ཡུ་ཀེ་རེན་གྱི་ མཁའ་དམག་གནམ་གྲུ་ཆུང་བ་ ཌཱོན་ཚུ་གིས་ ར་ཤི་ཡ་ལུ་ གནོད་འཚུབས་སྦོམ་བཀལ་ཡོདཔ།

སི་ཨེན་ཨེན།
ར་ཤི་ཡ་གིས་ ཡུ་ཀེ་རེན་ རྒྱལ་ཁབ་ནང་ བཙན་འཛུལ་ཐོག་ལས་ ཕྱད་མདའ་རྐྱབ་མི་ལུ་ ད་རེས་ ཡུ་ཀེ་རེན་གྱི་ ཁ་ཐུག་ལས་ གདོང་ལན་འབད་བའི་ནང་གསེས་ ར་ཤི་ཡའི་ ས་ཁོངས་ནང་ མཁའ་དམག་གནམ་གྲུ་ཆུང་བ་ ཌཱོན་ཚུ་གིས་ གནོད་འཚུབ་སྦོམ་སྦེ་ར་ བཀལ་ཡོདཔ་ད་ དེ་བཟུམ་སྦེ་ ར་ཤི་ཡའི་ ཁ་ཐུག་ལས་ཡང་ ཡུ་ཀེ་རེན་གྱི་ རྒྱལ་ས་ཀི་ཡེབ་ལུ་ རྫས་བམ་ཚུ་ བསྐྱུར་ཡོདཔ་ལས་ མི་ ༢ ལུ་ ཤི་རྐྱེན་བྱུང་ནུག།.
དེ་ཡང་ སྤྱི་ཟླ་ ༨ པའི་ཚེས་ ༣༠ ལུ་ མོཛ་ཀོ་གིས་གཙོས་པའི་ ར་ཤི་ཡའི་ ས་ཁོངས་ ༦ ལུ་ གནོད་འཚུབ་བཀལ་ཡོདཔ་མ་ཚད་ ཨེཛ་ཊོ་ནི་ཡའི་ ས་མཚམས་ཁར་ཡོད་མི་ ཚོང་ཁྲོམ་པེཛ་ཀོབ་ལུ་ཡང་ གནམ་ཐང་ཅིག་ནང་ མཁའ་དམག་གནམ་གྲུ་ཆུང་བ་ཚུ་གིས་ དོས་ཆས་སྐྱེལ་འདྲེན་གྱི་ གནམ་གྲུ་དག་པ་ཅིག་ར་ མེདཔ་བཏང་ཡོདཔ་ཨིན་པས།
ར་ཤི་ཡའི་ འགོ་དཔོན་ཚུ་གིས་ རྐྱེན་ངན་དེ་ནང་ མི་ལུ་ཤི་རྐྱེན་བྱུང་ཡོད་པའི་ སྙན་ཞུ་མ་འབད་རུང་ ཁོང་གི་ཁ་ཐུག་ལས་ཡང་ གནོད་འཚུབ་མང་ཤོས་ཅིག་ར་ ནུས་མེད་བཟོ་ཡོད་པའི་ གསལ་བསྒྲགས་འབད་ནུག།
ཡུ་ཀེ་རེན་གྱི་ འགོ་དཔོན་ཚུ་གིས་ བཤད་དོ་བཟུམ་འབད་བ་ཅིན་ ར་ཤི་ཡ་གིས་ གནམ་ནུབ་མོར་ རྫས་བམ་ཚུ་ བཀོག་བའི་སྐབས་ལུ་ ཁོང་གི་རྒྱལ་ས་ ཀི་ཡེབ་ལུ་ ཕོག་ཅི་ཟེར་ཨིན་པས།
ཀི་ཡེབ་ཁྲོམ་གྱི་ དམག་སྡེ་འཛིན་སྐྱོང་འགོ་འཛིན་གྱིས་ དུས་ཅི་ གནམ་སེར་ཁ་ལས་ཚུར་ དེ་བཟུམ་མའི་ རྫས་བམ་ཤུགས་ཅན་བཀོག་སར་ མ་མཐོང་ཟེར་ མི་སྡེ་བརྡ་བརྒྱུད་ ཊེ་ལི་ག་རམ་ནང་བཀོད་ནུག།
དེ་མ་ཚད་ མཁའ་དམག་གནམ་གྲུ་ཆུང་བ་ ཌཱོན་སྡེ་ཚན་དག་པ་ཅིག་དང་ མགྱོགས་ཤུགས་ཅན་གྱི་ རྫས་བམ་མི་ཛ་ཡེལ་ཚུ་ཡང་ ཀི་ཡེབ་ཕྱོགས་ལུ་ འཕུར་ས་མཐོང་ཡོདཔ་ལས་ སྲུང་སྐྱོབ་དམག་མི་ཚུ་གིས་ མཁའ་གྲུ་ཌཱོན་དང་ མི་ཛ་ཡེལ་ ༢༠ ལྷགཔ་ཅིག་ མེདཔ་བཏང་ཡོདཔ་སྦེ་ བཤདཔ་ཨིན་པས་ཟེར་ བཀོད་འདུག་པའི་གནས་ཚུལ།