རྒྱ་ནག་གིས་ བཙོན་ཁྲིམས་ཕོག་མི་ བྱང་ཀོ་རི་ཡའི་ མི་ཁུངས་ཚུ་ ལོག་བཏང་ཡོད་པའི་དོགས་པ།

རོའི་ཊརཛ།
བྱང་ཀོ་རི་ཡ་ལུ་ བཙོན་ཁྲིམས་དང་ རྩུབ་སྤྱོད་ཀྱི་ ཉེན་ཁ་ཡོད་མི་ བྱང་ཀོ་རི་ཡའི་མི་ཁུངས་ རྒྱ་ནག་ལུ་ཡོད་མི་ཚུ་ རྒྱ་ནག་གིས་ བྱང་ཀོ་རི་ཡ་ལུ་ ལོག་བཏང་ཡོད་པའི་ དོགས་པ་ཡོདཔ་ལས་ སྤྱི་ཟླ་ ༡༠ པའི་ཚེས་ ༡༣ ལུ་ ལྷོ་ཀོ་རི་ཡ་གིས་ གནད་དོན་དེ་གི་སྐོར་ལས་ རྒྱ་ནག་ལུ་ ཉོག་བཤད་བཀོད་ནུག།
དེ་ཡང་ རྒྱ་ནག་གིས་ བྱང་ཀོ་རི་ཡའི་ མི་ཁུངས་ཚུ་ དབང་བཙོང་ཐོག་ལས་ ལོག་བཏང་མི་དེ་ རྒྱལ་སྤྱིའི་ལམ་ལུགས་ལས་འགལ་བའི་ ལཱ་ཅིག་ཨིནམ་ལས་ བློ་འགྱོད་དགོ་པའི་ གཞི་ཅིག་ཨིནམ་སྦེ་ བཤད་ཡོདཔ་ཨིན་པས།
ལྷོ་ཀོ་རི་ཡའི་ གཅིག་བསྒྲིལ་ལྷན་ཁག་ལས་ ཀུ་བི་ཡོང་སམ་གྱིས་ རྒྱ་ནག་ལུ་ཡོད་མི་ བྱང་ཀོ་རི་ཡའི་ མི་ཁུངས་ལེ་ཤ་ཅིག་ ལོག་སྟེ་ར་ བྱང་ཀོ་རི་ཡ་ལུ་ བཏང་ཡོད་མི་དེ་ བདེནམ་བཟུམ་ཅིག་ཡོད་ཟེར་བཤད་ནུག།
རྒྱ་ནག་གིས་ བྱང་ཀོ་རི་ཡ་ལས་ བྲོས་ཟུར་འབད་དེ་ཡོད་མི་ མི་གྲངས་ ༦༠༠ དེ་ཅིག་ ལོག་བཏང་ཡོད་པའི་ སྙན་ཞུའི་སྐོར་ལས་ རྒྱ་ནག་ཕྱི་འབྲེལ་ལྷན་ཁག་གི་ མགྲིན་ཚབ་ཅིག་གིས་འབད་བ་ཅིན་ བྱང་ཀོ་རི་ཡའི་མི་ཁུངས་ བྲོས་ཟུར་ཐོག་ལས་ རྒྱ་ནག་ལུ་འོང་མི་ཚུ་ དཔལ་འབྱོར་གྱི་དོན་ལུ་ འོང་མིའི་གྲངས་སུ་ བརྩི་སྲོལ་ཡོདཔ་མ་གཏོགས་ བྲོས་ཟུར་གྱི་གྲངས་སུ་ བརྩི་ནི་མེད་ཟེར་ བཤད་ཡོདཔ་ཨིན་པས།
རྒྱ་ནག་ལུ་ ཁྲིམས་འགལ་གྱི་ཐོག་ལས་འོང་མི་ བྱང་ཀོ་རི་ཡའི་ མི་ཁུངས་ཚུ་ ཁོང་རའི་ནང་འཁོད་དང་ རྒྱལ་སྤྱིའི་བཅའ་ཁྲིམས་ཚུ་གི་ གཞི་རྩ་ཚུ་དང་འཁྲིལ་ཏེ་ ལེགས་ཤོམ་སྦེ་ སྐྱོང་བཞག་འཐབ་འོང་ཟེར་ཡང་བཤད་ནུག།
ཨིན་རུང་ ལྷོ་ཀོ་རི་ཡའི་གཞུང་དང་ རྒྱལ་སྤྱི་འགྲོ་བ་མིའི་ ཐོབ་དབང་ལས་ཚོགས་ཚུ་གིས་འབད་བ་ཅིན་ བྱང་ཀོ་རི་ཡའི་མི་ཁུངས་ བཙོན་ཁྲིམས་དང་ རྩུབ་སྤྱོད་ལས་ བྲོས་ཟུར་ཐོག་ རྒྱ་ནག་ལུ་ འགྱོ་མི་ཚུ་ སླར་ལོག་བཏང་པའི་ཤུལ་ལུ་ བྱང་ཀོ་རིའི་ དབང་འཛིན་ཚུ་གིས་ ཉེན་ཁ་ཅན་གྱི་ རྩུབ་སྤྱོད་འབད་འོང་ཟེར་ བཤད་ཡོད་པའི་སྐོར་ལས་ བཀོད་འདུག་པའི་གནས་ཚུལ།