འཛམ་གླིང་སྤྱི་ཚོགས་ཀྱི་ ཡོངས་ཁྱབ་ཞལ་འཛོམས་ནང་ལས་ པེ་ལིཛ་ཊིན་གྱི་ ས་གནས་ག་ཟ་ལུ་ ཕྱད་མདའ་མཚམས་འཇོག་ལུ་རྒྱབ་སྐྱོར།

ཨཱལ་ཇ་ཟི་ར།
འཛམ་གླིང་སྤྱི་ཚོགས་ཀྱི་ ཡོངས་ཁྱབ་ཞལ་འཛོམས་ནང་ལས་ པེ་ལིཛ་ཊིན་གྱི་ ས་གནས་ག་ཟ་ལུ་ དེ་འཕྲལ་ལས་ ཕྱད་མདའ་མཚམས་འཇོག་འབད་དགོ་པའི་ ཚོགས་རྒྱན་བསྐྱུར་ཡོདཔ་ད་ པེ་ལིཛ་ཊིན་གྱི་ སྐྱབས་བཅོལ་བའི་ མི་སེར་ཚུ་གི་དོན་ལུ་ཡོད་མི་ འཛམ་གླིང་སྤྱི་ཚོགས་ཀྱི་ ལས་སྡེ་ལུ་ཡང་ རྒྱབ་སྐྱོར་འབད་དགོ་པའི་ བརྗོད་དོན་ཚུ་བཀོད་ནུག།
དེ་ཡང་ སྤྱི་ཟླ་ ༡༢ པའི་ཚེས་ ༡༡ ལུ་ འཛམ་གླིང་སྤྱི་ཚོགས་ཀྱི་ ཡོངས་ཁྱབ་ཞལ་འཛོམས་ནང་ལས་བཏོན་མི་ གྲོས་ཆོད་ལྟར་དུ་འབད་བ་ཅིན་ ག་ཟ་ལུ་ ཕྱད་མདའ་དེ་ གནས་ཚིག་གང་ཡང་ བཀོད་ནི་མེད་པའི་སྒོ་ལས་ གཏན་འཇགས་ཀྱི་དོན་ལུ་ དེ་འཕྲལ་ལས་ འཕྲོ་བཅད་དགོཔ་སྦེ་ འཐུས་མི་ ༡༩༣ འབད་ས་ལས་ ༡༥༨ ཀྱིས་ རྒྱབ་སྐྱོར་ཡོདཔ་སྦེ་ ཚོགས་རྒྱན་བསྐྱུར་ཡོདཔ་ད་ འཐུས་མི་ ༡༣ གྱིས་ གྲལ་གཏོགས་མ་འབདཝ་ཨིན་པས།
ཡོངས་ཁྱབ་ཞལ་འཛོམས་ཀྱི་ གྲོས་ཆོད་ ༢ པའི་ནང་ ཨིཛ་རེལ་གྱིས་ ཁྲིམས་ལུགས་གསར་བརྩམས་ཐོག་ལས་ ཨིཛ་རེལ་ལུ་ འཛམ་གླིང་སྤྱི་ཚོགས་ཀྱི་ ལས་དོན་ཚུ་ བཀག་དམ་འབད་ནི་སྦེ་ཡོད་མི་དང་འབྲེལ་ཏེ་ ཨིཛ་རེལ་ལུ་ ཁ་ཉེས་བཀལ་ནི་དང་ འཛམ་གླིང་སྤྱི་ཚོགས་ཀྱི་ པེ་ལིཛ་ཊིན་གྱི་ སྐྱབས་བཅོལ་བ་ཚུ་གི་དོན་ལུ་ རྒུད་གསོའི་ལས་སྡེ་ལུ་ རྒྱབ་སྐྱོར་འབད་ནི་གི་ བརྗོད་དོན་དང་འབྲེལ་ཏེ་ ཚོགས་རྒྱན་བཙུགསཔ་ད་ འཐུས་མི་ ༡༥༩ གིས་ རྒྱབ་སྐྱོར་ཡོད་པའི་ ཚོགས་རྒྱན་བཙུགས་ཡོད་རུང་ འཐུས་མི་ ༡༡ གིས་ གྲལ་གཏོགས་མ་འབད་ནུག།
ཡོངས་ཁྱབ་ཞལ་འཛོམས་ཀྱི་ གྲོས་ཆོད་དང་འཁྲིལཝ་ད་ སྐྱབས་བཅོལ་བ་ཚུ་གི་ རྒུད་གསོ་ལས་སྡེའི་ འགན་ཁུར་དང་ ཐོབ་དབང་ཚུ་ལུ་ ཨིཛ་རེལ་གྱིས་ རྩིས་མཐོང་བསྐྱེད་དགོ་པའི་ཁར་ ཨིཛ་རེལ་གཞུང་གིས་ རྒྱལ་སྤྱིའི་འགན་ཁུར་ཚུ་ལུ་ བརྩི་འཇོག་ཐོག་ལས་ ས་གནས་ག་ཟའི་ནང་འཁོད་ལུ་ འགྲོ་བ་མིའི་གྲོགས་རམ་ཚུ་ ཐོགས་ཆག་མེད་པར་ བརྒྱུད་སྤེལ་འབད་དགོ་པའི་ དགོས་མཁོ་ཚུ་ཡང་ གསལ་བཀོད་འབད་ནུག་ཟེར་ བཀོད་འདུག་པའི་གནས་ཚུལ།