ཡུ་ཨེཛ་གི་ རྒྱལ་ཁམས་དྲུང་ཆེན་ བི་ལིང་ཀེན་གྱིས་ རྒྱ་ནག་གི་ དོན་གཅོདཔ་མཐོ་ཤོས་ ཝང་ཡི་དང་གཅིག་ཁར་གསུང་གྲོས།

རོའི་ཊརཛ།
སྤྱི་ཟླ་ ༤ པའི་ཚེས་ ༢༦ ལུ་ ཡུ་ཨེཛ་གི་ རྒྱལ་ཁམས་དྲུང་ཆེན་ ཨེན་ཊོ་ནི་ བི་ལིང་ཀེན་གྱིས་ བཤད་དོ་བཟུམ་འབད་བ་ཅིན་ རྒྱ་ནག་གིས་ ར་ཤི་ཡ་ལུ་ དམག་གི་རྒྱབ་སྐྱོར་འབད་མི་ལུ་ ཚ་གྱང་ཡོད་ལུགས་དང་ གནད་དོན་དེ་ལུ་བརྟེན་ཏེ་ རྒྱ་ནག་དང་ ཡུ་ཨེཛ་གི་བར་ན་ འཕྲལ་ཁམས་ཅིག་ཁར་ མཐུན་ལམ་ལེགས་སྒྱུར་འབད་མི་ལུ་ ཐོ་ཕོག་ནི་བཟུམ་ཅིག་ཡོད་ཟེར་ཨིན་པས།
དེ་ཡང་ བི་ལིང་ཀེན་གྱིས་ རྒྱ་ནག་གི་ དོན་གཅོདཔ་མཐོ་ཤོས་ ཝང་ཡི་དང་གཅིག་ཁར་ དུས་ཡུན་ཆུ་ཚོད་ཕྱེད་དང་ ༦ གི་རིང་ལུ་ གསུང་གྲོས་གནང་ཡོད་རུང་ རྒྱ་ནག་གི་ རིན་ཐང་ཆུང་བའི་ཅ་ཆས་ ཚོག་སྒྱུར་དང་འབྲེལ་བའི་ ཉོག་བཤད་ཚུ་གི་སྐོར་ལས་ ཉོག་སེལ་གྱི་ ཐབས་ལམ་ཚུ་ ག་ནི་ཡང་ བཏོན་མ་ཚུགས་ཟེར་ཨིན་པས།
ཡུ་ཨེཛ་གཞུང་གི་མགྲིན་ཚབ་ མེ་ཐིའུ་མི་ལར་གྱིས་འབད་བ་ཅིན་ བི་ལིང་ཀེན་གྱིས་ ར་ཤི་ཡ་ལུ་ རྒྱ་ནག་གི་ རྒྱབ་སྐྱོར་སྐོར་ལས་དང་ གཞན་ཡང་ ཏ་ཡེ་ཝཱན་དང་ རྒྱ་ནག་ལྷོ་ཕྱོགས་ཀྱི་ རྒྱ་མཚོའི་རྩོད་རྙོགས་ཚུ་གི་སྐོར་ལས་ཡང་ ལོ་རྒྱུས་ཚུ་ སླབ་ཅི་ཟེར་ཨིན་པས།
ར་ཤི་ཡ་དང་ རྒྱ་ནག་གི་བར་ན་ ཐོགས་ཆག་མེད་པའི་ མཉམ་འབྲེལ་གྱི་ ཁས་ལེན་གྲུབ་སྟེ་ཡོད་རུང་ ད་ཚུན་གྱི་བར་ན་ རྒྱ་ནག་གིས་ ར་ཤི་ཡ་ལུ་ ཡུ་ཀེ་རེན་གྱི་ཕྱད་མདའ་དང་འབྲེལ་བ་ མཚོན་ཆུ་ཚུ་ ག་ནི་ཡང་ མ་བྱིན་རུང་ ཡུ་ཨེཛ་གིས་འབད་བ་ཅིན་ རྒྱ་ནག་གི་ སྡེ་ཚན་ཚུ་གིས་ ར་ཤི་ཡའི་ མཚོན་ཆའི་བཟོ་གྲྭ་ཁང་ཚུ་ནང་ གྲོགས་རམ་འབད་མི་ལུ་བརྟེན་ཏེ་ ར་ཤི་ཡ་དང་ ཡུ་ཀེ་རེན་བར་ནའི་ ཕྱད་མདའ་དེ་ གནས་སྟངས་མ་འདྲཝ་ཅིག་ལུ་ གྱུར་ཏེ་ཡོད་པའི་ ཉེན་བརྡ་འབད་ནུག།
རྒྱ་ནག་གིས་འབད་བ་ཅིན་ ཁོང་གི་ཁ་ཐུག་ལས་ ག་ལུ་ཡང་ མཚོན་ཆ་ཚུ་ བྱིད་བྱིནམ་མེདཔ་མ་ཚད་ ཡུ་ཀེ་རེན་གྱི་ བྲེལ་ཟིང་ནང་ཡང་ གྲལ་གཏོགས་མེདཔ་ལས་ རྒྱ་ནག་དང་ ར་ཤི་ཡ་གི་བར་ན་ཡོད་མི་ དུས་རྒྱུན་གྱི་ མཐུན་ལམ་ལུ་ བཀག་ཆ་དང་ བར་ཆད་རྐྱབ་ནི་ མི་འོང་ནི་ཨིན་པའི་སྐོར་ལས་ བཤདཔ་ཨིན་པས་ཟེར་ བཀོད་འདུག་པའི་གནས་ཚུལ།