ནིའུ་ཡོག་གི་ ཁྲོམ་སྡེ་ཅིག་ནང་ ཁང་ཚན་ཅན་གྱི་ སྒྲིང་ཁྱིམ་ཅིག་ལུ་ མེ་རྐྱེན་བྱུང་ཡོདཔ་ལས་ མི་གྲངས་ ༦ ལུ་ཤི་རྐྱེན།

བི་བི་སི།
སྤྱི་ཟླ་ ༡༡ པའི་ཚེས་ ༥ ལུ་ ནིའུ་ཡོག་གི་ཁྲོམ་སྡེ་ བུ་རུག་ལིན་ཟེར་སར་ ཁང་ཚན་ཅན་གྱི་ སྒྲིང་ཁྱིམ་ཅིག་ལུ་ མེ་རྐྱེན་བྱུང་ཡོདཔ་ལས་ མི་གྲངས་ ༦ དེ་ཅིག་ལུ་ ཤི་རྐྱེན་དང་ གཞན་མི་ལེ་ཤ་ཅིག་ལུ་ རྨ་སྐྱོན་བྱུང་ནུག།
མེ་རྐྱེན་དེ་ཡང་ ས་གནས་ཀྱི་ དྲོ་པའི་ཆུ་ཚོད་ ༡ དང་ སྐར་མ་ ༤༠ དེ་ཅིག་ཁར་ འགོ་དང་པ་ བྱུང་ཡོད་པའི་ སྙན་ཞུ་ཐོབ་པའིི་ཤུལ་ལས་ མེ་བསད་སྡེ་ཚན་དང་ གློ་བུར་གྱི་ གསོ་བའི་ལས་བྱེདཔ་ ༢༣༠ ལྷགཔ་ཅིག་ སཱན་སེཊ་གླིང་གའི་ ཉེ་འདབས་ཀྱི་ ས་གནས་ནང་ བཏང་ཡོདཔ་ཨིན་པས།
མེ་རྐྱེན་དེ་ ག་ཅི་ལུ་བརྟེན་ཏེ་ བྱུང་ཡོདཔ་ཨིན་ནའི་སྐོར་ལས་ མ་ཤེས་ཏེ་འབད་རུང་ ཞིབ་དཔྱད་འབད་དོ་ཡོདཔ་སྦེ་ ནིའུ་ཡོག་ཁྲོམ་སྡེའི་ མེ་བསད་ལས་ཁུངས་ཀྱི་ འགོ་དཔོན་ཚུ་གིས་ གསལ་བཤད་འབད་ནུག།
ལི་ཐི་ཡམ་ཨའི་འོན་གྱི་ འཕྲུལ་ལྟོ་ཡོད་མི་ལུ་བརྟེན་ཏེ་ ཉེན་ཁ་ཅན་གྱི་ རྒྱུ་དངོས་ཚུ་ལུ་ མཁས་མཆོག་ཨིན་མི་ ལས་བྱེདཔ་ཚུ་ཡང་ ས་གནས་དེ་ཁར་ བཏང་ཡོད་རུང་ མེ་རྐྱེན་དེ་དང་ འབྲེལ་བ་ཡོད་མེད་ གསལ་ཏོག་ཏོ་ཅིག་ མ་ཤེས་པར་ཡོདཔ་ཨིན་པས།
ས་གནས་དེ་ཁར་ གློ་བུར་གྱི་ ལས་བྱེདཔ་ཚུ་ ལྷོད་པའི་སྐབས་ལུ་ སྒྲིང་ཁྱིམ་གྱི་ ཐོག་ ༡ པ་དང་ ༢ པ་དེ་ མེ་གིས་འཚིགས་ཡོད་པའི་ ཤེས་རྟོགས་བྱུང་ནུག།
ཤི་རྐྱེན་བྱུང་མི་ཚུ་གི་གྲས་ལས་ མི་ ༤ གི་ཕུངམོ་ཚུ་ ས་གནས་དེ་ཁ་ལས་ ཐོབ་ཡོདཔ་ད་ གཞན་མི་ ༢ པོ་དེ་ གནས་སྟངས་སྐྱོ་དྲགས་སྦེ་ སྨན་ཁང་ནང་ སྐྱེལ་བའི་བར་ན་ ཤི་རྐྱེན་བྱུང་ཡོདཔ་ཨིན་པས།
མེ་རྐྱེན་དེ་ནང་ མི་སེར་གཞན་མི་ ༦ ལུ་ རྨ་སྐྱོན་བྱུང་ཡོད་མིའི་གྲས་ལས་ མི་ ༢ ལུ་ གནོད་སྐྱོན་སྦོམ་སྦེ་ར་ བྱུང་ཡོདཔ་མ་ཚད་ མེ་བསད་མི་ ༣ ལུ་ཡང་ རྨ་སྐྱོན་བྱུང་ཡོདཔ་སྦེ་ བཤདཔ་ཨིན་པས་ཟེར་ བཀོད་འདུག་པའི་གནས་ཚུལ།