ཨེན་ཌི་ཊི་ཝི།
སྤྱི་ཟླ་ ༨ པའི་ཚེས་ ༩ ལས་ ཏཱ་ཡེ་ཝཱན་ལུ་ རྒྱ་ནག་གིས་ དབང་གནོན་འབད་ནི་ལས་ སྲུང་སྐྱོབ་འབད་ཐབས་ལུ་ ཏཱ་ཡེ་ཝཱན་གྱིས་ དམག་སྦྱོང་ལས་འཆར་ བསྟར་སྤྱོད་འབད་ནི་ འགོ་བཙུགས་ཡོདཔ་ཨིན་པས།
དེ་ཡང་ འདས་པའི་བདུན་ཕྲག་ནང་ལས་ ཨ་མི་རི་ཀའི་ཚོགས་དཔོན་ ཨམ་ནེན་སི་ པོ་ལོ་སི་གིས་ ཏཱ་ཡེ་ཝཱན་ མཚོ་གླིང་རྒྱལ་ཁབ་ནང་ གཟིགས་སྐོར་གནང་པའི་ཤུལ་ལུ་ རྒྱ་ནག་གིས་ དྲག་པོའི་གདོང་ལན་བཟུམ་ཅིག་སྦེ་ དམག་སྦྱོང་ལས་རིམ་ འགོ་བཙུགས་ནུག།
ཏཱ་ཡེ་ཝཱན་དམག་སྡེའི་ མགྲིན་ཚབ་ཅིག་གིས་ བཤད་དོ་བཟུམ་འབད་བ་ཅིན་ ཏཱ་ཡེ་ཝཱན་ རྒྱལ་ཁབ་ཀྱི་ལྷོ་ཕྱོགས་ ས་གནས་པིང་ཏུང་ལུ་ ཀྲོབ་མདའ་དང་ སྟོབས་མཚོན་ཚུ་ ལག་ལེན་འཐབ་ཐོག་ལས་ དམག་སྦྱོང་རིག་རྩལ་ འགོ་འདྲེན་འཐབ་དོ་ཟེར་ཨིན་པས།
རྒྱ་ནག་གིས་ ཞི་བདེའི་ཐོག་ལས་ འགྱོ་མ་བཏུབ་པ་ཅིན་ དབང་བཙོང་གི་སྒོ་ལས་ རྒྱ་མིའི་མངའ་འོག་ལུ་ བཙུགས་ནི་སྦེ་ཡོད་མི་ ཏཱ་ཡེ་ཝཱན་ རྒྱལ་ཁབ་དེ་ དུས་རྒྱུན་ར་ འཇིགས་སྐུལ་གྱི་འོག་ལུ་ སྡོད་དགོཔ་བྱུངམ་ཨིན་པས།
དེ་འབདཝ་ལས་ ཏཱ་ཡེ་ཝཱན་ དམག་སྦྱོང་གི་ ལས་འཆར་དེ་ གྲ་སྒྲིག་ཐོག་ལུ་ཡོད་རུང་ རྒྱ་ནག་གི་ དམག་སྦྱོང་བསྟར་སྤྱོད་ལུ་ ལན་མ་འཇལ་བར་ཡོདཔ་ཨིན་པས་ཟེར་ བཀོད་འདུག་པའི་གནས་ཚུལ།
