ཀིར་གིཛ་ཏཱན་ལུ་ མི་དམངས་མཉམ་བསྡོམས་ཐོག་ལས་ གནོད་འཚུབ་བཀལཝ་ལས་ ཕྱི་རྒྱལ་གྱི་ སློབ་ཕྲུག་ཚུ་བྲོས་བྱོལ།

རོའི་ཊརཛ།
སྤྱི་ཟླ་ ༥ པའི་ཚེས་ ༢༥ ལུ་ ཀིར་གིཛ་ཏཱན་ རྒྱལ་ཁབ་ནང་ མི་དམངས་མཉམ་བསྡོམས་ཐོག་ལས་ པ་ཀིས་ཏཱན་དང་ ཨེ་ཤི་ཡའི་ རྒྱལ་ཁབ་གཞན་ཚུ་ལས་ ཤེས་ཡོན་སློབ་སྦྱོང་འབད་མི་ སློབ་ཕྲུག་ཚུ་གི་ སྡོད་ཁྱིམ་ཚུ་ལུ་ གནོད་འཚུབ་བཀལཝ་ལས་ ཕྱི་རྒྱལ་གྱི་ སློབ་ཕྲུག་བརྒྱ་ལས་བཅད་དེ་ འབྱོག་དོ་ཡོད་རུང་ ཀིར་གིཛ་ཏཱན་ལུ་ གནས་སྟངས་ལེགས་ཤོམ་འགྱོཝ་ད་ ལོག་ཚུགས་པའི་ རེ་བ་ཡོདཔ་ཨིན་པས།
དེ་ཡང་ སྤྱི་ཟླ་ ༥ པའི་ཚེས་ ༡༧ ལུ་ ཀིར་གིཛ་ཏཱན་གྱི་རྒྱལ་ས་ བིཤ་ཀེག་ལུ་ ཀིར་གིཛ་ཏཱན་གྱི་ མི་ཁུངས་དང་ ཕྱི་མི་ཚུ་གི་བར་ན་ བྱེལཝ་ཐོན་པའི་ཤུལ་ལས་ ཀིར་གིཛ་ཏཱན་གྱི་ ན་གཞོན་ཕོ་སྐྱེས་ཚུ་གིས་ ཕྱི་རྒྱལ་གྱི་ སློབ་ཕྲུག་ཚུ་སྡོད་སར་ གནོད་འཚུབ་བཀལ་ནུག།
ཀིར་གིཛ་ཏཱན་ རྒྱལ་སྤྱི་གཙུག་ལག་སློབ་སྡེའི་ནང་ལས་ སློབ་ཕྲུག་ཅིག་གིས་ བཤད་དོ་བཟུམ་འབད་བ་ཅིན་ ཀིར་གིཛ་ཏཱན་གྱི་ ན་གཞོན་ཚུ་གིས་ ཁོང་གི་སྡོད་ཁང་ཚུ་ནང་ བཙན་འཛུལ་འབད་དེ་ གནོད་འཚུབ་བཀལ་བའི་སྐབས་ལུ་ བཀག་ཐབས་འབད་རུང་ བཀག་མ་ཚུགས་ཟེར་ཨིན་པས།
པ་ཀིཛ་ཏཱན་གཞུང་གིས་ སློབ་ཕྲུག་ཚུ་ སྐྱེལ་འདྲེན་གྱི་དོན་ལུ་ བིཤ་ཀེག་དང་ པ་ཀིཛ་ཏཱན་གྱི་བར་ན་ གནམ་གྲུ་ཁ་སྐོང་ཚུ་བཙུགས་ཏེ་ ཉིད་བསྟར་བཞིན་དུ་ སྐྱེལ་འདྲེན་འབདཝ་ཨིན་པས་ཟེར་ བཀོད་འདུག་པའི་གནས་ཚུལ།