མཐའ་ཡས་ལེན་གྱི་ ཁྲིམས་བཟོའི་ཚོགས་ཁང་ལས་ བདུན་ཕྲག་ཤུལ་མའི་ནང་ བློན་ཆེན་བཙག་འཐུ།

རོའི་ཊརཛ།
སྤྱི་ཟླ་ ༨ པའི་ཚེས་ ༡༦ ལུ་ མུབ་ཕོར་ཝཱཌ་ སྲིད་དོན་ཚོགས་པ་གིས་ གཞུང་སྐྱོང་བཙག་འཐུའི་ནང་ལས་ རྒྱལ་ཁ་ཐོབ་སྟེ་འབད་རུང་ ཁྲིམས་བཟོའི་ཚོགས་ཁང་ ལས་ བཀག་དམ་འབད་བའི་ཤུལ་ལུ་ ཁྲིམས་འདུན་ལས་ཡང་ བཀག་ཆ་དེ་ལུ་ ངོས་ལེན་གྲུབ་ཡོདཔ་ལས་ བདུན་ཕྲག་ཤུལ་མའི་ནང་ ཁྲིམས་བཟོའི་ཚོགས་ཁང་ལས་ བློན་ཆེན་བཙག་འཐུ་དེ་ འགོ་འདྲེན་འཐབ་ནི་ཨིན་པས།
དེ་ཡང་ ཧེ་མ་ བཙག་འཐུའི་ནང་ལས་ རྒྱལ་ཁ་ཐོབ་མི་ མུབ་ཕོར་ཝཱཌ་ སྲིད་ཚོགས་ལུ་ རྒྱབ་སྐྱོར་ཡོད་མི་ མཉམ་བསྡོམས་སྲིད་ཚོགས་ཀྱིས་ ཁྲིམས་བཟོའི་ཚོགས་ཁང་ནང་ལས་ གཞུང་སྐྱོང་གཞི་བཙུགས་འབད་མ་སྟེར་བར་ བཀག་ཆ་འབད་དེ་ཡོད་པའི་སྐོར་ལས་ རྩ་ཁྲིམས་ཅན་གྱི་ ཁྲིམས་ཀྱི་འདུན་སར་ བཅར་བའི་སྐབས་ལུ་ མུབ་ཕོར་ཝཱཌ་ སྲིད་ཚོགས་ཀྱི་འགོ་ཁྲིདཔ་ པི་ཏ་ལིམ་ཇ་རོ་ཨེན་རིཏ་དེ་ ཉོག་བཤད་ཀྱི་གྲངས་སུ་མིན་འདུག་ཟེར་ ངོས་ལེན་མ་གྲུབ་ཨིན་པས།
མཐའ་ཡས་ལེན་དེ་ སྤྱི་ཟླ་ ༣ པ་ལས་ཚུར་རང་ གནས་སྐབས་སྲིད་གཞུང་གི་འོག་ལུ་ཡོདཔ་ད་ གཞུང་སྐྱོང་བཙག་འཐུའི་ནང་ལས་ མུབ་ཕོར་ཝཱཌ་ སྲིད་ཚོགས་ཀྱིས་ རྒྱལ་ཁ་ཐོབ་ཡོད་རུང་ དམག་སྡེའི་ཁོངས་སུ་གཏོགས་མི་ ཁྲིམས་བཟོའི་ཁ་ཐུག་ལས་ བཀག་ཆ་འབད་དེ་ བཞག་པའི་ཤུལ་ལས་ འཕྲལ་ཁམས་ཀྱི་བདུན་ཕྲག་ཚུ་ནང་ ཤུལ་མའི་གཞུང་ གཞི་བཙུགས་ཀྱི་སྐོར་ལས་ གནས་སྟངས་ཟང་ཟིང་ཐལ་ཏེ་ཡོདཔ་ཨིན་པས།
གཞུང་སྐྱོང་བཙག་འཐུའི་ནང་ མུབ་ཕོར་ཝཱཌ་ སྲིད་ཚོགས་ཀྱི་ཤུལ་ལས་ར་ ཕིའུ་མཐའ་ཡས་ སྲིད་ཚོགས་ཀྱིས་ ཚོགས་རྒྱན་མང་ཤོས་ཐོབ་སྟེ་ ཨང་ ༢ པ་ ཐོན་ཡོདཔ་ལས་ སྲིད་ཚོགས་དེ་གིས་ མུབ་ཕོར་ཝཱཌ་ སྲིད་ཚོགས་ལུ་ རྒྱབ་སྐྱོར་འབད་ནི་ལས་ རྒྱབ་བཤུད་རྐྱབ་སྟེ་ ཁོང་རའི་འགོ་ཁྲིདཔ་ རྒྱུ་ནོར་འབོལ་བའི་ གཞིས་ཁྱིམ་ཚོང་འབྲེལ་པ་ ཤེ་རེ་ཐ་ཐ་བི་སིན་དེ་ བློན་ཆེན་གྱི་ འདེམས་ངོ་སྦེ་བཏོན་ཏེ་ བསྐུལ་བསྒྲགས་ཚུ་འབདཝ་ཨིན་པས་ཟེར་ བཀོད་འདུག་པའི་གནས་ཚུལ།