རོའི་ཊརཛ།
སྤྱི་ཟླ་ ༡༡ པའི་ཚེས་ ༦ ལུ་ འཛམ་གླིང་སྤྱི་ཚོགས་ སྐྱབས་བཅོལ་ལས་སྡེ་གིས་ མི་སེར་ས་ཡ་ ༩༠ དེ་ཅིག་ གནམ་གཤིས་དང་འབྲེལ་བའི་ ཆུ་རུད་དང་ ཚ་དྲོད་ཆེ་བའི་ རྒྱལ་ཁབ་ཚུ་ནང་ སྡོད་དོ་ཡོད་པའི་སྐོར་ལས་ གསལ་བཤད་འབད་ནུག།
དེ་ཡང་ འཛམ་གླིང་ནང་ བཙན་དབང་ཐོག་ལས་ གནས་སྤོ་འགྱོ་མི་ བཞི་དཔྱ་ ༣ དེ་ཅིག་ ཨཱཕ་གྷ་ནིཛ་ཏཱན་དང་ བང་ལ་དེཤ་བཟུམ་མའི་ རྒྱལ་ཁབ་ཚུ་ནང་ སྡོད་དོ་ཡོདཔ་སྦེ་ ཊར་ཀིའི་ཁྲོམ་ཚོགས་ ཨེན་ཊ་ལི་ཡ་ལུ་ འཛམ་གླིང་སྤྱི་ཚོགས་ གནམ་གཤིས་འགྱུར་བགྲོད་ཀྱི་ ཞལ་འཛོམས་ཀྱི་ཧེ་མར་ འཛམ་གླིང་སྤྱི་ཚོགས་ སྐྱབས་བཅོལ་ལས་སྡེ་གིས་ དཔར་བསྐྲུན་འབད་མི་ སྙན་ཞུའི་ནང་ བཀོད་ཡོདཔ་ཨིན་པས།
དེ་མ་ཚད་ སྙན་ཞུའི་ནང་ ཞིབ་འཚོལ་གྱི་ གྲུབ་འབྲས་ཚུ་གིས་ འཁྲུག་རྩོད་དང་ གནས་སྤོ་འགྱོ་མི་ དེ་ལས་ གནམ་གཤིས་འགྱུར་བགྲོད་ཀྱི་བར་ན་ གཅིག་མཚུངས་མཐོང་དོ་ཡོདཔ་སྦེ་བཀོད་ནུག།
ད་རུང་ འཛམ་གླིང་སྤྱི་ཚོགས་ སྐྱབས་བཅོལ་ལས་སྡེའི་ ལག་ལེན་ལས་རོགས་འགོ་དཔོན་གྱིས་ བཤད་དོ་བཟུམ་འབད་བ་ཅིན་ གནམ་གཤིས་གནས་སྟངས་ལུ་བརྟེན་ཏེ་ ཉམ་ཆུང་དང་ གནས་སྤོ་འགྱོ་ཚུ་གི་ ས་ཁོངས་ཚུ་ནང་ གནོད་སྐྱོན་བྱུང་སྟེ་ཡོད་ཟེར་ཨིན་པས།
Leave a Reply