གངས་རི་ཨི་བེ་རེཛ་གི་ གཞི་སྒར་ཉེ་འདབས་ལུ་ གནམ་གྲུ་ཧེ་ལི་ཀོབ་ཊར་ ༢ ཐུག་རྐྱེན་བྱུང་མིའི་ནང་ རྒྱ་གར་གྱི་ བལྟ་བཤལཔ་ཅིག་ལུ་ཤི་རྐྱེན།

བི་བི་སི།

སྤྱི་ཟླ་ ༡༡ པའི་ཚེས་ ༣ ལུ་ གངས་རི་ཨི་བེ་རེཛ་གི་ གཞི་སྒར་ཉེ་འདབས་ལུ་ གནམ་གྲུ་ཧེ་ལི་ཀོབ་ཊར་ ༢ ཆགས་ནི་འབད་བའི་སྐབས་ལུ་ ཐུག་རྐྱེན་བྱུང་ཡོདཔ་ལས་ རྒྱ་གར་གྱི་ བལྟ་བཤལཔ་ཅིག་ལུ་ ཤི་རྐྱེན་བྱུང་ནུག།

དེ་ཡང་ གངས་རི་ཨི་བེ་རེཛ་གི་ ལྷོ་ཁ་ཐུག་ལུ་ ཀི་ལོ་མི་ཊར་ ༡༢ དེ་ཅིག་གི་ས་ཁར་ ཕེ་རི་ཅེ་ཟེར་ས་ལུ་ ས་གནས་ཀྱི་ དྲོ་པའི་ཆུ་ཚོད་ ༨ དང་ སྐར་མ་ ༡༥ དེ་ཅིག་ཁར་ ཆགས་ནི་འབདཝ་ད་ གནམ་གྲུ་གཅིག་གིས་གཅིག་གི་གཤོག་ཐེག་ བཏོག་བཏང་ནུག་ཟེར་ཨིན་པས།

ཧེ་ལི་ཀོབ་ཊར་ལས་སྡེ་ ཕིཤ་ཊེལ་ཨེ་ཡར་གྱིས་ གནམ་གྲུ་ཐུག་རྐྱེན་ནང་ ཤི་རྐྱེན་བྱུང་མི་ རྒྱ་གར་ལས་ཨིན་པའི་ ཕོ་སྐྱེས་དེ་ ཝ་སཱན་ཀུ་མར་ བཱ་ལ་ར་མུ་ཌུ་ཨིན་པའི་ ངོས་འཛིན་འབད་ནུག།

ཧེ་ལི་ཀོབ་ཊར་ལས་སྡེ་གིས་ བཤད་དོ་བཟུམ་འབད་བ་ཅིན་ དེ་སྦེ་ ཐུག་རྐྱེན་བྱུང་པའི་སྐབས་ལུ་ ཁོང་གི་སྣུམ་འཁོར་ ༡ ཡང་ འབྲེལ་གཏོགས་འབད་དེ་ཡོདཔ་ད་ དེ་བསྒང་ འགྲུལ་པ་གཞན་ ༡ དང་ ཧེ་ལི་ཀོབ་ཊར་གྱི་ དེད་དཔོན་ ༡ ལུ་ཡང་ རྨ་སྐྱོན་བྱུང་ནུག་ཟེར་ཨིན་པས།

དེ་བཟུམ་མའི་ གནམ་གྲུ་ཐུག་རྐྱེན་སྐབས་ལུ་ རྨ་སྐྱོན་བྱུང་མི་ འགྲུལ་པ་དང་ གནམ་གྲུའི་ལས་བྱེདཔ་ཚུ་ ནེ་པཱལ་ཀཋ་པཱན་ཌུ་ལུ་ སྨན་བཅོས་འབད་བར་ བསྐྱལ་ཡོདཔ་ད་ དེ་སྦེ་ རྨ་སྐྱོན་བྱུང་མི་ཚུ་གི་གྲས་ལས་ བལྟ་བཤལཔ་ ༡ ནིའུ་ཛར་ལེན་ལས་ཨིན་པའི་ ངོས་འཛིན་བྱུང་ནུག།

ཐུག་རྐྱེན་དེ་ཡང་ གནམ་གྲུ་ཧེ་ལི་ཀོབ་ཊར་ ༢ ས་གནས་ཅིག་ནང་ ཆགས་ནི་འབད་བའི་སྐབས་ལུ་ བྱུང་ཡོདཔ་སྦེ་  ནེ་པཱལ་གྱི་ ཞི་བའི་མཁའ་འགྲུལ་དབང་འཛིན་གྱིས་ བཤདཔ་ཨིན་པས་ཟེར་ བཀོད་འདུག་པའི་གནས་ཚུལ།