་ཡོདཔ་ལས་ སྤྱི་ཟླ་ ༡༠ པའི་ཚེས་ ༨ ལུ་ རྒྱལ་ཁབ་ནང་ ཞི་བདེའི་གཟེངས་རྟགས་ཐོབ་མི་ མི་ངོམ་ ༥ པ་ཨིནམ་སྦེ་བཀོད་ནུག། ནོར་ཝེ་ཇིན་ལས་ […]
ཡུ་ཨེཛ་ལུ་ ར་ཤི་ཡའི་ ས་སྣུམ་ཌི་ཟེལ་ ནང་འདྲེན་འབད་ནི་ཨིན་པའི་ གསལ་བསྒྲགས་འབད་ཡོདཔ།
བི་བི་སི། ཨ་མི་རི་ཀའི་སྲིད་འཛིན་ ཌོ་ནཱལ་ཊཱམ་གྱིས་ ཡུ་ཨེཛ་ལུ་ ར་ཤི་ཡའི་ ས་སྣུམ་ཌི་ཟེལ་ ནང་འདྲེན་འབད་ནི་ཨིན་པའི་ གསལ་བསྒྲགས་འབད་མི་ལུ་ ཡུ་ཀེ་རེན་གྱི་སྲིད་འཛིན་ ཝོ་ལོ་ཌི་མིར་ ཟེ་ལེནཛ་ཀི་གིས་ སྐྱོན་བརྗོད་འབད་ནུག། དེ་མ་ཚད་ སྲིད་འཛི་ཟེ་ལེནཛ་ཀི་གིས་ བཤད་དོ་བཟུམ་འབད་བ་ཅིན་ དེ་སྦེ་ ཕྱད་མདའི་ནང་ མ་རྩ་བཙུགས་མི་དེ་ ར་ཤི་ཡའི་སྲིད་འཛིན་ ཝ་ལ་ཌི་མིར་ པུ་ཊིན་ལུ་ གསོལ་རས་སྦེ་ འོང་ནི་མས་ཟེར་ཨིན་པས། སྲིད་འཛིན་པུ་ཊིན་གྱིས་ ཨ་མི་རི་ཀ་དང་ འཛམ་གླིང་ཚོང་འབྲེལ་ནང་ དེ་འཕྲལ་ལས་ ས་སྣུམ་ཌི་ཟེལ་ ཊཱོན་ ༣༠༠,༠༠༠ དེ་ཅིག་ གཏོན་ནི་ཨིནམ་མ་ཚད་ སྤྱི་ཟླ་ ༡༡ པའི་ནང་ ཊཱོན་ ༥༠༠,༠༠༠ དང་ དེ་གི་ཤུལ་ལས་ ས་ཡ་ ༡ གཏོན་ནི་ཨིན་པའི་ ཁས་བླངས་ཡང་འབད་ནུག།